“Cheqap yachachikuymanta kikiy yachanaytam munarqaku”

ÑAWPAQ VIDAY:

República Dominicana nacionpim Santo Domingo llaqtapi nacerqani, tawa wawqe-paniykunamantam sullka kaq kani. Tayta-mamayqa educacionniyoqmi karqaku chaymi allin qespinaykuta munarqaku. Manaraq nacechkaptiymi tawa wata ñawpaqtaraq Mormón religionpi kaq misionerokunata reqsiruspanku, admirasqallaña karqaku allin portakuq, sumaq pachasqa hinaspa limpio kasqankuwan. Familiaymi riyta qallaykurqa Iglesia de Jesucristo de los Santos de los Últimos Días otaq Iglesia Mormona nisqanman.

Religionniypiqa hukkunata yanapaypim sapa kuti yanapakurqani, ichaqa astawan allinpaqqa hapirqani familiakuna allinta kawsanankupaq chaynataq allin kaqkunata ruwanapaq yachachisqankutam. Mormón kasqaywanqa anchatam kusikurqani chaymi tanteakurqani misionero kanaypaq.

18 watayta cumpliruptiymi familiaywan ripukurqaniku Estados Unidos nacionman allin universidadpi estudianayrayku. Wata pasaytam aylluyku watukamuwaspanku niwarqaku asambleankuman rinaykupaq, paykunaqa Jehova Diospa testigonmi karqaku. Chay asambleapi kaqkunaqa anchatam admirachiwarqa Bibliankupi textokunata maskaspa anotasqankuwan, chaymi ñoqapas papeltawan lapicerota mañakuspay paykuna hina anotayta qallaykurqani.

Misionero kay munasqayraykum asamblea tukuyta chay aylluyku niwarqa Bibliata allinta estudianaypaq. Yanapawanankupaq niwasqankuqa anchatam kusichiwarqa, Bibliapa yachachikuyninkunamantaqa Libro de Mormón nisqanpa yachachisqantam astawan yacharqani.

BIBLIAM VIDAYTA CAMBIARURQA:

Aylluyku pasakuptinkupas hinallam yacharqani Bibliamanta telefonontakama. Imapi creesqaytapas Bibliapa yachachisqanwan tupachinaypaqmi kallpanchawaqku. Cheqap yachachikuymanta kikiy yachanaytam munarqaku.

Religionniypi yachachisqankutaqa cheqap kasqanpaqmi hapirqani ichaqa manam yacharqanichu Bibliapa yachachisqanwan tupasqantaqa. Tiaymi apachimuwarqa 1995 watapi 8 noviembre ¡Rikchariy! revistata, chaypim willakurqa Mormón religionmanta, chayqa Testigonkunapa ruwasqanmi. Religionniypi imakunamanta yachachisqankuta mana yachasqaywanmi admirakurqani, chaymi Internetpi maskarqani chay revistapa nisqan cheqap otaq mana cheqap kasqanmanta yachanaypaq, nisqanqa cheqapmi kasqa. Astawanraqmi yacharqani Utah nisqanku llaqtapi mormonkunapa museonkunaman rispay.

Piensarqanim Bibliapa nisqanwan Libro de Mormón nisqanpi yachachikuykuna tupasqanta. Ichaqa Bibliata allinta leespaymi cuentata qokurqani mana tupasqanmanta. Ejemplopaq, Bibliapim nin almaqa otaq runaqa wañunanmanta (Ezequiel 18:4, NM). Libro de Mormón nisqanpiñataqmi nin almaqa otaq runaqa haykapipas mana wañuq kasqanmanta (Alma 42:9).

Chaymantapas iskayrayachiwarqam nacionllankupi piensasqanku. Niqkum Condado de Jackson (Misuri, Estados Unidos) nisqanpi Eden huerta kasqanmanta. Hinaspapas niqkum Dios gobiernamuptin Estados Unidospa banderan chuyay-chuyay aywityananmantapas.

Chaymi piensarqani chayna kaptinqa nacionniywan chaynataq wakin nacionkunawanpas imam pasananmanta. Huk tardepim misionero kananpaq estudiaq reqsinakusqay telefonowan qayamuwarqa hinaptinmi, tapurqani: “Nacionniki huklaw nacionwan guerrapi kaptinqa, ¿peleawaqchu chay nacionpi kaq mormonkunawan?”, nispa. Hinaptinmi niwarqa awriki nispa. Astawanraqmi averiguarqani religionniymanta, tapurqanitaqmi chaypi wakin umalliqkunatapas, paykunañataqmi niwarqaku tapukuyniykunaqa mana kutichiy atina kasqanta chaynataq tiempo pasasqanman hina yachanaymantapas.

Imayna contestawasqankuwanmi hukmanyasqa tarikurqani. Misionero kay munasqaymantam iskayrayayta qallaykurqani, musyarurqanim misionero kayqa ima ruwaypas hinalla kasqanta, munarqanitaqmi misionero kaspay reqsisqa kaytapas. Ichaqa pisillatam yacharqani Diosmanta. Achka kutikamam Bibliapi wakin textokunata leerqani ichaqa manam kaqpaqpas hapirqanichu. Manataqmi yacharqanichu Allpa pachapaq chaynataq runakunapaq Jehova Diospa munaynin imam kasqantapas.

BENDICIONKUNA CHASKISQAYMANTA:

Jehova Diospa testigonkunawan Bibliata estudiaspaymi yacharurqani: Diospa sutinta, wañuptinchik ima pasawasqanchikmanta, Diospa munayninpi Jesucristo imakuna ruwananmanta... Bibliapa yachachikuyninkunamanta entiendesqayman hinam yachasqaykunamanta hukkunaman willakuyta qallaykurqani. Jehova Diosmanta astawan yachaspaymi kunanqa amistadniyman hina asuykuni. 2004 watapim 12 julio killapi Bautizakurqani Jehova Diospa testigon kanaypaq, chaymanta 6 killa pasayllatam precursor otaq 70 hora predicaq karqani.

Yanapakurqanitaqmi Brooklyn llaqtapi (Nueva York) Betel wasipi 5 wata. Anchatam kusikurqani Allpantinpi nana-nanaq runakunapaq Bibliakunata chaynataq chaymanta horqosqa qellqakunata ruwaypi yanapakusqaymanta. ¡Anchatamá kusikuni Jehova Diosta reqsinankupaq runamasiykunata achka watakunaña yanapasqaymanta!