¿Imanasqataq Jehova Diospa testigonkunaqa mana sayapakunkuchu mayqan autoridadkunamanpas?
Jehova Diospa testigonkunaqa Diospi iñisqaykuraykum pimanpas mana sayapakunikuchu, chaytam bibliapi yachachiwanku. Manam pi autoridadtapas hikutanikuchu allinniykupaq imatapas ruwananpaqqa nitaq autoridkunata akllanapaqqa pipaqpas votanikuchu, manataqmi autoridad kaytaqa munanikuchu nitaq autoridadkuna qarquytapas munanikuchu. Bibliata estudiaspam yacharuniku imanasqa pi autoridadmanpas mana sayapakunaykumanta:
Jesucristotam qatipakuniku, payqa manam autoridad kaytaqa munarqachu runakuna maynataña hikutaptinkupas (Juan 6:15). Jesucristoqa nirqataqmi qatiqninkunapas ‘mana kay pachapaq kasqankuta’, chaymi kay pachapi autoridad kay munaqkunamanqa mana mayqanmanpas sayapakunikuchu (Juan 17:14, 16; 18:36; Marcos 12:13-17).
Tukuy sunqunchikwanmi sayapakunchik Diospa imayna kamachimuwasqanchikman, chaymanta rimaspanmi Jesucristoqa nirqa: “Diospa imayna kamachimuwananchikmanta kay allin noticiam willakusqa kanqa enterollan kay pachapi”, nispa (Mateo 24:14, NM). Dios kamachimuwananchikta munaspam may law nacionpipas autoridad kay munaqkunamanqa nitaq mayqan autoridadmanpas mana sayapakunchikchu. Astawanmi willakunanchik Diosña kamachiwananchikmanta (2 Corintios 5:20; Efesios 6:20).
Kayna mana pimanpas sayapakusqaykuraykum mana sasachakuspalla lliw runakunaman willaniku Dios kamachimunanmanta. Imayna rimasqaykuwan hinaspa imayna kawsasqaykuwanmi qawachiniku Diosña kamachimuptin tukuy ima sasachakuykunata allichananmanta (Salmo 56:11).
Pi autoridadmanpas utaq autoridad kay munaqkunamanpas sayapakuspaykuqa yanqacharuymankuchá enteron allpapi huk sunqulla Dios yupaychasqaykuta (Colosenses 3:14; 1 Pedro 2:17). Pimanpas chayna sayapakuq religionkunaqa rakinasqa hinam kachkanku (1 Corintios 1:10).
Autoridadkunataqa kasukunikum. Piman mana sayapakuspapas autoridadkunataqa kasukunikum. Chaytaqa ruwaniku Romanos 13:1 nisqanta kasukuspam, chaypim nin: “Lliwchaykichikyá kasukuychik hatun autoridadkunata”, nispa. Chaymi kamachikuyninkunata kasukuniku, impuestokunata paganiku hinaspa allinniykupaq imata niwaptinkuqa chaynata ruwaniku (1 Timoteo 2:1, 2).
Votacion apakunanpaqqa manataqmi harkakunikuchu nitaq autoridadta akllanankupaq tanteakuptinkupas.
¿Haykapimantam autoridadkunamanqa mana sayapakunikuchu? Punta pachak watamantaraqmi. Jesuspa qatiqninkunaqa manamá pimanpas sayapakurqakuchu. Huk qillqam kaymanta rimaspan nin: “Punta cristianokunaqa autoridadkunata kasukunanku kaptinpas, manam autoridadkunawanqa hukllawakurqakuchu”, nispa (Beyond Good Intentions—A Biblical View of Politics). Chaymantapas, ñawpaq tiempopi Orígenes sutiyuq runam qillqarqa: “Cristianokunaqa manam chaskinkuchu autoridad kananpaq niptinkuqa”, nispa.
¿Chayna kasqaykuqa sasachanmanchu autoridadkunata? Manam. Autoridadkunaqa manam manchakunankuchu, ñuqaykuqa hawkalla kawsakuq runakunam kaniku. Qawasun 2001 watapi Ucrania nacionpi Academia Nacional de Ciencias imakuna nisqanmanta. Autoridadkunawan mana hukllawakusqanchikmanta rimaspanmi nirqa: “Jehova Diospa testigonkunapa chayna kasqankuwanqa manam lliwchu kusisqa kanqaku. Chayraykum nazi tropakunaqa paykunata ñakarichispanku presocharurqaku”, nispa. Huk willakuypas nintaqmi, testigokunaqa “haykapipas kasukurqakum kamachikuykunataqa”, chaymantapas “mana qillapakuspam hinaspa mana imallapaqmi llamkarqaku” hinaspapas “manam haykapipas mana allinkunaqa ruwarqakuchu”. Chay willakuyqa kaynata nispam tukurqa: “[Jehova Diospa testigonkunaqa] manam qallarichinkuchu chaqwa ruwaytaqa nitaq nacionkunatapas rakinachinkuchu”, nispa.