¿Yacharqankichu?

¿Imakunatam ruwaqku ñawpaq tiempopi patronninpa wasinmanta nanachikuqkuna?

ÑAWPAQ tiempopi patronninpa wasinmanta nanachikuq runaqa nanachikurqa patronninpa tukuy imanmantam.

Jacobpa churin Joseytapas Egipto nacionpi wañuy-kawsay llamkachkaptinmi, patronnin wasinmanta nanachikunanpaq niykurqa. Patronninqa paypa makinmanmi churarqa tukuy ima kapuqninta (Gen. 39:2-6). Chaymanta qipaman Egipto nacionmanta huknin kamachiqña kaspanmi Joseypas wasinmanta nanachikuqkunata churarqa (Gen. 44:4).

Jesuspa tiemponpipas, kapuqniyuq runakunaqa llaqtapi yachasqankuraykum chakra wasinkupi nanachikuqkunata churarqaku, chaynapi llamkapuqnin runakunamanta nanachikunankupaq.

¿Imayna runam kananku karqa pipas patronninpa wasinmanta nanachikuq kaqqa? Roma nacionniyuq Columela runam nirqa “patronninpa wasinmanta pipas nanachikuy munaqqa allin runa hinaspa patronninpaq llamkaqkunata sumaqllata rimapayaq kananmanta”. Nirqataqmi: “Pipas patronninpa wasinmanta nanachikuqqa manam yachaypa atiparusqanchu kanan karqa, aswanqa mana yachasqankunamanta yachananpaq tupuyta ruwaspa kallpanchakuqmi”, nispa.

Bibliapas sumaqtam tupachin patronninpa wasinmanta nanachikuqpa ruwayninkunawan iñiqkuna ukupi ruwaykunata. Apostol Pablopas iñiqkunatam kallpancharqa patronninpa wasinmanta nanachikuq runa hina sapakama kanankupaq (1 Ped. 4:10).

Jesuspas patronninpa wasinmanta nanachikuq runapa ruwasqanwanmi yachachirqa Lucas 16:1-8 nisqanpi rikchanachiymanta rimaspan. Chaymantapas kamachiqña kaspan, patronninpa wasinmanta nanachikuqta hina Diospa llaqtanpi punta apaqkunata akllananmantam nirqa. Diospa llaqtanpi punta apaqkunapa ruwayninqa kanan karqa kay tukupay punchawkunapi llapallan Jehova Diospi iñiqkunaman tiempollanpi mikuchichkaq hina Jehova Diosmanta yachachiymi (Mat. 24:45-47; Luc. 12:42). Diospa llaqtanpi punta apaqkunapa tiempollanpi mikuchichkaq hina iñiyninchikpi allin kanapaq Diosmanta yachachiwasqanchikwanqa ancha kusisqam tarikunchik.