¿Hanaq pachapi kawsananpaqchu Jesusqa nichkarqa mana allin ruwaq runata?

Kay tapukuyqa rikurin Jesuswan kuska chay runa wañuchisqa kachkaptin prometesqanraykum, Jesusmi nirqa: “Cheqaptapunim kunan niki: ñoqawanmi Paraisopi kanki”, nispa (Lucas 23:43, NM). Jesusqa manam nirqachu maypi chay paraiso kanantaqa. Chaynaqa, ¿nichkarqachu chay runawan kuska hanaq pachaman rinankumanta?

Chaypaqqa puntata qawasun sichum hanaq pachaman rinanpaq otaq mana rinanpaq hina kasqanta. Hanaq pachaman rinankupaq suyakuyniyoq cristianokunaqa yakuwan hinaspa chuya espirituwan bautizasqam kananku, chaymi paykunaqa espiritupa yanapakuyninwan Jesuspa qatiqninkunaña kanku (Juan 3:3, 5). Chaymantapas Diospa munasqanman hinam kawsananku mana suwakuspa, allin kaqta ruwaspa hinaspa kuyapayakuspa (1 Corintios 6:9-11). Hinaspapas Diosmanwan Jesucristomanmi sonqo kananku wañukunankukama (Lucas 22:28-30; 2 Timoteo 2:12). Kaykunata ruwaspallam kawsarichisqa kanqaku hanaq pachapi sacerdotekuna hinaspa reykuna kanankupaq, chaynapi runakunapa allinninpaq waranqa wata kamachimunankupaq (Apocalipsis 20:6).

Chay runam ichaqa mana allinta ruwaspan kawsarqa hinaspa mana allin ruwaq hina wañurqapas (Lucas 23:32, 39-41). Respetaytaqa respetarqam Jesustaqa, chaymi nirqa: ‘Munaychakusqaykiman chayaspaykiqa yuyarillawankimá’, nispa (Lucas 23:42). Ichaqa manamá bautizakurqaraqchu, manataqmi chuya espiritupa atiyninwan Jesuspa qatiqninpas karqaraqchu nitaq kawsakuyninwanpas qawachirqachu Diosman sonqo kasqantaqa. Chaynaqa manam piensachwanchu Jesuspa qatiqninkunawan kuska hanaq pachamanta kamachimunanpaq Jesus nisqantaqa (Romanos 2:6, 7).

Kaywan rikchanachisun, sichu qollqekita suwaq runa wanakuspa nisunkiman pampachanaykipaq, hinaptin qamñataq mana quejakunaykipaq tantearuwaq. ¿Yaqachu chay runata niwaq negocioykimanta encargakunanpaq otaq familiaykimanta nanachikunanpaq? Manamá. Chaykunataqa saqewaq allin confiasqayki runallamanmi. Chaynallataqmi hanaq pachaman riqkunapas qawachinanku confianza kasqankuta hinaspa runakunata kamachimuspankupas Diospa nisqanta kasukunankumanta (Apocalipsis 2:10). Chay mana allin ruwaq runa wañunallanpaqña kachkaspan Jesusta ruegakuspanpas, manamá confianapaq hina kasqantaqa qawachirqachu.

Ichaqa, ¿manachu Jesusqa nichkarqa chay punchawlla hanaq pachapi chay runawan kanankumanta? Manam, Jesusqa manam chaytaqa ninmanchu karqa, payqa manam chay punchawllachu hanaq pachamanqa kutirqa, kimsa punchawmi “allpapa ukunpi” karqa (Mateo 12:40; Marcos 10:34). Chaymantapas kawsarimusqan qepatam tawa chunka punchawpiwanraq kay Pachapi karqa (Hechos 1:3, 9).

Chaynaqa, ¿ima paraisomantaq chay runa yaykunan karqa? Kawsarimuspanqa Jesuspa kamachikuyninpim kay Pachapi kanqa (Hechos 24:15; Apocalipsis 21:3, 4). Chay paraisomanta astawan yachayta munaspaqa hinaspa chaypi kanapaq imakunata Dios mañawasqanchikmanta yachayta munaspaqa, Jehova Diospa testigonkunawan parlay.