8 tayta-mamakuna, qatipakunapaq hinayá kaychik

¿CHAYPAQQA IMATAQ YANAPASUNKICHIKMAN?

Tayta-mamakuna warmaykichiktaqa imapas ruwasqaykichikwanmi yachachinaykichik. Chaymi mana allinchu kanman pipas maskamusuptikichik churi-wawaykichikta “manam hinapichu niykamuy” niynikichikqa.

Davidmi nin: “Achka runakunam warmankuta ninku ‘mana allin ruwasqaytaqa amam ruwankichu’, nispanku. Warmakunam ichaqa mana nisqanchiktachu ruwanku aswanqa imapas ruwasqanchiktam”, nispa.

BIBLIAPIM NIN: “‘Manam suwakunachu’ nispa yachachichkaspaykiqa, ¿suwakunkichu?”, nispa (Romanos 2:21).

¿IMANASQATAQ KALLPANCHAKUYNIKICHIKQA ANCHA ALLIN?

Qamkunam tayta-mamakuna warmaykichikta musu-sipas kaptin yanapayta atiwaqchik, chaypaqqa qatipakusunaykichikpaq hinam kawsakunaykichik.

Nicolmi nin: “Imapas nisqanchikta mana ruwaptinchikqa warmanchikkunaqa niwasunmi ‘imanasqataq qamqa nisqaykitaqa mana ruwankichu’, nispanku. Paykunaqa qawachkankum imapas ruwasqanchikta”, nispa.

BIBLIAPIM NIN: ‘Hanaq pachamanta hamuq yachayman hina kawsaqkunaqa [...] manam iskay uyachu kaqku’, nispa (Santiago 3:17).

¿IMATAM RUWAWAQCHIK?

Kaykunapi piensariy: ¿Imaynataq kani warmiywan utaq qusaywan hinaspa warmaykunawan? ¿Imakunatam televisionpi qawani? ¿Pikunataq amistadniykuna? ¿Llakipayakuq runachu kani? ¿Munaymanchu warmaykuna wiñaruspan ñuqa hina kananta?

Cristinmi nin: “Ñuqaykuqa manam warmaykutaqa ninikuchu ‘kaytam utaq waktam ruwanayki’ nispaykuqa, manaraq puntata ñuqayku ruwachkaspaykuqa”, nispa.

Mana allin ruwasqaykitam riqsikunayki. Tayta-mamakuna warmaykichikqa yachankum pantaq runa kasqaykichikta, qamkuna pantasqaykichikta riqsikuptikichikqa warmaykichikqa yachanqam mana hatun tukuq kasqaykichikta.

Robinmi nin: “Imatapas mana allinta ruwaruspanchikqa pantasqanchiktam riqsikunanchik, chayta qawaspankum warmanchikkunapas pantasqankuta riqsikunqaku”, nispa.