Jehova Diospa Llaqtanpi Punta Apaqkunapa Cartan
Kuyasqa wawqe-panillaykuna:
Jehova Diosqa kuyakuq kasqanwanmi reqsichikun. Chaymi Bibliaqa nin: ‘Diosqa kuyakuymi’, nispa (1 Juan 4:8). Tukuy atiyniyoq kaptinpas, Bibliapiqa manam haykapipas ninchu: “Diosqa atiymi” otaq “Diosqa kallpam”, nispaqa. Paypa kamachikuyninqa kuyakuypi sapichasqam kachkan, chayraykum anchata kuyanchik.
Jehova Diosqa manam obligawanchikchu payta servinapaqqa. Manam kikinpa munasqanman hina ruwanapaqqa kamachiwanchikchu. Payqa munanmi kuyasqanchikrayku servinanchikta, chayqa sonqomantam kanan. Kuyakuywan allinta kamachiq kasqanraykum kamachiwananchikta munanchik. Chayqa sutillatam qawakurqa Adanwan Evapa tiemponmantapas.
Diosqa manam paykunataqa obligarqachu kasukunankupaqqa, aswanmi saqerqa kikinku tanteakunankupaq. Jehova Diosta sonqomanta kuyaspankuqa hinaspa paykunarayku imapas ruwasqanmanta agradecekuspankuqa, manam Satanaspa toqllanmanqa wichinmankuchu karqa.
Chaymanta qepatam, Israel nacionpaq discursota qospan Moises nirqa: “Akllakuychikyá, kunanmi ñoqa churapamuykichik allin kaqta kawsanaykichikpaq, mana allin kaqtañataq wañunaykichikpaq”, nispa (Deut. 30:15). Chay runakunaqa imayna kawsanankupaqpas akllakunmankum karqa. Chaynallataqmi Josueypas israelitakunata nirqa: “Dios adorayta mana munaspaqa, kunanpuni akllakuychik pim adoranaykichikta”, nispa. Runakunañataqmi Josueyta nirqaku: “[Jehova] Diosta saqeruspa taytacha mamachakuna adoraytaqa amayá yanqallapas piensasaqkuchu”, nispa (Jos. 24:15, 16). Ñoqanchikpas Jehova Diostaqa kuyanchikmi, manam piensayllapas-piensanchikchu paymanta karunchakuytaqa.
Cristianokunaqa allintam entiendenchik imatapas kikinchik tanteakunamantaqa. Ancianokuna hukkunata consejaspankupas otaq corregispankupas manam iñiyninkutawan vidankutaqa controlanmankuchu. Apostol Pablom kaynata nirqa: “Ñoqaykuqa manam iñisqaykichikpi munaychakuytachu munachkaniku, munachkanikuqa kusisqa kanaykichikpaq yanapaykuytam, qamkunaqa qaqa hinañam sayachkankichik iñisqaykichikpiqa”, nispa (2 Cor. 1:24).
Obligawaptinchik imatapas ruwanamantaqa aswan kusisqam tarikunchik kikinchikmanta munasqanchikrayku ruwaspanchik. Jehova Diospas niwanchikmi kuyasqanchikrayku allin kaqta ruwananchikpaq. Chayna kasqantam qawachin Pablopa qellqasqanpi: “Sichu aypuruyman tukuy kapuqniykunata, cuerpoytapas entregaymantaq kañasqa kananpaq, ichaqa mana kuyakuyniyoq kaptiyqa chaykuna rurasqaypas manam valenchu”, nispa (1 Cor. 13:3).
Jehova Diosqa kusisqam tarikun millonnintin runakuna tukuy sonqowan kuyasqanchikrayku servisqanchikmanta.
Payqa kuyanmi serviqninkunataqa. Chaynataq kay pachapi kaqkunata qepanchaspa Diosta kuyaq warmachakunatawan mozo-sipasyaqkunatapas. Manataqmi iskayrayawaqchikchu ñoqaykupas anchata kuyasqaykumantaqa (Luc. 12:42, 43).
Wawqe-panikuna hinaspa mozo-sipaskuna, Jehova Diosta kuyasqaykichikraykum qayna wata predicarqankichik 1.748.697.447 horakunata. Chaymantapas 7.782.346 iñiqmasinchikkunam Diosta kuyasqankurayku enteron Pachapi chayta ruwarqaku. Kusikunchiktaqmi 268.777 mosoq bautizakuqkunata qawaspanchik, karqakutaqmi mozo-sipaskunapas. Kaymi qawachin sapa semana 5.168 bautizakusqankumanta. ¡Kaykunata qawayqa anchatamá kusichiwanchik!
Tukupay tiempokunapi kawsasqanchikraykum Jehova Diosta serviqkunaqa atipananchik: sasachakuykunata, onqoykunata, qatikachasqa kayta hinaspa wakinpiqa yuyaqyaytapas. Ichaqa hinallam kallpanchakunanchik kaykunawan mana atipachikunapaq. Anchatam kuyaykiku (2 Cor. 4:16; Heb. 10:39).
Iñiqmasikichikkuna,
Jehova Diospa Llaqtanpi Punta Apaqkuna