9 allin runa kanaykipaq kallpanchakuy

¿CHAYPAQQA IMATAQ YANAPASUNKIMAN?

Runakunaqa manam uyanchikta qawaspallankuchu ninqaku allin runa kasqanchiktaqa, aswanqa agradecekuq kasqanchikta qawaspankum allin runa kasqanchikta yachanqaku.

¿IMANASQATAQ KALLPANCHAKUYNIKIQA ANCHA ALLIN?

Imayna kasqaykimanta mana pinqakuspaqa warmamasikikunapa imapas nisusqaykitaqa manam ruwankichu.

Adrianmi nin: “Kunan tiempopi musu-sipaskunaqa hukkunapa pachakusqankuman hinallañam pachakunku”, nispa.

Courtneymi nin: “Ñuqaqa yachanim imakuna ruway allin kasqanta, chaymi pipas imatapas mana allinta ruwanaypaq niwaptinqa mana kasunichu. Yachanitaqmi pikuna allin amistadniykuna kasqantapas”, nispa.

BIBLIAPIM NIN: “Amayá kay tiempopi runakunapa imayna kawsasqankutaqa qatipakuychikchu, aswanqa yuyaynikichikta musuqyachispayá imayna kawsasqaykichikta tikraychik”, nispa (Romanos 12:2).

¿IMATAM RUWAWAQCHIK?

Imayna runa kasqaykita yachanaykipaqqa piensariwaqmi imakuna allin ruwasqaykipi hinaspa imakunapi hinalla kallpanchakunaykipi, chaynataq imakunapi iñisqaykipi. Chayta ruwayqa yanapasunkim yuyayniyuq kaspayki allin runa kanaykipaq.

Imakuna allin ruwasqaykita yachanaykipaq kaypi yuyaymanay: ¿Imakunatam ruwayta yachani? ¿Imakunatam allinta ruwani? ¿Chayllachu piñakuruni pipas imatapas niwaptin? ¿Tiempollanpichu maymanpas chayani? ¿Allin llamkaqchu kani? ¿Qukuykuqchu kani?

KAYTAM RUWAWAQ: Imakunata allinta ruwasqaykimanta yachanaykipaq tayta-mamaykita utaq amistadnikita tapuy, niwaqmi imayna kasqaykita nisunaykipaq.

BIBLIAPIM NIN: “Sapakamayá qawakuchun imapas ruwasqan imayna kasqanta, chaynapi ama hukwan tupachikuspa kusikunanpaq aswanqa kikinpa ruwasqallanwan kusikunanpaq”, nispa (Galatas 6:4).

Imakunapi hinalla kallpanchakunaykipaq kaykunapi yuyaymanay: ¿Imapim astawan kallpanchakunay? ¿Imaynanpitaq chaylla mana allinman wichiykuyman? ¿Imaynanpitaq mana chayllaqa piñakurunaychu hinaspa imatapas chayllaqa ruwarunaychu?

BIBLIAPIM NIN: “‘Mana huchayuqmi kani’ nispanchikqa kikinchikmi engañakuchkanchik”, nispa (1 Juan 1:8).

Imakunapi iñisqaykita yachanaykipaq kaykunata sunquykipi tapukuy: ¿Imanasqataq mana iskayrayanichu Dios kasqanmanta? ¿Diospa munasqanman hinachu kawsakuchkani? ¿Ima ruwaykunataq ñuqapaqqa mana allinchu? ¿Imaynataq kanqa hamuq tiempopi kawsakuy?

BIBLIAPIM NIN: “Yuyaymanaspam cuidakunki. Allinta entiendespam waqaychakunki”, nispa (Proverbios 2:11).