¿Tukuy imayoq kaspachu allin vidapi tarikuchwan?

TUKUY imayoq kanapaq kay vidapi afanakuyqa yanqapaqmi kanman. Honrado kasqanchikrayku fracasasqanchikqa yachachiwanchikmi yapapiqa allinta tanteaspa imatapas ruwanapaq.

Allin vidapi tarikuyta munaspam runaqa tukuypi afanakunku, ichaqa hatun sasachakuypi tarikuspañam cuentata qokunku chay afanakusqankuqa yanqapaq kasqanmanta.

Kaypi piensarisun, huk kutipim Jesucristo kaynata tapurqa: “Runaqa ¿imatataq [tarinman] lliw kay pachapi kaqkunata ganaruspan vidantañataq pierderuspaqa?”, nispa (Mateo 16:26). Chayqa piensachiwanchikmi tukuy tiemponwan llamkaspa kapuqniyoq kasqanwan allin sientikuq runapi, chayna piensaqqa kikillanmi engañakun. Huk runam nin: “Pipas reqsisqa kayta munaspan qollqe maskayllamanña otaq imapas rantiyllamanña qokuruqqa manam Diosmanta yachananpaqqa tiempochakunchu. Qollqeyoq kasqanwan allin vidapi kasqanta piensaq runaqa manam cheqap kusikuyniyoqchu tarikun”, nispa (Tom Denham).

Chay runapa nisqanman hinam achka runakuna piensanku. Vidankupi kusisqa kanankupaq ima necesitasqankumanta Estados Unidospi tapuptinkum imamantapas puntataqa nirqaku saludniyoq kay munasqankumanta, runamasinwan allinlla kawsakuy munasqankumanta, imapas ruway munasqankupi llamkay munasqankumanta, ichaqa qollqewan kusikuyta tarinankupaq piensaqkunaqa iskay kimsallam karqaku.

Yaqa lliwmi cuentata qokunchik vidanchikpi imataq allinninchikpaq otaq mana allinninchikpaq kasqanmanta. Ichaqa imapaq tanteakuyninchikpim wakinpiqa pantachwan.