“¿Fotota horqoykuwankikumanchu?”
Sabado punchaw asamblea tukuytam, México Betel wasipi llamkaq Josué, amistadninkunawan Querétaro llaqtaman rirqaku purikuq. Colombia nacionniyoq Javier hinaspa señoran Maruñataqmi chay llaqtata reqsinankupaq watukurqaku, chaypim fotota horqonanpaq mañakurqaku. Josueywan amistadninkuna allin pachasqa hinaspa qasqonkupi tarjetayoq kaptinkum, chay casarasqakunaqa tapurqaku ima huñunakuymanta hamusqankuta. Josueyñataqmi nirqa Testigokunapa asambleanman risqankumanta hinaspam domingo punchawta rinankupaq nirqaku.
Chay casarasqakunaqa sumaq pachankuta mana apamusqankuraykum, piensarqaku hukman tarikunankumanta. Chayna kaptinpas, Josueyqa sutinta hinaspa Betel wasipa telefonontam qorqa.
Tawa killa pasaytam Javierwan Maruqa, Josueyta qayarqaku asambleaman risqankumantawan Testigokunawan Biblia estudiay munasqankumanta willanankupaq, paykunaqa México nacionpiñam yachachkarqaku. Chayllam Biblia estudiayta qallaykurqaku hinaspa huñunakuykunaman riytapas. 10 killakuna pasaytañataqmi manaraq bautizakuchkaspa predicayta qallaykurqaku. Chaymantañataqmi astakurqaku Toronto (Canadá) lawman, chaypim iñiyninkupi ñawparispanku bautizakururqaku.
Chaymantañataqmi Josueyman cartata qellqarqaku imanasqa Diosmanta yachay munasqanmanta willanankupaq. Javiermi nirqa: “Manaraq asambleaman richkaspaykum señoraywan ninakurqaniku Diosmanta yachay munasqaykuta. Sumaq pachasqa kasqaykichikta qawaspaykum, piensarqaniku chay risqaykichik huñunakuy ancha allin kasqanmanta. Admirakurqanikum asambleapi lliw kaqkunapa imayna portakusqankumanta, tiyanaykuta tarinaykupaq yanapawasqankumanta hinaspa Bibliapi textokunata maskaysiwasqankumantapas. Manam pipas hukmantaqa qawawarqakuchu pachaykumantaqa”, nispa.
Arí, Josué iñiqmasinchikpim cumplikurqa Salomonpa kayna nisqan: “Tutapaymanta muhuykita tarpuy. Ama pisipaspayki chisinkuytapas tarpuy. Manam yachankichu mayqen tarpusqaykim wiñamunanta. Manataqmi yachankichu iskayninku igualla wiñamunanta” (Ecl. 11:6). ¿Atiwaqchu qampas muhuykita tarpuchkaq hina hukkunata asambleaman otaq huñunakuykunaman rinankupaq invitayta? Jehová Diosqa ñoqanchikta servichikuspam, Javiertawan Maruta hina Diosmanta yachay munaq huk runakunatapas llaqtanman pusamunman (Isa. 55:1).
[32 kaq paginapi foto]
México Betel wasipi, ichoqmanta alleq lawman: Alejandro Voeguelin, Maru Pineda, Alejandro Pineda, Javier Pineda hinaspa Josué Ramírez