¿Imaynatam mozo-sipasyaq warmaykita allinta controlawaq?

SASACHAKUY

Mozo-sipasyaq warmaykim piensan llumpay controlakuqllaña kasqaykita. Qamñataqmi taytan kasqaykirayku ninki: “Mana llumpayta controlaptiyqa sasachakuypim tarikunqa”, nispa.

Allinmi warmaykikunata allin tanteowan controlaynikiqa, ichaqa puntatam yachanayki imanasqa warmayki piñakusqanta.

¿IMANASQATAQ PASAN?

Yanqa nisqanku: Mozo-sipasyasqankupiqa llapan warmakunam mana kasukuqllaña kanku.

Cheqap kaq: Warmankuta imayna controlanankupaq tanteasqanta Tayta-mamakuna willaptinkuqa, paykunaqa kasukunqakum.

Mozo-sipasyaqkuna mana kasukuq kanankupaqqa imañapas sasachanmanmi, wakinpiqa kikin tayta-mamakunapas huchayoqmi kanmanku, nisqankuman hinalla ruwanankupaq kamachispanku otaq warmachata hina kamachispankupas. Qawasun kaykunamanta.

• Nisqankuman hina kananpaq. Tayta-mamakuna kamachikuqllaña kaptinkuqa hinaspa warmankuwan mana parlariytapas munaptinkuqa, tayta-mamanku llumpay controlasqantam piensanmanku, manam waqaychasqantachu. Chaynapim mozo-sipasyaqkunaqa pakallapi mana allinkunatapas ruwanmanku.

• Warmachata hina kamachiptinku. Warmachataqa yaqapaschá niwaq: “¡Ñoqam nini!”, nispalla. Mozo-sipasyaqkunam ichaqa yachayta munanku imanasqa chayna nisqaykita. Yuyayniyoqña kaspankuqa yaqapaschá sapallankuña yachanqaku hinaspa imatapas allinta tanteananku kanqa. Chaymi ancha allin qamkunawanraq kachkaspa allin tanteayta hinaspa yuyayniyoq kayta yachayninqa.

¿Imatataq ruwawaq kamachisqaykikunawan warmayki sapa kuti piñakuq hina kaptinqa?

¿IMATAM RUWAWAQ?

Puntatam entiendenayki warmaykikunaqa controlana necesitasqanta. Chaymi warmaykita controlanapaq ima ruwanaykipi tanteanayki hinaspam paytapas entiendechinayki. Huk librom nin: “Mozo-sipasyaqkuna tayta-mamankupa controlasqanta yachaspankuqa, manapasmi mana allinkunataqa ruwanqakuchu”, nispa (Letting Go With Love and Confidence). Munasqanta ruwananpaq saqeq tayta-mamakunam ichaqa qawachinku paykunamanta mana nanachikusqanta. Chaynapim paykunaqa mana kasukuqllaña kanku. (Imatam Biblia yachachin: Proverbios 29:15.)

Chaynaqa, ¿imatam ruwawaq? Familiapi kamachikuy tanteasqaykimanta warmayki ima piensasqanta rimarinanpaq saqey. Imapipas tumpatawan unamunanpaq nisuptikiqa uyariy imanasqa unamuy munasqanta. Allinta uyarisqam mozo-sipaskunaqa kasukunku mana gustonpaq hina kaptinpas. (Imatam Biblia yachachin: Santiago 1:19.)

Ichaqa manaraq imatapas tanteachkaspa kayta yuyariy: wakin mozo-sipasyaqkunaqa astawan libre kaytam munanku, wakin tayta-mamakunañataqmi llumpayta controlanku. Chaynapiqa warmayki ima mañasusqaykita uyariykuy hinaspa piensay. ¿Ima ruwayninkunatapas cumplinchu? ¿Allinninpaqchu mañakusqanqa? Necesitasqanman hina mañakusqanta qoy. (Imatam Biblia yachachin: Genesis 19:17-22.)

Warmayki imayna sientekusqanpi reparaspapas, willay imakuna llakichisusqaykita. Chayta ruwaspaykim yachachinki mana kikillankupi piensananpaq, chaynapi hukkunapipas piensananpaq. (Imatam Biblia yachachin: 1 Corintios 10:24.)

Chaymantañataq, imata ruwanaykipaq tanteay hinaspa willay imanasqa chayta ruwasqaykimanta. Mana gustonpaq kaptinpas, tayta-maman uyariq kasqanmantaqa yaqapaschá agradecekunqa. Amataq qonqaychu mozo-sipasyaq warmayki yuyayniyoqña kanankumantapas. Allinta tanteaspa kamachiptikiqa hinaspa warmaykiman willaptikiqa yanapanqam yuyayniyoqña kaptinpas. (Imatam Biblia yachachin: Proverbios 22:6.)