IMAKUNA PASAKUSQANMANTA

Allpantinpi

Organización Mundial de la Salud (OMS) nisqanku institucionmi willakun warmikunata maqasqanku otaq ñakarichisqanku “onqoy hinaña allpantinpi llumpay kasqanmanta”. Chay institucionqa nintaqmi “sapa pachak warmikunamanta yaqa 40 warmikuna qosanpa maqasqanwan otaq pipa imanasqanwanpas ñakarichisqa kanankumanta. Qosanku maqaptinmi sapa pachakmanta 30 warmikuna enteron Pachapi ñakariypi tarikunku”.

Gran Bretaña

64.303 runakunata tapuptinkum yaqa 40.000 nirqaku “tukuy mana allin ruwaykunawan religion ñakarichisqanmanta”. Inglaterrapi hinaspa Galespi censota ruwaptinkum 2001 watapiqa pachakmanta yaqa 72 nirqaku cristiano kasqankuta. 2011 watapiñataq pachakmanta yaqa 60 nirqaku cristiano kasqankuta. Astawanmi yapakuchkan religionpi mana kay munaqkunaqa, 2001 watapim pachakmanta yaqa 15 nirqaku mayqen religionmanpas mana risqankuta, 2011 watapaqñataq pachakmanta yaqa 25 nirqaku mayqen religionmanpas mana risqankuta.

China

Tukuy noticiakunapim willakurunku yuyaqña tayta-mamankuman wawa-churinkuna watukunankupaq hinaspa imapipas yanapanankupaq huk leyta allichasqankumanta. Ichaqa chay kamachikuyta mana wawa-churinkuna kasukuptinkuqa “manam ninchu imawan multanankupaq kasqanmantaqa chay leypiqa”.

Europa

Mana allin runakunam tukuyta falsificachkanku, warmikunapa allichakunankupaq kaqkunata, pacha taqsanapaq jabonkunata hinaspa mikunapaq kaqkunatapas. Empresakunata consejaq huk runam nin: “Imapas valorniyoq kaptinqa chayllam falsificarunku”, nispa. Huk runapas willakunmi imatapas ruwasqata otaq fabricasqata rantikuq nacionkunapiqa mikunapaq kaqkunatam sapa pachakmanta chunkata falsificanku nispa.