Mañakuymanta Mañakuymanta

¿Diosqa uyarinmanchu mañakusqanchikta?

“Qamqa pipapas mañakusqanta uyariykuqmi kanki. Llapallan runakunam qanmanqa asuykamusunki.” (Salmo 65:2)

¿IMATAM RUNAKUNA NINKU?

Wakinqa piensanku “Diosta mañakusqankuqa wasipa techonkamallam chayan”. Chaymi imawanpas ñakariqpa mañakusqantaqa mana pipas uyarisqanta piensanku.

¿IMATAM BIBLIA NIN?

“[Diosqa] cuidachkanmi allin ruraq runakunataqa. [Diosqa] uyarinmi mañakusqankutaqa. Payqa mana allin ruraqkunapa contranpim kachkan”, nispa (1 Pedro 3:12). Chaywanmi cuentata qokunchik mañakusqanchikta Jehova Dios uyarisqanmanta, astawanraqmi kamachisqanta kasukuqninkunapataqa. Bibliaqa achka kutipim willawanchik mañakusqanchikta Dios uyariy munasqanmanta, ninmi: “Diospi confiakuspam yachanchik: paypa munasqanman hina mañakuptinchikqa uyariwanchikmi”, nispa (1 Juan 5:14). Kay textopa nisqanman hinam, Diosta mañakuspaqa paypa agradonpaq kaqkunata mañakunanchik.

¿Imaynatam Diosman asuykuchwan?

‘Mañakuspaykiqa amam [. . .] hina nisqallaykitachu kuti-kutirispa rimanki.’ (Mateo 6:7)

¿IMATAM RUNAKUNA NINKU?

Yachachinkum catolica, budismo, hinduismo hinaspa islam nisqanku religionkunapiqa hayka kuti mañakusqankuta rosario kaqlla wallqapi yupanankupaq.

¿IMATAM BIBLIA NIN?

Diostaqa mañakunanchik tukuy sonqonchikwanmi, manam umallanchikmantachu nitaq hina kaqllatachu sapa kuti rimananchik. Bibliam niwanchik: “Mañakuspaykiqa amam Diosta mana adoraq runakuna hinachu hina nisqallaykita kuti-kutirispa rimanki, paykunaqa piensankum llumpayta rimasqankurayku uyarisqa kanankuta. Chaynaqa amayá paykuna hinaqa kaychikchu, Taytaykichik Diosqa imam necesitasqaykichiktaqa yachanñam manaraqpas mañakuchkaptikichik”, nispa (Mateo 6:7, 8, NM).

¿IMANASQAM CHAYMANTA YACHAYNINCHIKQA ANCHA ALLIN?

Pipas Diospa mana agradonpaq mañakuspaqa tiempontam usuchichkan, chaymantapas Diospa umantapas nanachinmanmi. Bibliam willakun payta mana kasukuqkunapa mañakusqankuta Dios mana uyarisqanta (Proverbios 28:9).

¿Pitataq mañakunanchik?

“Tarinaykichikpaq kachkaptillanraqyá Tayta Diosta maskaychik. Hichpaykichikpi kachkaptillanraqyá Tayta Diosta qayakuychik.” (Isaias 55:6)

¿IMATAM RUNAKUNA NINKU?

Achka runakunam mañakunku virgen Mariata, angelkunata otaq santokunata. Hukkaqnin santom Antonio de Padua, paytam mañakunku kawsanankupaq imapas necesitasqankuta, wakinñataqmi imankupas chinkaruptinqa Judas Tadeo nisqanku santota mañakunku. Chaynataqa ruwanku mañakusqankuta Diosman santokuna willasqankuta piensaspankum.

¿IMATAM BIBLIA NIN?

Cristianokunaqa hanaq pachapi Taytanchik Jehova Diostam mañakunanchik (Mateo 6:9). Bibliam nin: “Amayá imamantapas afanakuychikchu, aswanqa orakuspaykichikyá lliwta Diosman willaychik hinaspayá payman graciasta qoychik”, nispa (Filipenses 4:6).