Bibliam vidankuta cambiarurqa
¿IMANASQATAQ qullqisapa runa Dios serviyta qallaykurqa? Brasil nacionpipas ¿imataq huk runata drogakuyta hinaspa huchapakuyta saqinanpaq yanaparqa? Chaymantapas ¿imanasqataq huk musuqa llumpay trago tomayninta saqirurqa? Kikinkum chaykunamanta willawanchik.
“Allin kawsakusqaytam piensarqani” (JOHN RICKETTS)
NACESQAN WATA: 1958
NACIONNIN: ESCOCIA (REINO UNIDO)
HUK WILLAKUYKUNA: QULLQISAPA RUNA
ÑAWPAQ VIDAY: Taytayqa nacionniypi soldadokunapa jefenmi karqa, chaymi warma kaspayqa mana qullqimantaqa usuqchu kani, chaywanpas sapa kutim huklaw nacionkunaman astakuq kaniku. Inglaterra, Alemania, Kenia, Malasia, Irlanda hinaspa Chipre nacionkunapim karqaniku. Pusaq wataymantam achka colegiokunapi estudiarqani, chay colegiokunapitaqmi yacharqanipas. Colegioyta tukuruspayñataqmi ancha riqsisqa Cambridge sutiyuq universidadman estudiaq rirqani.
Iskay chunka wataymantañataqmi petroleo hurquq empresapi llamkayta qallaykurqani, chaypi pusaq wata llamkaspaymi rirqani America del Sur, Africa hinaspa Australia Occidental nacionkunaman. Chaymantam hatarichirqani kikiypa fabricayta, qipakunamanñataqmi rantikururqani utaq vedekururqani.
Chayraykum tawa chunka wataymantaqa manaña llamkarqanichu. Hinaspaymi tukuy tiempo viajarqani, chaymi Australia nacionpi kaspay iskay kuti cantonmanta-cantonkama motollaywan muyurirqani. Chaykunata ruwaspaymi kusisqa kasqayta piensarqani.
BIBLIAM VIDAYTA CAMBIARURQA: Chayna kawsakusqaymantam Dios agradecekuyta munarqani. Chaymi Iglesia Anglicana sutiyuq religionman rirqani, chay religionman taksaymanta richkaspaypas bibliamantaqa manam allintaqa yacharqanichu. Mormon religionmanpas rirqanim, ichaqa hukmanyarurqanim bibliata mana leesqankurayku hinaspa bibliamanta mana yachachisqankurayku.
Huk punchawmi Jehova Diospa testigonkuna wasiyman hamurqaku. Chaypi parlaspaykum chaylla cuentata qukurqani paykunapa yachachisqankuqa bibliamanta kasqanta. Bibliapi huknin texto leepuwasqankum karqa 1 Timoteo 2:3, 4 chaypim nin: “Diosninchikqa munachkanmi tukuy rikchaq runakuna salvakunankuta hinaspa chiqap kaq yachachikuyta imam kaqta yachanankuta”, nispa. Chaywanmi musyakurqani Jehova Diospa testigonkunaqa bibliamanta imam kaqta yachachisqankuta.
Paykunawan estudiaspaymi bibliamanta imam kaqta yacharurqani. Yacharurqanitaqmi Jehova Dioswan Jesusqa mana chaynalla kasqankutapas, hinaspa espiritu santoqa Diospa atiynin kasqanta (Juan 14:28; 1 Corintios 11:3). Unay watakunam piensarqani chaykuna imayna kasqanpi, bibliata estudiaspaymi ichaqa yacharurqani imayna kasqanta.
Chaymanta qipallamanmi Jehova Diospa testigonkunapa huñunakuyninkuman riyta qallaykurqani. Admirakurqanim kuyakuqllaña hinaspa bibliapa nisqanman hina kawsakusqankuta qawaspay, paykunataqa mana huchayuq runakunata hinam qawarqani. Iñiqmasintinpura kuyanakusqankuta qawaspaymi mana iskayrayarqanichu bibliapa nisqanman hina Dios yupaychasqankumanta hinaspa Jesucristopa qatiqninkuna kasqankumanta (Juan 13:35).
KUSISQAÑAM KAWSAKUNI: Bautizakurusqay qipallamanmi riqsirurqani Diane sutiyuq iñiqmasinchikta. Payqa unay watakunañam Jehova Diospa testigon karqa, kuyakuqllaña hinaspa llampu sunqu kasqanmi sunquyta suwaruwarqa, chaymi paywan casarakururqani. Tukuypi yanapawaptinmi kusisqa kaspay Jehova Diosta anchata agradecekuni.
Jehova Diosmanta aslla willakuqkunapa kasqankumanmi riyta munarqaniku, chaymi 2010 watapi Belice sutiyuq nacionman astakururqaniku, chayqa Centro America lawpim kachkan. Kaypiqa Dios kuyaq hinaspa paymanta yachay munaq runakunamanmi yachachiniku.
