Jehova Dios kasukusqanchikta qawachisun

Jehova Diosllam atiyniyuq imam allin utaq mana allin ruwaykuna kasqanta niwananchikpaq. Payqa nirqam warmi-qarilla casarakunankumanta (Mt 19:4-6, 9). Manataqmi allinpaqchu qawan tukuy imaymana huchapakuykunatapas (1Co 6:9, 10). Diosqa niwanchiktaqmi imayna pachakunapaqpas, chaynapi runakuna paypa serviqninkuna kasqanchikta yachanankupaq (Dt 22:5; 1Ti 2:9, 10).

Kunan tiempopiqa, runakunaqa manam munankuchu Diospa kamachisqanman hina kawsakuytaqa (Ro 1:18-32). Chaymi pachakunkupas munasqankuman hina. Chaymantapas paykuna hina mana kay munaqkunamantaqa mana allintam rimanku (1Pe 4:3, 4).

Jehova Diospa testigonkunaqa Diospa kamachikuyninkuna allin kasqantam qawachinanchik (Ro 12:9). ¿Imaynatam qawachichwan? Imakunata Dios allinpaq qawasqanta runakunaman sumaqllata willaspa hinaspa Diospa nisqanman hina kawsakuspam. Chaymi imayna pachakusqanchikta qawarikuspa tapukunanchik: “¿Diosta mana serviq runakuna hinachu pachakuni icha Diospa kamachisqanman hinachu? ¿Yaqachu imayna pachakusqay qawachin Dios serviq kasqayta?”, nispa. Chaymantapas, ima videota utaq televisionta qawayta tanteaspaqa tapukunanchikmi: “¿Qawanaypaq tanteasqaytaqa Diosqa allinpaqchu qawan? ¿Allin kaqkunatachu yachachin? Qawaruspayqa ¿imaynataq iñiyniypi tarikusaq?”, nispa (Sl 101:3). Hinaspapas tapukunanchikmi: “¿Imaynataq tarikunqaku aylluyqa utaq riqsiwaqniykunaqa tanteasqaywan?”, nispa (1Co 10:31-33).

Jesucristoqa kay pachapi mana allin ruwaykunataqa tukunqañam, chaymi ancha allin Diospa kamachisqanman hina kawsakuyqa. Kawsanqakuqa Diosta kasukuqkunallam (Ez 9:4-7; 1Jn 2:15-17). Chaynaqa, Diospa kamachisqanman hinayá kawsakusunchik, chaynapi imayna kasqanchikta qawaspanku runakunapas Diosta hatunchanankupaq (1Pe 2:11, 12).

QARIWAN WARMILLAM HUKLLAWAKUN NIQ VIDEOTA QAWARUSPAYKICHIK QATIQNINPI TAPUKUYKUNAMANTA RIMARIYCHIK:

• ¿Imanasqataq Jehova Diospa kamachisqanta kasukunanchik?

• ¿Imanasqataq tayta-mamakunaqa warmankuta uchuychankumantapacha yachachinanku Dios kasukuyta?

• ¿Imaynatam mozopas yuyaqpas runakunata yanapanmanku Diospa kuyakuyninta chaskinankupaq?