Abrahampa iñiyninta Dios pruebasqanmanta

¿QAWACHKANKICHU Abrahampa rurasqanta? Cuchillotam hapichkan, churintachusmi wañuchinqa. ¿Imanasqa? Puntataqa yachasunraq imaynatam Abrahanwan Saraqa churiyoqña rikurirurqaku.

Yuyariy, Diosmi prometerqa churiyoq kanankupaq. Chayqa mana creenapaq hinam karqa, Abrahanwan Sara yuyaqña kaptinku. Abrahamqa yacharqam Diosqa tukuy imatapas ruray atisqanta. Chaynaqa, ¿imataq pasarqa?

Diospa Prometesqanmantaqa, huk wata pasarurqa. Chaymi Abraham 100 watanpi kachkaptin Saraqa 90 watanpi kachkaspa Isaac sutiyoq wawata wachakurqa. ¡Prometesqantam Diosqa cumplirqa!

Isaac mozoña kaptinmi, Jehová Diosqa Abrahampa iñiyninta pruebarqa. Diosmi qayarqa: ‘¡Abraham!’ nispa. Abrahanñataq nirqa: ‘¡Niwayá!’ Chaymi Dios nirqa: ‘Sapallan kuyasqayki churiki Isaacta pusaspa riy ñoqapa nisqay kaq moqoman chaypi wañuchispa kañasqa ofrendata hina ofrecemuway’ nispa.

¡Abrahamqa llumpayta churinta kuyaspanmi sinchita llakikurqa! Yuyariy, Diosmi prometerqa Abrahampa mirayninkuna Canaan lawpi yachanankupaq. Ichaqa, ¿imaynataq chayna kanman karqa Isaac wañuruptinqa? Abrahamqa mana entiendechkaspapas Jehová Diostam kasukullarqa.

Diospa nisqan sitioman chayaruspanmi Abrahamqa churin Isaacta chaqnaruspan rurasqan altarpa hawanman churarqa. Hinaptinmi cuchillonta horqorqa churinta wañuchinanpaq. Hinaptin Jehová Diospa angelnin cielomanta qayakamurqa: ‘¡Abraham, Abraham!’ nispa. Payñataqmi nirqa: ‘¡Niwayá!’ nispa.

Diosñataqmi nirqa: ‘Ama imanaychu warmata. Ñam yachaniña ñoqapi iñisqaykita, chullalla churikitapas ofrecewanaykipaqmi mana harkakuwarqankichu’ nispa.

¡Abrahamqa anchatam Diospi iñirqa! Payqa yacharqam Jehová Diosqa tukuy imatapas ruray atisqanta, yacharqataqmi churin Isaac wañuruptinpas kawsarichimunanta. Jehová Diosqa manam munarqachu Abrahamqa churin Isaacta wañuchinantaqa; chaymi Diosqa rikurirachirqa huk carnerota waqranmanta chaprapi arwisqata, hinaspa Abrahamta nirqa Isaacpa rantinpi ofrecenanpaq.