Jehova Diosmanta hinaspa bibliamanta imam kaqta yacharuspaymi hawkaña tarikuni. Diosmanta tukuy tiempoywan willakuspaymi achka runakunata yanaparqani, Diosmanta imam kaqta yachanankupaq. Anchatam kusikuni bibliamanta yacharuspanku runakuna ñuqa hina vidanku cambiasqankuta qawaspay. Kunanqa Jehova Diostam tukuy imapi yanapawasqanmanta hinaspa quwasqanmantam anchata agradecekuni.
“Kuyakuywanmi rimapayawarqaku” (MAURÍCIO ARAUJO)
NACESQAN WATA: 1967
NACIONNIN: BRASIL
HUK WILLAKUYKUNA: HUCHAPAKUQLLAÑA RUNA
ÑAWPAQ VIDAY: Brasil nacionpim Avare sutiyuq llaqtapi wiñarqani, chay llaqtapiqa yaqa llapallankum peon hinalla llamkapakunku.
Manaraq nacechkaptiymi papayqa wañukurqa. Warma kaspaymi, mamay llamkaq rinankama wasiypi sapallay kaspay pachankunawan tupukuq kani. Chaymi warmi hinaña puriq kani hinaspa rimaqpas kani, chayraykum runakunapas niwaqku: “Warmi hinañam wak maqtikuqa”, nispa. Tiempopa pasasqanman hinañataqmi maqtikumasiykunawan hinaspa yuyayniyuq runakunawanpas huchapakuq kani.
Wiñasqayman hinaqa astawanñam riq kani tomana wasikunaman, discotecakunaman chaynataq iglesiakunamanpas qarikunata hinaspa warmikunata maskaq, chaynapi paykunawan huchapakunaypaq. Carnaval fiestapiñataqmi warmiman pachakuspay samba nisqanpi tusuq kani.
Amistadniykunaqa karqa qari kachkaspa warmi hina kaqkunam, hukwan-hukwan huchapakuqkunam hinaspa drogakuqkunam. Paykunam yacharachiwarqa cocainawan drogakuyta, chaymi manaña saqiytaqa atirqanichu. Wakinpiqa paykunawanmi tukuy tuta drogakuq kaniku, wakinpiñataqmi sapallay tukuy punchaw drogakuq kani. Tullunwan-qarallanña kaptiymi runakunapas piensaqku sida unquyniyuq kasqayta.
BIBLIAM VIDAYTA CAMBIARURQA: Chayna kachkaspaymi Jehova Diospa testigonkunata riqsirurqani, paykunaqa kuyakuywanmi rimapayawarqaku. Romanos 10:13 nisqantam leeykapuwarqaku, chaypim nin: “Pipas Jehova Diosta sutinmanta ruegakuspa mañakuqmi salvasqaqa kanqa”, nispa. Chaynapim yacharurqani Diosta sutinmanta mañakuyqa ancha allin kasqanta. Chaymi wakinpiqa tukuy tuta drogakuruspay achikyaramuptin cielota qawarispa, waqaspay Jehova Diosta mañakuq kani yanapaykuwananpaq.
Mamay llumpayta ñuqamanta llakikusqanta qawaspaymi tantiakururqani manaña drogakunaypaq. Chaymanta qipallatam Jehova Diospa testigonkunawan bibliata estudiayta qallaykurqani. Paykunam niwarqaku bibliata estudiaptiyqa manaña drogakunaypaq Jehova Dios yanapaykuwananmanta, chaynamá karqa.
Bibliamanta astawan yachasqayman hinam cuentata qukurqani mana allin ruwasqaykunata saqinaypaq. Warma kasqaymanta chayna kasqayraykum, sasa karqa qari kachkaspay warmi hina kasqayta saqiyqa. Chayna kasqayta saqinaypaqqa manañam ñawpaqpi amistadniykunawanqa hukllawakurqanichu, manañataqmi tomana wasikunamanpas nitaq discotecakunamanpas rirqanichu.
Sunqunchik acusawaptinchikpas, Jehova Dios kuyakuqllaña hinaspa sunqunchik riqsiq kasqanta yachasqaymi yanapawan sunquy hawkayaykunanpaq (1 Juan 3:19, 20). 2002 watapaqqa ñawpaqpi imayna kasqaytam saqirurqaniña, hinaspam Jehova Diospa testigon kanaypaq bautizakururqani.
KUSISQAÑAM KAWSAKUNI: Mamayqa anchatam admirakurqa bibliata estudiaspa mana allin kaqkunata saqisqaywan, chaymi paypas biblia estudiayta qallaykurqa. Chaymanta qipallatam infarto cerebral nisqan mamaytaqa qururqa. Chaywan ñakarispanpas mamayqa hinallam kallpanchakuchkan Diosmanta astawan yachananpaq.
Pusaq watakunañam runakunaman tukuy tiempoywan Diosmanta yachachichkani. Wakinpiqa mana allin pensamientokunam kaqmanta umayman chayamun, chaywanpas yachanim chaykunata mana ruwanaypaq kallpanchakuptiyqa Jehova Dios kusisqa kananmanta.
Jehova Dios munasqanman hina kawsakunaypaq yanapawasqanmantam anchata agradecekuni, kunanqa hawka hinaspa kusisqañam kawsakuni.
