Hinallayá ‘achkanpi rurusun’
1 Huk kutipim Jesus nirqa cheqap uvas planta hina kasqanta, Taytanñataq Llamkaq, sapaqchasqa qatiqninkunañataqmi uvas plantapa ruruq kallmankuna hina kasqankuta. Kay rikchanachiypi Llamkaqmanta yachachispanmi Jesusqa qawachichkarqa uvas plantapi hinalla takyayqa ancha allinpuni kasqanta (Juan 15:1-4). Kaymantam yachanchik imaynam Jehová Diospa serviqninkunaqa ‘cheqap uvas plantapa’ ruruq kallmankuna hina kanankuta. Hinallam achkanpi rurunanchik ‘Chuya Espiritupa kawsachiwasqanchikman hina’ chaynataq Diospa Munaychakusqanmantapas (Gal. 5:22, 23; Mat. 24:14; 28:19, 20).
2 Chuya espiritupa imayna kawsachisqanmanta: Iñiyninchikpiwan Dioswan allin kayninchikpi ñawparisqanchiktam qawachichwan sichum chuya espiritupa kawsachiwasqanchikman hina kawsaspanchikqa. ¿Kallpanchakunchikchu chuya espiritupa kawsachisqanman hina kawsakuyta sapa punchaw Bibliata estudiaspanchik hinaspa yuyaymanarispanchikpas? (Fili. 1:9-11.) Ama hukmanrayaspa Jehová Diospa chuya espiritunta mañakusun, chay kallpawanmi allin cristiano kasunchik Diosta hatunchanapaq hinaspapas iñiyninchikpiwan Dioswan allin kayninchikpim hinalla ñawparisunchik (Luc. 11:13; Juan 13:35).
3 Chuya espirituqa yanapawanchiktaqmi kusisqallaña Jehová Diosta servinanchikpaq. Ejemplopaq, kuyakuypiwan iñiymi kallpanchawasunchik sumaq arreglota rurakunanchikpaq pisi tiempoyoqllaña kaspanchikpas hinalla predicananchikpaq. Chaynallataqmi hawkayaypas, pacienciakuypas, sumaq sonqoyoq kaypas, llampu sonqoyoq kaypas chaynataq controlakuq kayninchikpas yanapawanchikmi contranchikpi rimaqkunawan hawkalla kananchikpaq. Kusikuyñataqmi yanapawanchik runakuna mana uyariyta munawaptinchikpas mana hukmanrayananchikpaq.
4 Diospa Munaychakusqanmanta kallpawan predicananchikmanta: Munanchiktaqmi ‘kañasqa ofrendata qochkaq hina’ Diospa Munaychakusqanmantawan sutinmanta willakuyta (Heb. 13:15). Kañasqa ofrendata qochkaq hinam tukuy sonqonchikwan hinaspa tukuy kallpanchikwan Diospa sumaq noticianmanta willakunchik. ¿Kallpanchakuchkanchikchu predicayninchikta astawan masyachiypi chaynapi Diospa Munaychakusqanmanta willakuspanchik achkanpi rurunanchikpaq?
5 Jesusmi nirqa cheqap qatiqninkuna sacha hina rurunankumanta, wakiqnin achkata wakiqninñataq pisillata (Mat. 13:23). Chaynaqa manam rurasqanchiktaqa tupachinanchikchu hukkunapa rurasqankuwanqa, aswanmi tukuy sonqomanta Jehová Diospaqqa llamkananchik (Gal. 6:4). ‘Achkanpi rurunanchikpaqqa’ kikinchikmi Diospa Palabrantakama imayna llamkasqanchikta qawakunanchik chaynapi Jehová Diosta hinalla hatunchananchikpaq (Juan 15:8).