Heather Broccard-Bell/iStock via Getty Images
¿KIKILLANMANTACHU RIKURIRURQA?
Akatanqa kaqlla urupa caparazonnin
Akatanqa kaqlla uruchaqa Norteamericapim kan intipa siqaykunan lawpi. Chay uruchataqa taksa carro hawanta pasaruspanpas manam imananmanchu, chaymi yachaysapa runakuna ninku kikinpa llasayninmantapas 39.000 kuti masta llasaqpas mana imanasqanta. ¿Imaynataq chayna llasaytaqa aguantan?
Chay uruchapa wasanpi caparazonninqa wiksanpi kaqwanmi piezan-piezan allin tupanachisqa kachkan. Huknin piezanmi mana doblakuy atiq, huknin piezanmi ichaqa doblakun. Kantaqmi huknin piezanpas, chay piezaqa astawan doblakuqraqmi. Chaynapim sachapa qaran ukukunaman yaykuyta atin utaq rumi kakllukunapipas pakakun.
Chaymantapas pasaq wasanpim qinqu-qinqu pieza rompecabeza hina sumaq tupanachisqa kachkan. Chayna tupanachisqa kasqanraykum enteron cuerpon ima llasaqtapas aguantan. Chay tupanakuq qinqu-qinquchakunapiqa pegamentom kachkan. Ima llasaqpas kaptinqa chay pegamentopa kasqanpim uchuy raqrachakuna rikurin, ichaqa chinkaqllam. Chay raqrachakuna rikurisqanraykum chay tupanakuq piezaqa ima llasaq kaptinpas mana chayllachu pakikurun.
Sapa piezachakunam rompecabezapa piezankuna hina allin tupanachisqa kachkan.
Puka flechachakunapa kasqanpim tupanakuchkan hawan kaq caparazonnin wiksanpi kaqwan. Uqi flechachapa kasqanpiñataqmi qinqu-qinqu pieza rompecabeza hina sumaq tupanachisqa kachkan.
Yachaysapa runakunam chay uruchapa caparazonninta qatipakuspanku ruwayta munanku carrokunata, chakakunata, hatu-hatun wasikunata utaq imatapas, chaynapi mana pakikuq kananpaq utaq ima chocaruptinpas mana imanakurunanpaq.
¿Ima ninkitaq? ¿Akatanqa kaqlla uruchapa caparazonninqa kikillanmantachu rikurirqa, icha unanchasqachu karqa?