Runakunapa qallariynin

PASAQ dibujopi qawasqanchikmanta, ¿imatawanmi kay dibujopi qawanki? Runakunatamiki. Paykunaqa kanku punta kaq qariwan punta kaq warmim. ¿Pitaq paykunata unancharqa? Diosmi. ¿Yachankichu sutinta? Sutinqa Jehová. Hinaptinpas Diosmi qarita suticharqa Adan sutiwan warmitañataqmi Eva sutiwan.

Adantam Jehová Dios kaynata rurarqa: ñutu allpamantam cuerpota rurapurqa. Hinaptinmi runapa senqanpi pukuykuptin Adan kawsaq runaña karurqa.

Diosmi Adanpaq llamkayta sapaqcharqa. Llapallan animalkunaman sutinta churanki, nispam nirqa. Adanqa unay watatachá animalkunata reqsirqa llapallanman sutinta churananpaq. Kayta rurachkaspam musyarurqa mana yanapaqnin kasqanta. ¿Yachankichu imanasqataq?

Animalkunaqa orqo-chinantinmi karqa. Elefantekunapas, leonkunapas paresnintin kasqaku. Adanñataqmi sapallanraq kachkasqa. Chaymi, Jehová Dios Adanta puñurachirqa wañusqata hina, hinaspa costillanmanta huk tulluta horqorurqa. Chaywanmi, Jehová Dios Adanpaq warmita rurarqa warminña kananpaq.

¡Mayna kusisqaraqchá Adanqa tarikurqa! ¡Maynataraqchá Evapas kusikurqa chayna sumaq huertapi kawsakunanpaq tarikuspan! Kunanqa churi-wawayoqña kayta atinmanku karqa hinaspa kusikuspanku kawsakunmanku karqa.

Jehová Diosmi munarqa Adanwan Eva wiñaypaq kawsakunankuta. Munarqataqmi enterollan Allpatapas Eden huertata hina sumaqyachinankuta. ¡Maynataraqchá kusikurqaku Adanwan Evaqa chaynata ruranankupi piensaspanku! ¿Munawaqchu karqa Allpata sumaq huertata hina sumaqyachiypi yanapayta? Adanpa hinaspa Evapa kusikusqankuqa manam unaypaqchu karqa. Qawasunchikyá imanasqataq.