Testigokunapa kuyakuq kasqankutam qawarqaku

YOMARA, Marcelo hinaspa Hivermi Guatemala nacionpi kaq taksa llaqtachapi yachanku. Yomaram biblia estudiayta qallaykurqa Jehova Diospa testigonkunawan. Chaymantañataqmi turinkunapas estudiayta qallaykurqaku. Paykunaqa kimsankum qawaq ñawsachakuna kanku. Manataqmi braillepi utaq makillawan tupaspa leeytapas yachaqkuchu. Chaymi yachachiqnillan parrafokunatapas chaynataq bibliamanta textokunatapas leepuq.

Huñunakuna wasi yaqa huk hora carrowan riypi kasqanraykum sapallanku riytaqa mana atiqkuchu. Chayraykum iñiqmasinchikkuna tupachinakuspanku pusaqku. Puntamanta rimarimunanku kaptinqa iñiqmasinchikkunam yanapaqku ima rimanankuta umallamanta rimanankupaq.

2019 watapa mayo killanpim testigokuna paykunapa llaqtanpi huñunakuyta qallaykurqaku. Chay tiempopim casarasqa precursor regular iñiqmasinchikkuna chay llaqtachaman astakururqaku. Paykunam braillepi leeyta hinaspa qillqayta yachachiyta munarqaku mana yachaspankupas. Chaymi librota prestakaramuspanku yachayta qallaykurqaku chay qawaq ñawsachakunamanpas yachachinankupaq.

Yaqa iskay-kimsa killallapim Yomaraqa, Marceloqa hinaspa Hiverqa allintaña yacharurqaku makillankuwan tupaspanku leeyta. Chaymi astawan yanaparqa Diosta allinta servinankupaq. Kunanqa kimsankum precursor regular kanku. Marceloqa iñiqkunapi punta apaqkunapa yanapaqninmi kanpas. Kimsankum sapa semana Diospaq imatapas kusisqa ruwanku. Paykunata qawaspankum hukkunapas kallpanchasqa tarikunku.

Yomaraqa, Marceloqa hinaspa Hiverqa iñiqmasinkutam anchata agradecekunku paykunata yanapanankupaq tukuyta ruwasqankumanta. Yomaram nin: “Testigokunata riqsisqaykumantapacham paykunaqa kuyakuywan yanapaykuwarqaku”, nispa. Marcelopas ninmi: “Huñunakusqaykupi achka iñiqmasinchikkunawanmi allin amistad kaniku. Yachanikum enteron pachapi iñiqmasinchikkunawan huk sunqulla kasqanchikta”, nispa. Yomarawan turinkunam ancha kusikuywan suyachkanku kay allpa pachanchik huertaña kaptin sumaqllaña kasqanta qawaykuyta (Sal. 37:10, 11; Is. 35:5).