¿Imaynatam llakiyuqta yanapana?

Wakinpiqa llakipi tarikuqta kallpanchaykunanchikpaqmi mana ima niytapas, ni ima ruwaytapas atinchikchu. ¿Yaqachu haykallapipas chayna tarikurqanki? Qatiqninpim yachasun imakunata ruwaspa kallpanchanamanta.

Wakinpiqa “ñuqaykupas llakikunikum” nispa niykuyllam kallpanchan. Huk law llaqtakunapiqa llakipi tarikuqta abrazaykuspankum utaq makinkuwan hapiykuspankum kallpanchaykunku. Sichu llakipi tarikuq rimariyta munaptinqa uyariykuy. Aswan allinqa kanmantaqmi imapas mana ruway atisqankunapi yanapaykuy, yanapawaqmi warmankuna qawaypi, yanukuypi utaqmi wañukuq pampakunanpaq imapas alistaypi. Rimayllawan kallpanchanamantaqa aswan allinqa imatapas ruwaspa yanapaykuymi.

Ichapas tiempopa risqanman hinaqa wañukuqpa imapas allin ruwasqankunamanta utaq allin runa kasqanmantapas rimariwaq. Chaykunamanta rimayqa ancha allinmi, wakinpiqa llakipi tarikuqtapas asirichiwaqraqmi. Pam sutiyuq warmitam qusanpa wañukusqanmanta yaqa suqta wataña pasaruptinpas chaynata ruwaspanku kallpanchanku. Paymi nin: “Qusaypa allin ruwasqankunamantam runakuna willawanku, wakinpiqa mana yachasqaykunamantaraqmi willawanku. Chaykunam kusirichiwan”, nispa.

Doctorkunam ninku llakipi tarikuqkunataqa qallariyllanpi amistadninkuna yanapasqankuta, chaymantañataq tiempo pasasqanman hinaqa qunqarusqankutaña. Chaymi ancha allin kanman wañukuqpa ayllunwan hinalla rimayninchik, chaytaqa ruwawaqmi wañukusqanmanta qatiqnin killakunaman utaq watakunaman.a Achkaqmi chayna llaki pasaqkunaqa riqsikullanku unay tiempoña ayllun wañukusqanmanta pasaruptinpas hinalla yuyarisqankumanta.

Japón nacionpi yachaq Kaori sutiyuq sipasmi llumpay llakisqa tarikurqa maman wañukuptin, chaymantapas wata kimsa killa pasayllatam ñañanpas wañukurqa. Ichaqa amistadninkunam allinta yanapaykurqaku. Huknin yuyayniyuq amistadninpa sutinmi Ritsuko, paymi wawanta hina uywakunanpaq niykurqa. Chaymanta willakuspanmi Kaoriqa nin: “Manam munarqanichu pipas mamay hina kanantaqa, chullallam mamayqa. Ichaqa kuyawaspan uywawasqanraykum Ritsukotaqa kuyayta qallaykurqani hinaspam mamayta hinaña kuyayta qallaykurqani. Sapa semanam Diosmanta willakuq hinaspa huñunakuyniykuman kuska riq kaniku. Wasinmanmi pusawaq, mikuytam apamuwaq hinaspapas cartakunatam qillqamuwaq. Ritsukopa ruwasqanqa anchatam yanapaykullawarqa”, nispa.

Chunka iskayniyuq watañam Kaoripa mamanpa wañukusqanqa. Kunanqa qusanwan kuskam Kaoriqa sapa killa 70 horata Diosmanta willakunku. Kaoriqa nintaqmi: “Mamay Ritsukoqa hinallam yuyarillawan, chaymi sapa kuti telefonowan qayamuwan hinaspa internetnintakama qillqamuwan. Llaqtayman kutispayqa kusisqam watukuq rini”, nispa.

Chipre nacionmanta Poli sutiyuq warmipa qusanmi umanpi tumorwan 53 watanpi wañukurqa, Poliqa Jehova Diospa testigonmi, chaymi payqa amistadninkunapa yanapasqanwan kallpanchasqa tarikurqa. Qusanqa kuyakuq hinaspa iñiqmasinkunata allinta yanapaq runam karqa. Mana tayta-mamayuqkunatawan viudakunatam mikuykunankupaq wasinman qayaykuq (Santiago 1:27). Llakikuspanmi Poliqa nin: “Kimsa chunka kimsayuq wata vida pasaq masiymi saqirullawan”, nispa.

Qusanpa pampakusqan qipallatam Poliqa 15 watanpi Daniel sutiyuq wawanpiwan Canadá nacionman astakururqaku. Chaypiñam iñiqmasinkunawan huñunakuyta qallaykurqaku. Paymi willakun: “Canadá nacionpi iñiqmasiykunaqa manam yacharqakuchu sasachakuyniykunamantaqa. Ichaqa kuyakuywan rimapayaykuwaspankum yanapaykullawarqaku. Chayna yanapawasqankuraykum wawayqa taytan wañukusqanmanta llakikuspanpas mana hukmanyarurqachu. Chaypi huk iñiqmasiykum warmaytaqa imapaqpas qayaykuq, kusirikuq utaq pelota haytaq rinankupaqpas”, nispa. Kunanqa hawkañam Poliqa wawan Danielpiwan kawsakunku.

Yachamusqanchikman hinam llakipi tarikuqkunataqa tukuyta ruwaspa yanapachwan. Bibliapas kallpanchawanchikmi hamuq tiempopi sumaq kawsakuy kananmanta willawaspanchik.