QARANPI KAQ YACHACHIKUY
¿Imaynatam achka rimaykunapi qillqakunata ruwanku?
“Wakinpim ninku huk rimayman qillqakunata ruwayqa ima llamkaymantapas sasa kasqanta” (The Cambridge Encyclopedia of Language).
JEHOVA DIOSPA testigonkunaqa yachachikuykunata qillqanankupaqqa, puntatam allintapuni tanteanku hinaspa estudianku. Chayna ruwasqa kananpaqmi, Estados Unidospi Yachachikuykunata qillqaqkunamanta cuentallikuq testigokuna, chay yachachikuykunata allinta qatipanku imam kaq kananpaq hinaspa allin qillqasqa kananpaqpas.a Chayñam huk rimaykunapiqa ruwayta qallarinku.
Estados Unidosmantam apachinku tukuy hinastinpi rimayninkupiña qillqaqkunaman. Paykunaqa yaqa llapankum yachanku warma kasqankumanta rimay yachasqanku llaqtakunapi. Paykunaqa allintam entiendenanku chaskisqanku yachachikuyta hinaspa kikinkupa rimayninkutapas.
¿Imaynatam huk rimaykunapi qillqakunata ruwanku?
Gran Bretaña nacionpi qillqakunata ruwaq Geraint sutiyuq Jehova Diospa testigonpa nisqanman hinam iskay-kimsa llamkaniku, chaymi yanapanakuyniykuqa ancha allin tikraypi sasachakuyniykuta allichanaykupaq. Chaypaqqa manam sapa rimaypa ima nisqantachu qawaniku aswanqa llapan rimay ima niy munasqantam. Chaymi pikunapaq ima qillqapas ruwasqa kasqanta allinta yachaykuspayku paykunapaq hinaña ruwaniku.
¿Imayna ruwasqa kananpaqmi kallpanchakuniku?
Kallpanchakunikum ruwasqayku qillqakuna sumaq kananpaq, chaynapi leeqkuna rimayninkupi qillqasqa kasqanta piensanankupaq. Qallariyninmantapacha rimayninkupiña ruwasqa hinam kanan, chaypaqmi kallpanchakuniku runakunapa rimayninkupi ruwanaykupaq. Chaynapi miski mikuytapas mikuchkanmankupas hina mana sasachakuspalla leenankupaq.
¿Imanasqataq rimayniykupa kasqan lawpi yachayqa ancha allin?
Rimayniki rimaq runakunawan yachayqa allintam yanapakun. Sapa punchawmi uyariniku qillqasqayku rimaykuna runakunapa rimayninman hina kasqanta utaq mana kasqantapas. Chaymi yanapawanku leesqayku qillqapa ima niy munasqanta sumaqta qillqanaykupaq.
¿Imaynatam ruwaniku?
Puntataqa sapakamam yachachikuykunata leeniku sumaqta entiendenaykukama, qawanikutaqmi imayna ruwasqa kasqanta hinaspa pipaq ruwasqa kasqantapas. Kallpanchakunitaqmi imamanta yachachisqanmanta, imanasqa chay yachachikuy qillqasqa kasqanmanta hinaspa ima yachachiy munasqanmantapas yachanaykupaq. Chayta yuyaykuspaykum imaynata qillqanaykupaq piensaniku.
Chaymantañataqmi huñunakuniku entiendesqaykuta willanakunaykupaq. Chaywanmi musyakuniku llapayku allinta entiendesqaykuta, hinaspam rimaniku imaynata qillqanaykupaq. Munanikum ruwasqayku qillqata leeqkuna sumaqta entiendenankuta.
¿Llapaykuchu ruwaniku?
Kallpanchakunikum ruwasqayku qillqata leeqkuna chayllaraq leespanku entiendenankuta. Chaypaqmi ruwasqayku qillqata kuti-kutirispa uyarikuqta leeniku.
Hukniyku ruwasqayku rimaypi qillqaptinmi, iskayniykuñataq computadoraykumanta qillqasqanta qawaniku yachachikuypa ima niy munasqallan kananpaq, runakunapa rimayninman hina kananpaq hinaspa allin qillqasqa kananpaqpas. Chaymantam hukniyku leen llapaykupaq. Sichum leesqanpi sasachakuptinqa chayllam allichaniku. Chay qillqasqayku yachachikuyta llapanta tukuruspaykupas kaqmantam leeniku qallariyninmanta tukupayninkama, chaynapi leeqpa maypi sasachakusqanta qawanaykupaq.
¡Hatun llamkaymi!
Tutayaykunikuqa mana kallpayuqñam. Chaymi paqarinnintinqa samasqachaña yapamanta qawapaykuniku ruwasqaykuta. Ruwasqayku punchawmanta yaqa semana pasaytam Estados Unidosmanta apachimuwanku ruwasqayku qillqata allichapaykunaykupaq kaqkunata. Hinaspam kaqmanta leepaniku. Unaymantaña qawaykusqaykuraykum musyaniku imakunapi astawan allichapaykunaykupaq.
¿Imakunatam servichikuniku?
Computadorakunatam servichikuniku qillqakunata ruwanaykupaqqa. Ichaqa iñiqmasiykum computadorakunawan aswan allinta servichikunaykupaq tukuyta ruwarunku. Hukninmi kachkan diccionario kaqlla computadorapi, chaymanmi qillqasqayku rimaykunata grabaniku. Kachkantaqmi ñawpaqpi ruwasqayku qillqakunata computadorapi maskanaykupaq, chaypim tariniku imaynata ñawpaqpi sasa rimaykuna qillqasqaykuta.
¿Imaynam tarikuniku llamkasqaykuwan?
Leeqkunapa allinninpaq kasqanraykum sumaq ruwasqa kananpaq kallpanchakuniku. Kusisqam tarikuniku internetpi utaq mayqin qillqapi ima yachachikuytapas pipas leerusqanrayku allintaña kawsakusqanmanta yachasqaykuwan.
Allinninkupaq yanapakuy
Wara-waranqantin runakunam enteron allpa pachapi Jehova Diospa testigonkunapa qillqa ruwasqankuta rimayninkupi leechkanku. Chay qillqakunaqa, videokunaqa hinaspa internetpi jw.org nisqapi yachachikuykunaqa bibliamanta hurqusqam kachkan. Jehova Diosqa munanmi llapallan runakuna, ‘ayllukuna, tukuy rikchaq rimayniyuqkuna’ bibliamanta yachanankuta (Apocalipsis 14:6).b
a Ingles rimaypim puntata qillqanku.
b Yaykuy internetpi jw.org/quy nisqanman, chaypim rimaynikipi tarinki qillqakunata, videokunata, uyarinallapaq kaqkunata. Tarinkitaqmi huk rimaykunapipas.