Imapas tantiasqaykita ruwanaykipaqqa kallpanchakunaykim.
MUSU-SIPASKUNAPAQ
12 tantiay hamuq tiempopi imakuna ruwanaykipaq
¿IMATAQ YANAPASUNKIMAN?
Imapas ruway munasqaykita haypanaykipaqqa kallpanchakunaykim, chaypaqqa piensanaykim imaynata ruwanaykipaq, piensanaykitaqmi sasachakuykuna kananpipas.
Chaymantapas imapas ruway munasqaykitaqa manamá iskay-kimsa punchawllapichu ruwarunki aswanqa unaypim.
¿IMANASQATAQ KALLPANCHAKUYNIKIQA ANCHA ALLIN?
Imapas tantiasqaykita ruwaruspaykiqa kusisqam tarikunki, chaymantapas amistadnikikunam kuyasunki.
Kikikipa allinnikipaqmi kanqa. Kunanmanta imapas tantiasqaykita ruwaspaykiqa manam kasunkichu runakuna imatapas mana allinta ruwanaykipaq nisuptikiqa. Chaymantapas hamuq tiempopi ima sasachakuy kaptinpas atipankim.
Amistadnikikunam kuyasunki. Ima tantiasqaykitapas amistadnikiwan kuska ruwaspaykiqa kusisqam tarikunkichik hinaspapas astawanmi kuyanakunkichik.
Kusisqam kanki. Imapas tantiasqaykita ruwaruspaykiqa hawkam hinaspa kusisqam kanki.
Cristofermi nin: “Ñuqaqa kallpanchakunim imapas tantiasqayman hina ruwanaypaq, chay tantiasqayta ruwaspayqa anchatam kusikuni”, nispa.
BIBLIAPIM NIN: “Wayramunallanta suyaq runaqa manam tarpukunqachu. Puyumunallanta qawaq runaqa manam cosechanqachu”, nispa (Eclesiastes 11:4).
¿IMATAM RUWAWAQ?
Kaykunatam ruwawaq:
Akllay imapas ruway munasqaykita. Chaypaqqa imapas ruway munasqaykitam qillqawaq hinaspam chayman hina ruwawaq.
Piensay imaynata ruwanaykipaq.
Qillqawaqmi hayka tiempopi tukunaykita.
Tantiay imaynata ruwanaykipaq.
Piensawaqtaqmi ima sasachakuykuna kananpipas hinaspa imaynata atipanaykipipas.
Tantiasqaykita ruway. Imapas tantiasqaykita ruwanaykipaqqa amayá imawanpas harkachikuychu.
BIBLIAPIM NIN: “Ganaswan llamkakuq runapa yuyaymanasqanqa apuyachinqam”, nispa (Proverbios 21:5).