BIBLIAMANTA TAPUKUYKUNA

¿Imataq juicio punchawqa?

Ñawpaq tiempopim Diosqa llaqtanta sasachakuymanta librananpaq juezkunata churarqa (Jueces 2:18). Bibliam willawanchik hamuq tiempopi Diosqa runakunata juzgananmanta. Chay tiempoqa kusikunapaqmi kanqa, Jehova Diosmi enteron pachapi juez kaspan tukuy mana allinkunamanta librawasun (leey Salmo 96:12, 13; Isaias 26:9).

Churin Jesusnintakamam chaykunata ruwanqa. Paytapas juez kananpaqmi Diosqa churarun chaynapi kawsaqkunatawan kawsarimuqkunatapas juzgananpaq (Hechos 10:42; 17:31). Chay juicio punchawpim Jehova Diosta manaraq riqsichkaspa wañuqkunata Jesucristoqa kawsarichinqa, chaynapi Diosmanta yachaspanku kuyanankupaq (leey Hechos 24:15).

¿Hayka tiempotaq juicio punchawqa kanqa?

Bibliam willakun chay juicio punchawqa waranqa wata kananmanta. Chay tiempopim wañukuqkuna kawsarichisqa kanqaku, chayraykum atinqaku Diosmanta yachayta hinaspa nisqankunata kasukuytapas (Apocalipsis 20:4, 12). Achka runakunam ninku kawsarimuqkunaqa manaraq wañuchkaspa huchallikusqankumanta juzgasqa kanankuta. Bibliam ichaqa willawanchik kawsarimuspanku imayna kawsasqankuman hina juzgasqa kanankumanta (leey Romanos 6:7).

Bibliaqa willawanchiktaqmi huk juicio punchaw kananmantapas, chayqa kanqa waranqa wata manaraq qallarichkaptinmi. Kay qillqapa qallariyninpi yachachikuykunaman hinam, chay tiempota bibliaqa sutichan puchukay punchawwan. Chay tiempopiqa mana kasukuq runakunatam Dios chinkachinqa (2 Pedro 3:7). Chaymi kunanmantapacha tukuy sunqunchikwan Jehova Diosta kuyasqanchikta qawachinanchik (leey 2 Pedro 3:9, 13).