7 warmaykichikta yachachiychik allin runa kanankupaq

¿CHAYPAQQA IMATAQ YANAPASUNKICHIKMAN?

Puntataqa tayta-mamakunam kallpanchakunaykichik imatapas allinta ruwanaykichikpaq, chayta qawaspankum churi-wawaykichikpas allin runa kanqaku.

Chaymantapas warmaykichiktaqa yachachiwaqchikmi llamkakuq, yanapakuq hinaspa llakipayakuq kanankupaqpas.

BIBLIAPIM NIN: ‘Imayna kawsananpaqyá yachachiy warmataqa. Yuyaqña kaspapas manam pantanqachu payqa’, nispa (Proverbios 22:6).

¿IMANASQATAQ KALLPANCHAKUYNIKICHIKQA ANCHA ALLIN?

Warmaykichikta yanapaychik imam allin utaq imam mana allin kaqta yachanankupaq. Karim nin: “Warmanchikkunaqa kuska kachkaptinchikpas celularpim ima mana allintapas qawachkanmanku”, nispa.

BIBLIAPIM NIN: ‘[Yuyayniyuqkunaqa] tantiay atiq kasqankutam sapa kuti servichikunku, chaymi chay tantiay atisqankuqa listo kachkan allin kaqtapas hinaspa mana allin kaqtapas riqsichinanpaq’, nispa (Hebreos 5:14).

Warmaykichikta yanapaychik respetakuq kanankupaq. Churi-wawaykichik respetakuq kanankupaqqa yachachinaykichikmi “ama hina kaspa”, “gracias” niyta chaynataq llakipayakuq kaytapas. Kunan tiempopi runakunaqa chaytaqa qunqarunkuñam imapas ruwayninkupi afanasqa kasqankurayku.

BIBLIAPIM NIN: “Imaynam qamkunapas munankichik runamasikichik qamkunapaq imapas ruwananta, chaynatayá qamkunapas paykunapaq ruwaychik”, nispa (Lucas 6:31).

¿IMATAM RUWAWAQCHIK?

Warmaykichikta rimapayaychik ima ruwaykuna mana allin kasqanmanta. Sichu taksankumantapacha warmaykichikta yachachinkichik manaraq casarakuspa qariwan utaq warmiwan puñuy mana allin kasqanta hinaptinqa, musu-sipasyasqankupiqa manam huchapakunqakuchu.

KAYTAM RUWAWAQCHIK: Televisionpi imatapas mana allinta qawaspaykiqa niwaqmi: “Taytalláy imaynamá waktaqa ruwanqa”, nispayki. Hinaspam warmaykita tapuwaq: “¿Allinchu wak ruwasqan?”, nispayki.

Brandonmi nin: “Warmakuna imatapas allinta tantianankupaqqa yachanankum imam allin utaq imam mana allin kasqanta”, nispa.

Warmaykichikta yachachiychik llakipayakuq kanankupaq. Wawakunapas atinmankum llakipayakuq kaytaqa, atinmankutaqmi “ama hina kaspa”, “gracias” niytapas. Huk libropipas ninmi: “Warmakunata mana kikillankupi piensaq kanankupaq yachachiptinkuqa llakipayakuqmi kanqaku, hinaspapas hukkuna allin kanankutam munanqaku”, nispa.

KAYTAM RUWAWAQCHIK: Warmaykita niykuy imapipas yanapaykusunaykipaq, chaynapi yanapakuyta yachananpaq.

Teram nin: “Warmanchikta taksankumanta ima ruwaytapas yachachiptinchikqa, sapallanku yachaspankuqa manam sasachakunqakuchu”, nispa.