Jehová Diospa Llaqtanpi Punta Apaqkunapa Cartan
Kuyasqa wawqe-panillaykuna:
¡Ancha kusikuywanmi kaqllamanta qellqamuykiku enteron pachapi qanchis millon masnin Jehová Diospa testigonkunaman! ¿Imaynam tarikunchik huklaw nacionniyoq iñiqmasinchikta reqsispanchik? Kuyakuywanmá chaskiykunchik ¿aw? (Juan 13:34, 35.) Chaynataqchá tarikunkichik kay watapaq anuario librota leespaykichikpas, chaypim willawanchik Diosman sonqo sapaq nacionniyoq hinaspa ancha iñiyniyoq achka iñiqmasinchikkunamanta.
Willakuykunatam chaskirqaniku Familiawan Diosta Yupaychanapaq Tutata yaqa llapaykichik allinta rurasqaykichikmanta. Tayta-mamakunaqa anchatamá kallpanchakurqaku estudiasqankuta atencionwan warmachanku uyarinanpaq hinaspa entiendenanpaqpas (Efe. 6:4). Casadokunapas ancha kallpanchasqam tarikuchkanku Bibliata iskayninku kuska estudiasqankuwan (Efe. 5:28-33). Hinaptinqa, llapallanchikmá yanapachikurqanchik Diospa Palabranta tukuy sonqonchikwan sapallanchikpi otaq familianchikwan estudianapaq tiempochakuspanchik (Jos. 1:8, 9).
Llakikunikum kay pasaq watakunallata hatun desgraciakuna kaptin achka iñiqmasinchikkuna sasachakuypi tarikusqankuwan. Anchatam agradecekamuykiku tukuy chay sasachakuykuna pasakusqanpi chaylla yanapakusqaykichikmanta (Hech. 11:28-30; Gal. 6:9, 10). Chaymantapas, wakinnikichikmi Dorcas hina ‘achka allinkunata ruraypi hinaspa wakchakunata yanapaypi’ kallpanchakuchkankichik, qamkunaqa listollam kachkankichik congregacionpi iñiqmasinchikkunapa imapas necesitasqankupi yanapaykunaykichikpaq (Hech. 9:36). Amayá qonqasunchu, Jehová Diosninchikqa manam qonqanqachu mana pipapas yachasqallanta yanapakusqanchiktaqa hinaspam payqa bendeciykuwasunchik (Mat. 6:3, 4).
Wakin nacionkunapim runakunaqa leykunata qewinku Dios serviyninchikta yanqachanankupaq, wakinnikichiktaqa manapaschá respetasurqankichikpaschu (Sal. 94:20-22). Chayna kaptinpas, chayna ñakarinanchikmantam Jesusqa nirqaña, chayraykum valorwan aguantachkankichik hinaspam Diospi amparakuchkankichik (Juan 15:19, 20). Ñoqaykuqa sapa kutim mañakuchkaniku qamkunapaq, mañakuchkanikutaqmi ‘tukuy tiempo listolla kaspa imam creesqaykichikmanta tapusuptikichik clarota contestanaykichikpaq’ (1 Ped. 3:13-15).
Alabamunikutaqmi wara-waranqantin llapallan iñiqmasinchikkunatapas, mana allin kawsaypi runakuna kawsanankupaq Satanas kallpanchaptinpas qamkunaqa hinallam watan-watan chuya tarikuchkankichik. Kunan tiemponchikpi runakuna mana allin kawsaypi tarikuptinkupas, qamkunaqa ‘Señorninchikman hapipakuspam atiyninwan allinta kallpanchakuchkankichik’ (Efe. 6:10). Qamkunam ‘harkachikunaykichikpaq Diospa llapallan qosusqaykichikwan pachakuchkankichik’ hinaspam kallpanchakuchkankichik ‘Diablo mana urmachisunaykichikpaq’ (Efe. 6:11, 12). Amayá haykapipas qonqaychikchu: qamkunapa servisqaykichikwanmi Diosqa insultaqninta contestan (Pro. 27:11).
Chaymantapas ancha kusikuywantaqmi willamuykiku 2011 watapaq Jesuspa wañukusqanta yuyarinapaq huñunakuyman 19.374.737 runakuna risqanchikmanta. Chaynam karqa abril killapi precursor auxiliar kaspa yaqa llapallaykichik yanapakusqaykichikrayku. Jehová Diospa testigonkuna willakuypi kallpanchakusqankum enteron pachapi millonnintin runakuna Jehová Diosmanta yachanankupaq yanaparqa (Rom. 10:18). Chay killapim karqa 2.657.377 precursor auxiliarkuna, wakin predicaqkunañataqmi kallpanchakurqaku astawanraq predicanankupaq. Chayna ganasllawanña yanapakusqankum anchata kusichiwanku (Sal. 110:3; Col. 3:23).
Jehová Diospa yanapakuyninwanmi pasaq watapi bautizakurqaku 263.131 runakuna. Agradecekamuykikum qamkunapa yanapakuynikichikwan Apocalipsis 22:17 nisqanpi invitacionta runakuna uyarinankupaq kallpanchakusqaykichikmanta, chaypim nin: “Espirituwan Carneropa novianmi nin: ‘Hamuy’ nispa. Uyariqpas nichun: ‘Hamuy’ nispa. Pipas yakunayachikuqqa hamuspayá kawsachikuq yakuta tomachun mana imallapaq”, nispa. Chaymantapas, 2011 watapaq kimsa punchaw asambleakunapim Diospa Gobiernonmanta aswan allinta yachasqanchikrayku, mañakunchik: “¡Gobiernoykiyá hamuchun!”, nispa. Yuyarinchiktaqmi apostol Juanpa imam nisqanta, payqa señorninchik Jesus “Arí, chayllam hamusaq” nispa niptinmi nirqa: ‘Amen. ¡Hamuy Señor Jesus!’, nispa (Apo. 22:20).
Imapas pasakunanmanta hinalla suyaspaykichikqa, amayá qonqaychikchu: qamkunataqa sapakamatam kuyaykiku. Kuyasqayku wawqe-panillaykuna, qamkunaqa kankichik Jehová Diosta “cheqaptapuni” kuyaqkunam (1 Juan 3:18).
Iñiqmasikichikkuna,
Jehová Diospa Llaqtanpi Punta Apaqkuna