¿Imaynatam mana sientechispalla rimana?

SASACHAKUY

¿Sapa kutichu sasachakuy kaptin señoraykiwan otaq qosaykiwan kaminakunkichik? Chayna kaptinqa, sapa punchaw nanay simiwan rimanakuyqa manañachá hukmanchu qamkunapaqqa.

Atiwaqmi casado vidaykipi allinyaytaqa, ichaqa puntatam yachanayki imanasqa chay sasachakuy qallarisqanmanta hinaspam iskaynikichik piensanaykichik cambiayqa allinnikichikpaq kasqanta.

¿IMANASQATAQ PASAN?

Imayna uywasqa kasqanku. Achka runakunam wiñarqaku sapa punchaw kaminakuq familiapi, chaymi casarakuspankupas tayta-mamankupa kaminakusqankuta qatipakunku.

Kusirikusqanku. Cinepiwan televisionpim nanay simiwan rimaytaqa asikunapaq hinata qawachinku, chaymi qawaqkunaqa piensanku chay ruwayqa allin kasqanta.

Maymanta kasqanku. Wakin llaqtakunapim, “allin qari” kanapaqqa kamachikuqllañam kana ninku, ninkutaqmi warmikunapas qarinchakuq kasqankuta qawachinapaqqa pitapas maqachkaq hina imatapas ruwanankumanta. Chayna runakunaqa señoranwan otaq qosanwan liryanakuspam enemigonta hina hukninta qawanman hinaspam imatapas ninman sientechinakunankupaq hina.

Imanasqaña nanay simiwan rimanakuptinkupas, chayqa rakinarachinmanmi otaq onqorachinmanmi. Wakinkum ninku nanay simiwan rimayqa maqaymantapas astawan nanasqanta. Qosanwan qaqchachikuq hinaspa maqachikuq warmim kaynata nin: “Kamiwasqanmi astawanqa nanawaq maqawasqanmantaqa”, nispa.

¿Imatam ruwawaq kayna sasachakuywan casado vidayki mana allinña kaptinqa?

¿IMATAM RUWAWAQ?

Señoraykipa otaq qosaykipa imayna sientekusqanpi piensay. Rimasqaykiwan imayna sientekusqanpi yuyaymanay, kallpanchakuy haykapipas sientechisqaykita yuyarinaykipaq. Ichaqa ama reparaychu ima nisqaykipi otaq mana nisqaykipiqa, astawanqa reparay señorayki otaq qosayki imayna sientekusqanpi. ¿Imaynatam sumaqllata niwaq karqa? Bibliam nin: “Allin simillawan contestaq runaqa runamasinpa piñakusqantam tanichin. Nanay simiwan contestaq runam ichaqa astawanraq runamasinta piñachin”, nispa (Proverbios 15:1).

Casado vidapi allin kawsakuqkunata qatipakuy. Hukkunapa mana allin rimasqankuman hina rimaspaykiqa, casado vidankupi allin kawsaqkunapa imayna rimasqankuta qatipakuy. (Imatam Biblia yachachin: Filipenses 3:17.)

Ama qonqaychikchu qallariypi imayna kasqaykichikta. Nanay simiwan rimayqa manam simimantachu, aswanqa sonqomantam lloqsin. Chaymi allin kanman señoraykimanta otaq qosaykimanta allin kaqllata piensayqa hinaspa sienteypas. Rimaychik imakunata kuska ruwasqaykichikmanta. Qawaychik chayllaraq casarakusqaykichik watapi fotokunata. Yuyariychiktaq imakuna kusichisusqaykichikmanta hinaspa imayna kaynikichik sapakamata gustasusqaykichikmantapas. (Imatam Biblia yachachin: Lucas 6:45.)

Kikikimanta rimay. Señoraykita otaq qosaykita imamantapas tumpanaykimantaqa, imayna sientekusqaykimanta willay. Sichu ninki: “Qamqa sapa kutim mana imatapas niwaspayki tanteanki”, nispa. Hinaptinqa manapaschá allintachu contestasunki. Ichaqa, “Hukmanmi sientekuni mana tapuwaspa imatapas tanteasqaykimanta”, nispa niptikiqa yaqapaschá allinta contestasunki. (Imatam Biblia yachachin: Colosenses 4:6.)

Controlakuyta yachay. Rimasqaykichikpi mana controlakuyta atispaykichikqa otaq piñakuyta qallaykuspaykichikqa, allinmi kanman huk kutipiña rimanaykichikpaq saqeyqa. Allintaqmi piñakuy pasanankama asurikuypas. (Imatam Biblia yachachin: Proverbios 17:14.)