QARANPI KAQ YACHACHIKUY | ACHKA RUNAKUNAM LLAKISQA TARIKUNKU ¿IMAKUNAWAN?
Sasachakuy: Achka ruwaykuna kaptin
IMAPAS qam ruwanaykitam suyanku warmaykipas qusaykipas utaq warmikipas chaynataq patronnikipas. Chaymantapas tayta-mamaykim yanapanayki kachkan. Chayna tarikuytaqa manachá haykapipas piensarqankichu. Ichapas samarinaykipaqqa tiempoyki manaña kanchu. Chayna tarikuspaqa piensankipaschá: “¿Imaynatataq haypakusaq llapankuta yanapanaypaq?”, nispa. Hukkunata yanapaspapas kikikipaqmi tiempochakunayki. Chaynaqa, ¿imatam ruwawaq hawkalla kanaykipaq?
YACHASUN MOISESMANTA
Moisesmi Israel runakunapa quejakusqankuta allichaypi afanakurqa, ichapas payqa piensarqa paylla chayta ruwananpaq kasqanpi. Ichaqa suegronmi nirqa: ‘Manam allinchu chay ruwasqaykiqa. Qamqa anchatam pisiparunki’, nispa. Chaymantapas nirqam yanapachikunanpaq allin yuyayniyuq runakunata akllananpaq, chaynapi paykunaña runakunapa quejankuta allichanankupaq, Moisesñataq sasa kaqkunallataña allichananpaq. Chaynata ruwaptinqa Moisespas chaynataq atiendesqan runakunapas hawkalla tarikunankupaq (Exodo 18:17-23).
DELINA IMA RUWASQANMANTA
¿Yuyachkankichu Delinata? Payqa distonía muscular nisqanku unquywanmi unqun. Chaymantapas unquq kimsa turinkunatam cuidan. Paymi nin: “Ima ruwayniytapas sapa punchawmi ruwani, chayna ruwasqaymi hawkalla kanaypaq yanapawan. Qusaymanmi willakuni imayna sientekusqaymanta chaymi pay yanapawan. Chaymantapas tiempochakunim waytachaykunata allichanaypaq, chayqa kusichiwanmi”.
Tukuytam ruwana tiempollanpi. (Eclesiastes 3:1)
¿IMATAM RUWAWAQ?
Ruwasqaykikunapi mana haypakuspaqa kaykunatam ruwawaq:
Yanapachikuy. ¿Yanapasunkimanchu warmaykikuna wasipi ima ruwaywanpas? ¿Yanapaykusunkimanchu hichpaykipi yachaq aylluyki utaq amistadniki?
Ama pinqakuspa rimay. Patronnikitam niwaq lliw nisusqayki mana ruway atisqaykimanta. Sumaqllata niy, ama piensachiychu mana llamkay munasqaykitaqa, aswanqa atisqaykiman hina ruway munasqaykita. Ichapas chaynata niptikiqa atisqaykiman hinalla llamkanaykipaq nisunkiman.
Listapi qillqay ruwanaykipaq kaqkunata sapa semana. ¿Qamllachu tukuyta ruwanayki icha pipas yanapaykusunkimanchu?
Maymanpas rinaykichikpaq utaq imatapas ruwanaykichikpaq pipas nisuptikiqa ama riychu pisipasqa kaspaqa utaq tiempoyki mana kaptinqa, sumaqllata niy mana atisqaykimanta.
¿Imatam yacharunchik? Tukuyta ruwanapaq sapallanchik kallpanchakuspaqa manam ima ruwaytapas atisunchu.