¿Imaynatataq explicachwan qarimasillanwan utaq warmimasillanwan kakuqkunamanta bibliapa ima nisqanta?

RIMAMUSQANCHIKMAN hinaqa qarimasillanwan, warmimasillanwan utaq iskayninwan kakusqankumanta willakusqankuqa manam ancha riqsisqachu. Chayna kasqankumanta willakusqankutam wakin runakunaqa ‘allinmi’ ninku, wakinñataqmi ‘manam chayqa allinchu’ ninku. Wakinkuñataqmi ninku munaspankuqa chayna kanankumanta, chayna kayninkuqa mana imanasqanta. 21 watanpi kaq Danielmi nin: “Escuelallaypiraq kachkaptiymi mana chayna kaq warmakuna qaripuralla utaq warmipuralla kakuymanta paykuna hina mana piensaptikiqa paykunata chiqnisqaykita utaq paykunata mana allinta qawasqaykita niqku”, nispa.a

Chaykunamanta runakunapa piensasqankuqa manam chaynallachu tiempopa pasasqanman hina utaq ima nacionpi kawsakusqankuman hina. Chaywanpas Diosta serviqkunaqa manam ‘llulla yachachiqkunapa yachachisqanta uyarispachu wayrapa apasqan hina’ kanku (Efesios 4:14) Paykunaqa bibliapa nisqantam kasukunku.

Sichu bibliapa nisqanman hina kawsakusqaykirayku qarimasillanwan utaq warmimasillanwan kakuqkunata chiqnisqaykita utaq manchakusqaykita nisuptikiqa ¿ima niwaqtaq? ¿Ima nintaq bibliapi qarimasillanwan utaq warmimasillanwan kakuqkunamanta? Qatiqninpiyá chaykunamanta yachaykusun.

¿Ima nintaq bibliapi qarimasillanwan utaq warmimasillanwan kakuqkunamanta?

Bibliapim nin casarakuspalla qariwan warmi puñunankupaq Diosqa unanchasqanmanta (Genesis 1:27, 28; Levitico 18:22; Proverbios 5:18, 19) Bibliapim nin mana casarakuspa puñuyqa hucha kasqanta, chaynallataq qaripuralla utaq warmipuralla kakuypas hucha kasqantab (Galatas 5:19-21).

Sichu pipas tapusunkiman: “¿Ima ninkitaq qarimasillanwan utaq warmimasillanwan kakuqkunamanta?”, nispa.

Ichapas kaynata niwaq: “Qarimasillanwan, warmimasillanwan kakuqkunataqa manam ñuqaqa chiqninichu, ichaqa imayna kawsakusqankum hinaspa imapas ruwasqankum mana gustawanchu”, nispa.

✔ Kayta yuyariy: Bibliapa nisqanman hina kawsakunaykipaq tantiakusqaykimantaqa manam pipas imatapas nisunkimanchu, sapakamamiki imayna kawsakunapaqqa tantiakunchik (Josuey 24:15). Chayraykum mana pinqakunaykichu bibliapa nisqanman hina kawsakusqaykimantaqa (Salmos 119:46).

Diosta serviqkunaqa ¿respetankuchu runakunata imayna kawsakuptinkupas?

¡Awriki! Bibliapim nin: “Llapallan runakunata respetaychik”, nispa (1 Pedro 2:17). Chaymi Diosta serviqkunaqa mana chiqninkuchu warmimasillanwan, qarimasillanwan kakuqkunataqa, aswanqa lliwtam respetanku (Mateo 7:12).

Sichu pipas tapusunkiman: “Chaynata piensaspaykiqa, ¿manachu hukkunatapas umachachkanki qarimasillanwan, warmimasillanwan kakuqkunata chiqninankupaq?”, nispa.

Ichapas kaynata niwaq: “Manam chaynachu. Qarimasillanwan, warmimasillanwan kakuqkunataqa manam chiqninichu, ichaqa imayna kawsakusqankum hinaspa imapas ruwasqankum mana gustawanchu”.

✔ Kaynataraqmi niwaq: “Kaypi piensasun. Ñuqa kayman mana cigarro pitaq, millakuq. Qamñataq kawaq cigarro pitaq. Hinaspaqa manam ñuqa hinachu piensawaq ¿aw? Chaywanpas pitasqaykiraykuqa manam chiqnikimanchu, qampas manataqmi chiqniwankimanchu mana pitasqayraykuqa ¿aw? Chaynallataqmi qarimasillanwan, warmimasillanwan kakuqkunamantapas mana chaynallatachu piensanchik”, nispa.

Jesusqa yachachiwarqanchik mana chiqnikuq kanapaqmi, hinaptinqa ¿imaynanpitaq qaripuralla, warmipuralla kakuytaqa mana allinpaqchu hapinkichik?

