¿Allintachu Bibliamanta yachachichkanchik?
1. ¿Imatam Diosmanta willakuqkunamanqa kamachiwarqanchik?
1 Manam pipas Jehova Diospa serviqnin kaytaqa atinmanchu mana kikin Dios “pusamuptinqa” (Juan 6:44). Chayna kaptinpas ñoqanchiktam kamachiwarqanchik Bibliamanta yachay munaqkunata yanapananchikpaq, chaynapi Jehova Diosman asuykunankupaq (Sant. 4:8). Chaypaqqa allintam preparakuna. Bibliamanta allinta yachananpaq hinaspa iñiyninpi ñawparinanpaq yanapayta munaspaqa manam qellqakunata leespa tapukuykuna kutichinallantachu suyananchik.
2. ¿Imakunatam ruwana Bibliamanta allinta yachachinapaq?
2 Bibliamanta yachay munaq runakunaman allinta yachachinapaqqa, kaykunapim yanapana 1) Bibliapa yachachisqanta allinta entiendenanpaq, 2) yachachisqanchik cheqap kasqanmanta mana iskayrayananpaq hinaspa 3) Bibliapa nisqanta ruwananpaqpas (Juan 3:16; 17:3; Sant. 2:26). Kay ruwaytaqa achka killakunapimá atichwan ichaqa kaynatapuni ruwayqa yanapanqam Dioswan amistadninta kallpanchananpaq hinaspa Jehova Diosman qokunanpaqpas.
3. ¿Imakunatam tapukunanchik Bibliamanta allinta yachachiyta munaspaqa hinaspa imanasqa?
3 ¿Ima nintaq yachachisqayki runaqa? Yachachisqanchik sonqonman chayasqanta yachanapaqqa manam ñoqallanchikchu rimananchik aswanqa kikin rimarinanpaqmi kallpanchana (Sant. 1:19). ¿Allintachu entiendechkan Bibliapa imam yachachisqanta? ¿Atinmanchu umallanmanta rimariyta? ¿Ima nintaq qawasqan yachachikuymanta? ¿Allinpaqchu hapin Bibliapa nisqanta? (1 Tes. 2:13.) ¿Bibliapa nisqanman hina kawsakuytachu munan? (Col. 3:10.) Imam piensasqanta yachanapaqqa allinta tanteaspam mana hukmanyachispalla tapuna hinaspam allinta uyarina (Mat. 16:13-16).
4. ¿Imatam ruwananchik Bibliamanta yachachisqanchik runa imayna piensaynintawan kawsakuyninta saqeypi sasachakuptinqa?
4 Wakinpiqa sasachakunqakuchá imayna kawsakusqanku saqeytaqa, piensasqanku hinaspa costumbrenku sonqonkupi sapichasqa kasqanrayku (2 Cor. 10:5). ¿Imatam ruwawaq Bibliamanta yachachisqayki runa imayna piensaynintawan kawsakuyninta saqeypi sasachakuptinqa? Ama hikutaspam suyananchik Diospa Palabran hinaspa chuya espiritun sonqonta llampuyaykachinankama (1 Cor. 3:6, 7; Heb. 4:12). Huk kaqnin yachachikuypi sasachakuptinqa huk yachachikuytañam qawana. Mana hikutaspa kuyakuywan Bibliamanta hinalla yachachiptinchikqa yaqapaschá tiempopa risqanman hina kawsakuyninta allichanqa.