¿YACHARQANKICHU?

¿Imanasqataq ñawpaq tiempopi runakuna pachankuta llikiparqaku?

BIBLIAM willawanchik achka kutipi runakuna pachankuta llikipasqankumanta. Kunan tiempopi chaynata ruwayqa ichapas hukman rikchakuwachwan. Judiokunam ichaqa chayta ruwaqku mana imatapas ruwayta atispanku hinaspa nanaypi, humillasqa, piñasqa otaq llakipi tarikuspanku.

Rubenmi “pachankunata llikiparqa” wawqen Joseyta sirviente kananpaq rantikurusqankuta yacharuspan. Taytan Jacobñataqmi pachanta llikiparqa churin Joseyta purun animal mikurusqanta piensaspan (Gen. 37:18-35). Jobpas pachantam llikipakurqa llapallan churinkuna wañurusqanmanta willaykuptinku (Job 1:18-20). Chaymantapas, ‘pachan llikipasqa’ huk willakuqmi sacerdote Eliyman willarqa Israel runakuna guerrapi vencerachikusqankumanta. Willarqataqmi iskaynin churinkuna wañurusqanmantawan Diospa baulninta Filistea runakuna apakusqankumantapas (1 Sam. 4:12-17). Josiasñataqmi pachankunata llikiparqa Diospa yachachikuynin libro leesqankuta uyariruspan chaynataq Israel runakuna mana allin ruwasqankumanta yacharuspan (2 Rey. 22:8-13).

Jesus juzgasqa kaptinmi sacerdotekunapa jefen Caifas ‘pachanta llikiparqa’ Jesuspa nisqanta uyariruspan. Chay sacerdoteqa Jesuspa rimasqantam Diosta insultasqanpaq hapirqa (Mat. 26:59-66). Leyta yachachiqkunapa costumbrenkuman hinaqa, Diospa sutinta yanqacharuqta pipas uyariqqa pachantam llikipanan karqa. Ichaqa, Jerusalen templo tuñichisqa kasqan qepamanmi leyta yachachiqkunaqa kaynataña nirqaku: “Kunanqa pipas Diospa sutinta yanqacharuqta uyariqqa, manam pachantaqa llikinanchu, chaynata ruwaptinqa paypa pachanmi chika-chikan llikipasqa kanqa”, nispa.

Chaynaqa, pipapas pachan llikisqanta Jehova Dios allinninpaq qawananpaqqa, sonqomanta llakisqam kanan karqa. Chaymi Jehova Diosqa llaqtanta nirqa: “Sonqoykichiktayá llikiparuychik. Amayá pachaykichiktachu llikiparuychikqa. [. . .] Diosmanyá kutirikuychikqa”, nispa (Joel 2:13).