“Trago wiksam karqani” (LUKA ŠUC)
NACESQAN WATA: 1975
NACIONNIN: ESLOVENIA
HUK WILLAKUYKUNA: LLUMPA-LLUMPAY TRAGO TOMAQ
ÑAWPAQ VIDAY: Eslovenia nacionpim Liubliana llaqtapi nacerqani. Tawa wataykamam hawkalla kawsakurqani, ichaqa chay watapim papayqa sipikururqa. Chay watamantapacham mamayqa, llumpayta llamkarqa wawqiytawan ñuqata mantienewanankupaq.
Chunka pichqa watayuq kachkaspaymi abuelaypa wasinman astakururqani chaypiña yachanaypaq. Chaypi kaytaqa munaq kani amistadniykuna chaypi kasqanraykum, hinaspa mamay mana controlawananraykum. Chunka suqtayuq wataymantañataqmi sapa semana tukuyta, trago tomaq runakunawan hukllawakuyta qallaykurqani. Chukchaytapas wiñarachispaymi paykuna hinaña pachakuspay cigarro pitaytapas yacharurqani.
Imaymana drogakunatam mallirqani, ichaqa trago tomaymi astawanqa gustawarqa. Tomayta gustaruspayqa manañam iskay-kimsa copallatañachu tomaq kani, aswanqa botellantintañam. Machasqa kasqaytapas wakin runakunallam musyawaq, wakinpiqa tragollaña samasqaywanmi musyaqku machasqa kasqaytaqa, chaywanpas manam yachaqkuchu achka botella trago tomasqaytaqa.
Discotecakunapi amistadniykunamanta astawanraq tomaruspaypas, wakinpiqa ñuqam paykunata aysaq kani. Huk kutipim huknin amistadniy hukninman kayna nisqanta uyarirurqani: “Payqa trago wiksam”, niqta. Chayna nisqanwanmi hukmanyarurqani, llaqtaykupiqa chaynataqa sutichanku, llumpay trago tomaqkunallatam.
Chayna niwasqanpi yuyaymanaspaymi piensarqani imayna kawsakusqaypi. Mana kaqpaqpas hinam hapikurqani, chaymi ima ruwasqaypas manaña allinchu karqa.
BIBLIAM VIDAYTA CAMBIARURQA: Chay tiempopitaqmi cuentata qukurqani huknin estudiaqmasiy manaña ñawpaqpi hina kasqanta, payqa hawkallañam karqa. Imanasqa chayna kasqanta yachanaypaqmi imallatapas mikuspa parlariq rirqaniku. Chaypim willawarqa payqa Jehova Diospa testigonkunawan bibliata estudiasqanmanta. Willawarqataqmi imakunata yachasqankunamantapas. Bibliamanta mana imatapas yachasqayraykum llapallan willawasqanta chayraq yacharqani. Jehova Diospa testigonkunapa huñunakuynikumanmi riyta qallaykurqani, hinaspam paykunawan biblia estudiaytapas qallaykurqani.
Biblia estudiasqaywanmi kallpanchasqa karqani. Yacharurqanim ‘tukupay punchawkunapiña’ kawsasqanchikta hinaspa mana llumpay unaymanta Jehova Dios kay pachapi kaq mana allin runakunata chinkachinanmanta. Yacharurqanitaqmi allin ruwaq runakuna kay pachapi wiñaypaq kawsakunankumantapas (2 Timoteo 3:1-5; Salmos 37:29). Chaymi ñuqapas kallpanchakurqani allin runaña kaspay wiñaypaq kawsakunaypaq.
Yaqa llapallan amistadniykunam Diosmanta willasqaywan asikurqaku. Chaywanmi cuentata qukurqani paykunaqa mana allin amistad kasqankuta. Hinaspapas musyakurqanitaqmi paykunawan hukllawakusqayrayku tomayta qallaykusqaymanta. Paykunaqa semana tukuytam suyachkaqkuña kaqmanta tomanankupaq.
Chaymi tantiakururqani paykunata saqispay Jehova Diospa testigonkunawanña hukllawakunaypaq. Paykunaqa allin kanayta munaspallankuchuqaya kallpanchawaqkuqa, aswanqa kikinkupas Jehova Diostam tukuy sunqunkuwan kasukuqku. Hinaspapas kamachisqanman hina kawsakunankupaqmi kallpanchakuqku. Paykunawan hukllawakusqayqa ancha allinmi karqa, chaymi tiempopa risqanman hina trago tomaytaqa saqirurqani.
KUSISQAÑAM KAWSAKUNI: Jehova Diostam anchata agradecekuni, kunanqa kusisqa kanaypaqqa manam tragotaraqchu tomani. Tragota hinalla tomaspayqa imaynaraq kayman karqa. Jehova Dios yanapaykuwasqanraykum kunanqa kusisqa kawsakuni.
Eslovenia nacionpim betel wasipi achka watakuna yanapakurqani. Kunanqa manam iskayrayanichu Jehova Diosta serviptinchikqa pay yanapawananchikmantaqa.