Jesusqa qatiqninkunataqa manam nirqachu imayna kawsakuypas allin kasqantaqa. Aswanqa yachachirqa wiñaypaq kawsakunapaqqa ‘Jesuspi iñinapaqmi’ (Juan 3:16) Chaywanqa nichkarqa Diospa kamachikuyninman hina kawsakunamantam. Diosmi kamachiwanchik qaripuralla utaq warmipuralla kakuyqa hucha kasqanta chaynataq chayman rikchakuqta ruwaykunapas hucha kasqanta (Romanos 1:26, 27).

Sichu pipas nisunkiman: “Qarimasillanwan utaq warmimasillanwan kakuqkunaqa hina chaynañam nacerqaku, chaymi mana cambianmankuchu”, nispa.

Ichapas kaynata niwaq: “Bibliapiqa manam niwanchikchu qarimasillanwan utaq warmimasillanwan kakuqkuna hina chaynaña nacesqankutaqa. Ichaqa ninmi runakunaqa ima munapayaqpas kanankumanta (2 Corintios 10:4, 5) Wakinkuqa qarimasillankuwan utaq warmimasillankuwanmi kayta munanmanku, chaymi bibliapiqa niwanchik Diosta serviqkunaqa chaywan mana aysachikunapaq”, nispa.

✔ Kaynatapas niwaqmi: Qaripuralla utaq warmipuralla kakuy imayna rikurisqanmanta liryanaykichikmantaqa niwaqmi chay ruwayqa bibliapa nisqanman hinaqa hucha kasqanta. Ichapas kaywan rikchanachiwaq: “Achkaqmi ninku maqakuqllaña runaqa ayllun chayna kasqanrayku paypas chayna kasqanta (Proverbios 29:22) Chayna nisqanku cierto kaptinqa yanqapaqchiki bibliapi ‘amayá llumpaytaqa piñakuychu’ nisqanqa kanman (Salmos 37:8; Efesios 4:31). Chaynaqa ¿nichwanchu ayllun maqakuq kasqanrayku paypas maqakuq kasqanmanta bibliapa ima nisqanqa mana allin kasqanta?”, nispa.

¿Imaynamá Diosqa ‘hucham’ ninman qaripuralla utaq warmipuralla kakuytaqa? Chayqariki manam allinchu.

Chaynataqa piensanku munasqankuman hina kawsakuyta munaspankum. Bibliapiqa niwanchikmi manaraq casarakuchkaspa warmiwan utaq qariwan puñuy munapayayta controlakuy atinanchikmanta (Colosenses 3:5).

Sichu pipas nisunkiman: “Allinmi qarimasillaykiwan utaq warmimasillaykiwan kay mana munasqaykiqa, ichaqa manam piensanaykichu chayna kay mana allin kasqantaqa”, nispa.

Ichapas kaynata niwaq: “Sichu ñuqata mana gustawanmanchu qullqipaq pukllay, qamtañataq gustasunkiman. Hinaptinqa ¿achka runakuna qullqipaq pukllasqankuraykullachu hikutawankiman ñuqapas qullqipaq pukllanaypaq?”, nispa.

✔ Kayta yuyariy: Runakunaqa imaynaña kawsakuspankupas manam allinpaqchu qawanku engañakuyta, mana allin ruwaykunata nitaq guerratapas. Bibliapas chaykunataqa mana allinpaqmi hapin, mana allinpaqtaqmi hapin qaripuralla utaq warmipuralla kaytapas chaynataq chayman rikchakuq kaqkunata ruwaytapas (1 Corintios 6:9-11).

Arí, bibliapiqa manam imapas allin kachkaptinchu mana allinpaq hapin nitaq chayna kawsakuqkunata chiqninapaqchu umachawanchik. Aswanqa bibliapiqa ninmi qarimasillanwan utaq warmimasillanwan kakuqkunata ‘huchapakuyta saqinankupaq’ (1 Corintios 6:18).

Mana chayna kaq achka runakunam bibliapa nisqanta kasukuyta munasqankurayku controlakuspanku ima huchapakuymanpas mana wichiykunkuchu. Wakinqa qariwan utaq warmiwan mana kaspankupas kusisqam kawsakunku. Paykunamanta wakinmi mana casarasqa kaqkuna chaynataq qusanta utaq warminta imapas pasarusqanrayku paywan kayta manaña atiqkuna. Chaynallataqmi qarimasillanwan utaq warmimasillanwan kay munaqkunapas Diospa munasqanman hina kawsakuyta munaspankuqa controlakuyta atinmanku, hinaspaqa kusisqam kawsakunqaku (Deuteronomio 30:19).