Tapukuykunapaq kaq

◼ ¿Imaynatam llapallanchik yanapakuchwan huñunakuykunapi yachachikuykunata hawkalla chaskinapaq? (Deu. 31:12.)

Jehová Diosta hinaspa qowasqanchik huñunakuykunata respetaspam, llapallanchik kallpanchakunanchik manaraq huñunakuy qallarichkaptin chayanapaq hinaspa Jehová Diospa yachachikuyninta atencionwan uyarinapaqpas. Allinmi kanman salonpa punta kaq tiyanankunapi tiyayninchikqa, chaynapi warmachayoq iñiqmasinchikkuna hinaspa qepataña chayamuqkuna qepa kaqpi tiyanankupaq. Manaraq huñunakuy qallarichkaptinmi celularkunata hinaspa chayman rikchakuqkunatapas upallachina, chaynapi hawkalla uyarinapaq. Huñunakuykunata llapallanchik respetowan qawaspanchikqa, manachá uyariqkunataqa sasachasunchu (Ecl. 5:1; Fili. 2:4).

Biblia estudiaqkuna chayllaraq huñunakuyman hamuptinkuqa, reqsiqnin kaq iñiqmasinchikmi paywan kuska tiyanman. Kayqa allinpunim kanqa Biblia estudiaq warmachayoq kaptinqa. Yaqapaschá paykunaqa wamaqllaraq huñunakuyman hamusqankurayku agradecekunqaku qepapi tiyachiptinchik. Chaynapim uyariqkunata mana sasachanqachu warmachankuta atiendenankupaq lloqsispanku (Pro. 22:6, 15). Warmachayoq kaqkunaqa manam iskay kaq salapiqa tiyanankuchu chaypi warmachankuna munasqankuta ruranankupaqqa. Allinmi kanman taytan otaq maman warmanta qepaman pusaspa corregiyninqa otaq ima necesitasqantapas atiendeyninqa, hinaspa kaqlla tiyanankuman kutiyninkuqa.

Allichaq wawqenchikkunam allintapuni yanapakunku huñunakuykuna hawkalla apakunanpaq. Yanapankum familiakunata hinaspa qepa hamuqkunatapas tiyanankuman pusaspa; kaytaqa sumaqllatam ruranku huñunakuqkunata mana sasachaspalla. Chaymantapas allin yuyaywanmi imapas kaptin sumaqllata atiendenku. Mayqan warmachapas huñunakuypi chaqwata ruraptinqa sumaqllatam yanapakunku.

Qawasqanchikman hinaqa, llapallanchikmi yanapakuchwan Jehová Diosmanta hinaspa munayninmantawan hamuq tiempopi sumaq kawsakuymanta huñunakuykunapi hawkalla yachanapaq (Heb. 10:24, 25).