Imaynatam yachachiwaq kasukuq kanankupaq

IMAM SASACHASUNKI

Kamachiptikim warmayki mana kasusunkichu, chaymi mana rabianaykirayku warmayki ruwananmantaqa kikikiña ruwanki.

• Imatapas ruwananpaq kamachiptikim uqu nispa kasusunkichu, chunkay-chunkayta niptikipas qalaypaqmi mana kasusunkichu.

• Imatapas mañasusqaykita mana quykuptikiqa qaparkachaytam qallaykun.

¿Warmachallaraq kasqanraykuchu chayna kanku? ¿Wiñaspanqa cambianqachu?

Correginaykipaqqa manam wiñanantaraqchu suyanayki. Kasukunanpaqqa yachachinam. Ichaqa manaraq corregichkaspaykim puntataraq yachanayki imanasqa mana kasukuq kasqanmanta.

IMATAM YACHANAYKI

Wawachayki naceruptinqa payllapaqmi tukuy imata ruwarqanki. Imay horapas payllapaqñam tiempochakurqanki, waqayta qallaykuptinpas chayllam atiendeq kanki. Kuyakuq tayta-mamaqa chaynatam ruwanan. Uña wawaqa imay horapas atiendenapaqmi.

Chayna atiendesqa kasqanwanmi warmaqa piensan tayta-mamanqa paypa munasqata ruwananpaq kasqankuta. Ichaqa iskay watankupim cuentata qukunku mana chayna kasqanmanta. Tayta-mamaqa manañam paykunapa munasqanman hinañachu ruwanku. Chaymantapas paytam kamachiyta qallaykunku. Chaywanmi warmachakunaqa iskayrayayta qallaykunku. Chaymi wakin warmachakunaqa tayta-maman munasqanta mana ruwaptinqa qaparkachayta qallaykunku, wakinñataq mana kasukunkuchu.

Warmachanku chayna tarikusqanraykum tayta-mamaqa yachachinanku wasipiqa pim kamachiq kasqanmanta. Ichaqa kay yachachikuypa qallariyninpi qawamusqanchikman hina mana kasukuptinqa, ¿Imatam ruwanmanku? Qatiqninpiyá qawasun imayna yachachinankumanta.

IMATAM RUWAWAQ

Yachachiy pim kamachiq kasqanta. Wawa-churiqa manam kasukunqakuchu tayta-mama kamachiqnin kasqanta mana yachaspankuqa. Kuyakuywan hinaspa ama qaqchaspa yachachiy. Pasaq watakunapim yachaysapa runakuna nirqaku warmachakunaman pitaq kamachiqnin kasqanmanta yachachiyqa mana allinninpaq kasqanmanta. Wakinqa nirqakuraqmi warmachakunaman kasukunankupaq yachachiyqa llumpay mana allin kasqanmanta. Tayta-maman mana kasukuq warmachakunaqa yuyayniyuq kaspankum sasachakuypi tarikunku. Chaymantapas paykunaqa munasqanman hinam imatapas ruwayta qallaykunmanku. (Bibliapa yachachisqan: Proverbios 29:15).

Warmaykita corregiy. Corregiy imayna kasqanmantam huk qillqapi kaynata qillqarqaku “kamachikuykunata quspa kasukuq kananpaq yachachiymi, mana kasukuptinqa asutispa yachachiymi”. Corregiy chayna kaptinpas sumaqllatam corregina, manam piñakuspaqa maqaparunachu. Imayna portakusqanman hina mana corregisqaqa manataqmi allinchu qispinqa. (Bibliapa yachachisqan: Proverbios 23:13).

Ama iskayrayaspa kamachiy. Wakin tayta-mamaqa wawa-churinkutam kamachinku ruegachkaq hina. “Ama hina kaspa icha wasinchikta picharuwaq”, nispa. Chaynataqa kamachiwaq ichapas respetowan rimasqaykita piensaspa. Chaynata rimaspa kamachiyqa manam kasukuq kanankupaqqa yanapanchu. Kasukuq kayta yachachinaykipaqqa manam saqinaykichu kasusunaykipaq kikin tanteanantaqa. (Bibliapa yachachisqan: 1 Corintios 14:9).

Rimasqaykiman hina ruway. Warmaykiman, manam nispaykiqa chayman hina ruway, warmi-qaritaq rimanakuychik kamachisqaykichik huklla kananpaq. Mana kasukuptikiqa munasqaykitam mana qusqaykichu utaq asutisqaykim nispaykiqa cumpliy. Correginayki kaptinqa ama iskayrayaychu amataq niyñachu imanasqa corregisqaykimantaqa. Chaynata yachachisqaykiqa, kikikipaqpas chaynataq paykunapaqpas allinninpaqmi kanqa. “Arí nisqaykichikqa arí nisqa kachun, manam nisqaykichikpas manam nisqa kachun”. (Bibliapa yachachisqan: Santiago 5:12).

Kuyasqaykita qawachiy. Warmakunaqa manam tanteanankuchu imayna kamachisqa kanankupaqqa, manataqmi tayta-mamapas kikinkupa munasqankuman hinallaqa kamachinankuchu. Diosmi familiata qallarichirqa wawa-churikunata allinta uywanankupaq. Corregiyqa allin runa kanankupaqmi yanapan. Warmaykikunata kuyakuyllawan corregispaqa yanapankim kasukuq hinaspa kusisqa kanankupaq.