¿Jehova Diospa testigonkunapa huñunakuyninkupiqa warmikuna yachachinkuchu?

Jehova Diospa testigon warmikunaqa enteron allpa pachapim Diosmanta willakuchkanku hinaspa runakunam yachachichkanku. Salmos 68:11 nisqanpipas nirqam “achka warmikuna” Diosmanta willakunankumanta.

Ichaqa Jehova Diospa testigon warmikunaqa manam wakin religionkunapi warmikuna hinachu huñunakuykunapi yachachinku, ¿imanasqa?

Wakin religionkunapiqa warmikunam umalliq kanku, chaymi huñunakuyninkupipas religionninpi kaqkunam yachachinku. Jehova Diospa testigon warmikunam ichaqa wasin-wasin rispanku utaq maypi kaspankupas Diosmanta yachay munaqkunaman yachachinku.

Wakin religionkunapiqa warmikunam tantianku chay religionpi kaqkuna imata ruwanankupaq, hinaspapas paykunataqmi ninku imapi creenankupaqpas. Jehova Diospa testigon warmikunaqa huñunakuypi bautizasqa qari kaptinqa manam yachachinkuchu. Huñunakuyniykupiqa yachachinku bautizasqa hinaspa akllasqa qarikunallam (1 Timoteo 3:2; Santiago 3:1).

Bibliapiqa willawanchikmi huñunakuykunapiqa qarikunalla yachachisqankumanta. Apostol Pablopas Titotam kaynata nirqa: “Creta islapim qamtaqa saqimurqayki, […] kamachisqayman hina sapa llaqtapi iñiqkunapi punta apaqkunata churanaykipaq”, nispa (Tito 1:5). Pabloqa Titotam nirqam punta apaqkunaqa ‘mana pipapas ima ninan, chullalla warmiyuq’ kanankumanta (Tito 1:6). Timoteoman qillqaspanpas kaynatam nirqa: ‘Iñiqkunamanta nanachikuq kananpaq pipas kallpanchakuqqa, allin llamkaytam munachkan. Iñiqkunamanta nanachikuqqa kanan: Mana pipapas anyananmi, huk warmiyuqllam, [...] yachachinanpaqpas allin preparasqam’, nispa (1 Timoteo 3:1, 2).

Ichaqa ¿imanasqataq qarikunalla huñunakuykunapiqa yachachinanku? Apostol Pablom chaymanta yachachispan kaynata nirqa: “Manam munanichu warmikuna huñunakuypi yachachinantaqa nitaq qarita kamachinantapas, aswanqa upallallayá kachun. Puntataqariki Adanmi unanchasqa karqa, chaymantañam Evaqa”, nispa (1 Timoteo 2:12, 13). Bibliapi kayna nisqanwanmi yachanchik Jehova Diosqa qarikuna imapipas umallinankuta hinaspa yachachinankuta munasqanta.

Jesusta qatipakusqankuraykutaqmi qarikunaqa wasin-wasin hinaspa maypipas Diosmanta willakunku. Jesuspas chaynatam willakurqa Lucas libropim kaynata nin: ‘Llaqtan-llaqtan hinaspa llaqtachakunapipas purirqam Diospa munaychakuyninmanta sumaq willakuyta yachachistin hinaspa willakustin’, nispa. Jesusqa qatiqninkunatapas kamachirqam llaqtan-llaqtan rispanku willakunankupaq. Bibliapim nin: “Chaymi paykunaqa rispanku sapa llaqtachakunapi purirqaku sumaq willakuyta willakustin”, nispa (Lucas 8:1; 9:2-6).

Chayraykum kunanpas Jehova Diospa testigonkunaqa warmipas, qaripas Diosmanta maypipas willakuniku. Jesusmi nirqa: “Diospa munaychakuyninmanta kay sumaq willakuymi willakusqa kanqa enterollan kay pachapi llapallan nacionpi runakuna yachanankupaq, chayñam tukuy imapas tukunqa”, nispa (Mateo 24:14).