¿Creenanchikchu hukllapi kimsa dioskuna kasqanta?
Iskay waranqa millon runakunam Jesucristopi iñinku. Yaqa llapankum kanku, hukllapi kimsa dioskuna kasqanta yachachiq religionpi, chay yachachikuypim ninku Dios tayta, churin hinaspa chuya espiritu huk Dioslla kasqankuta. ¿Imaynatam, hukllapi kimsa dioskunamanta yachachikuyqa allinpaq hapisqa rikurirurqa? Ichaqa, ¿yachachinchu Biblia chaymanta?
PUNTA pachak watapim Biblia ruwayta tukurqaku. Hukllapi kimsa dioskuna kasqanmanta yachachikuyñataqmi yaqa iskay pachak wata pasayta 325 watapi qallaykurqa huk huñunakuypi, chayqa karqa Asia Menor lawpi Nicea llaqtapim (kunanñataq Turquía nacionpi Iznik). Huk libropa nisqanman hinam Nicea llaqtapi kay yachachikuyqa rikurirurqa cristiano tukuqkunapaq, chaypitaqmi pim Dios hinaspa pim Cristo kasqanta tantearurqaku (New Catholic Encyclopedia). Ichaqa, ¿imanasqataq tanteananku karqa pim Dios hinaspa pim Cristo kasqanmanta, pachak watakunaña Biblia ruwayta tukuruptinkuqa? ¿Manachu Bibliaqa chaymanta clarota willakurqaña?
¿JESUSQA DIOSCHU?
Roma nacionta Constantino kamachiyta qallaykuptinmi, cristiano tukuqkuna mana acuerdoman chayarqakuchu pim Dios hinaspa pim Cristo kasqanmanta. ¿Jesusqa Diospa unanchasqanchu karqa icha kikin Dioschu karqa? Kay tapukuyta allichananpaqmi, Constantinoqa religionpi punta apaqkunata huñurqa Nicea llaqtapi, ichaqa manam kaymanta yachayta munaspanchu, aswanqa kamachisqan nacionta religionkuna mana rakinachinanpaqmi.
“Ñoqanchikpaqa chullallam Diosninchikqa, payqariki Dios Taytam” (1 Corintios 8:6).
Constantinom chay obispokunata nirqa huk acuerdollaman chayanankupaq, ichaqa manam atikurqachu. Hinaptinmi mana entiendenapaq hina yachachikuyta nirqa: Jesusqa Taytanwan hina kaqllam, nispa (consustancial, griego rimaypi homoóusios). Griego rimaypi runakunapa kayna yachachisqan Bibliawan mana tupachkaptinpas, kaywanmi qallaykurqa hukllapi kimsa dioskuna kasqanmanta yachachikuyqa. Yaqa 400 watapiñam hukllapi kimsa dioskuna kasqanqa kunan yachachisqankuman hina rikurirurqa, chaypim nirqaku chuya espiritupas Dios kasqanta.
¿IMANASQATAQ KAYMANTA YACHANAYKI?
Jesusmi nirqa: “Cheqap yupaychaqkunaqa Dios Taytatam cheqap[wan] yupaychanqaku”, nispa (Juan 4:23). Kay cheqapqa Bibliapim tarikun (Juan 17:17). ¿Yachachinchu Bibliaqa Dios Tayta, Churin hinaspa chuya espiritu huklla kasqankuta?
Hukllapi kimsa dioskuna kasqanmanta yachachikuyqa manam Bibliapiqa rikurinchu. Jesusqa manataqmi nirqachu Diosmi kani nispanqa. Aswanmi payqa Diosta yupaycharqa (Lucas 22:41-44). Kaymi sutillata qawakun qatiqninkunawan Jesus imayna kasqanwan. Wañusqanmanta kawsariramuspanmi qatiqninkunata nirqa ‘wawqeykuna’ nispa (Mateo 28:10). ¿Paykunaqa kanmankuchu karqa Tukuy atiyniyoq Diospa wawqenkuna? Manamá. Aswanmi paykunaqa Cristopi iñisqankurayku Diospa churin kayta atirqaku. Bibliapi wakin textokunata tupachisun Nicea llaqtapi rikurichisqanku yachachikuywan.
Nicea llaqtapi yachachikuypa nisqan:
“Iñinikuqa [...] huk Señorllapim, payqa Diospa Churin Jesucristom, [...] payqa taytan hinam rikurirqa, Diospa Diosnin, achkipa achkin, cheqap Diospa cheqap Diosnin.”
¿Imatam Biblia nin?
“[Taytayqa] ñoqamantaqa aswan atiyniyoqmi.” (Juan 14:28)a
“Richkanim Taytaypata, qamkunapapas Taytaykichikpata, ñoqapa Diosniyman, qamkunapapas Diosnikichikman.” (Juan 20:17)
“Ñoqanchikpaqa chullallam Diosninchikqa, payqariki Dios Taytam.” (1 Corintios 8:6)
“Dios Taytatayá alabasunchik. Señorninchik Jesucristopa Taytan[ta].” (1 Pedro 1:3)
‘Diospa unanchasqan kamachiq [Jesusmi] nin kaynata.’ (Apocalipsis 3:14)b
a Waqtanpa kaqqa ñoqaykupam.
b Bibliata estudianapaq ¿Imatapunim Bibliaqa yachachin? niq libropim kayna yachachikuykuna tarikun: “¿Imataq Diosmanta cheqap kaq?” hinaspa “¿Pitaq Jesucristoqa?”, niqkuna. Kay librotaqa mañakuwaqmi Jehova Diospa testigonkunamanta otaq Internetpi leey www.jw.org/quy nisqapi.