Imaynatam servichikuna ‘Diospa kuyakuynin’ librota Bibliamanta estudiota qallarinapaq
1. ¿Imapaq rurasqam kachkan ‘Diospa kuyakuynin’ libroqa?
1 ¡Mayna kusikunapaqmi karqa qayna wata kimsa punchaw Asambleapi, ‘Diospa kuyakuyninpiyá takyasunchik’ librota chaskisqanchikqa! Chay asambleapi uyarisqanchikman hinam kay libroqa rurasqa kachkan imayna kawsananchikpaq Jehová Diospa yachachikuyninkunata reqsispa kasukunanchikpaq, ichaqa manam Bibliamanta facil yachachikuyninkunata yachachinapaqchu. Manataqmi kay librotaqa predicacionpiqa qosunchikchu.
2. Kay librota, ¿imaynatam servichikusunchik, hinaspa pikunawan?
2 Kay librotaqa servichikusunmi estudiantenchikwan Yachachiq librota tukuruspa estudiachinapaq. Yuyariy, estudiantekunaqa manam chaynallatachu iñiyninkupiqa ñawparinku, chaymi sapakama entiendesqankuman hina estudiachina. Ichaqa yachachisqanchikta allintapuni entiendesqantam musyakunanchik. Kay librowanqa manam estudiasunchu achka librokunataña estudiachkaspankupas mana salonman hamuqkunawanqa, nitaq kawsayninkupipas Diospa munasqanman hina mana kallpanchakuqkunawanqa.
3. ¿Imatam rurananchik Adoremos nisqa librowan estudiota qospanchikqa?
3 Sichum Adoremos librowan estudiachiyta tukuruchkankiña, hinaspaqa kallpanchawaqmi estudiayta tukuruptikichik kikinña ‘Diospa kuyakuynin’ librota estudiananpaq. Mana chayna kaptinqa, allinmi kanman chay mosoq librotaña estudiachiyqa. Yachachiq librowan hinam kikinchikmantaña penden libropa sapaq yachachikuyninkunata yachachiyqa.
4. Yachachiq librota otaq ‘Diospa kuyakuynin’ librota Biblia estudiaq manaraq tukuchkaspan bautizakuruptinqa, ¿imatam rurananchik?
4 Sichum Biblia estudiaq Yachachiq librota manaraq tukuchkaspan bautizakuruptinqa, hinallam ‘Diospa kuyakuynin’ librotapas tukunankama estudiachina. Chaynataq ‘Diospa kuyakuynin’ librota manaraq tukuchkaspan bautizakuruptinpas hinallam tukunankama estudiachina, chaymantapas yupachwanmi tiemponchikta, yapamanta watukusqanchikta hinaspa estudiotapas. Tiempontaqa yupanmantaqmi riqmasinchikpas.
5. ¿Imaynatam ‘Diospa kuyakuynin’ librota servichikuchwan iñiyninkupi chiriyaruqkunata yanapanapaq?
5 Congregacionpi Comité de Servicio nisqamanta huk kaqnin anciano iñiyninkupi chiriyaruqwan estudianaykipaq nisuspaykiqa, yaqapaschá nisunki ‘Diospa kuyakuynin’ libropa yanapaqnin yachachikuykunallata estudiachinaykipaq. Chaymi pisi tiempollapi yachachina. ¡Kayqa sumaq-sumaq yanapakuymi! Kay libroqa ‘Diospa kuyakuyninpi waqaychakunanchikpaqmi’ rurasqa kachkan (Judas 21).