Llumpay llakikuypaqmi ayllunchikpa wañukusqanqa

Kostas sutiyuq runam willakun: “Sofiama 39 wataña casarasqa kachkaptiyku unquruspa wañukurqa. Wañukuptinqa amistadniykunam anchata yanapawarqa hinaspapas mana hukmanyarunaypaqmi ruwayniykunapi umayuq karqani. Chaywanpas huk watapunim llumpay llakisqa hinaspa hukmanyasqa karqani. Kimsa watañam warmichaypa wañukusqanmantaqa pasarun chaywanpas wakin punchawkunapiqa hinallam warmichayta yuyarispay llakisqa tarikuni”, nispa.

Qampapas ichaya aylluyki utaq amistadniki wañukurqa, chay wañukusqanwanqa ancha llakisqachá Kostas hina tarikurqanki. Casarasqa kachkaspa warmayananchik wañukuptinqa ancha llakikuypaqmi, chaynallataqmi ayllunchik utaq amistadninchik wañukuptinpas. Chaymanta yachaq doctorkunapas ninkum chayqa sasa kasqanta. Huk qillqapipas ninmi: “Pipapas ayllun utaq amistadnin wañukuptinqa llumpaytam llakikunku, wañukuq ayllunwan manaña haykapipas tupayta piensaspanku”, nispa. Arí, Chayna llakisqa tarikuspaykipaschá sunquykipi nirqanki: “¿Haykapikamataq kayna llakisqa tarikusaq? ¿Haykapipas kaqmanta kusisqa kawsakuyta atisaqchu? ¿Imataq yanapawanman manaña kayna llakisqa kanaypaq?”, nispa.

Kay ¡Rikchariy! qillqapim chaykunamanta yachanki. Kay qillqapiqa kachkantaqmi sumaq yanapakuykuna aylluyki wañukuptin mana llumpayta hukmanyarunaykipaq.

Aylluyki utaq amistadniki wañukuptinqa munanikum kay qillqapi yachachikuykuna sunquykita tiyaykachinanta.