Faraonpa mosqokusqanmanta

ISKAY watañam pasarun, Joseyqa hinallaraqmi carcelpi kachkan. Vino serviqqa manam Joseymanta yuyanchu. Hinaptinmi huk tuta Faraonqa mosqokurqa iskay mosqoykunata, chaymi tapukurqa mosqoyninkunapa ima ninanta. ¿Rikuchkankichu dibujopi puñusqanta? Paqarinnintintam Faraonqa qayachirqa yachayniyoq runankunata hinaspa willakurqa mosqokusqanta. Paykunam ichaqa mosqoyninkunapa ima ninanta mana willayta atirqakuchu.

Chaymi vino serviqqa chayraq Joseyta yuyarirurqa. Hinaspa Faraonta nirqa: ‘Carcelpi kachkaptiymi huk mozo mosqoykunapa ima ninanta willakuq karqa’ nispa. Hinaptinmi Faraonqa carcelmanta Joseyta horqochimurqa.

Hinaspam Faraonqa mosqoyninkunata Joseyman willakurqa: ‘Qanchis sumaq wira vacakunatam rikuni. Rikurqanitaqmi qanchis mana valeq charki vacakunatapas. Chaymi chay mana valeq charki vacakunaqa wira vacakunata mikururqa.’

‘Huktawan mosqospaymi rikurqani chullalla tullumanta qanchis espigakuna sumaqllaña lloqsimuqta. Chaynataqmi qanchis pusillanña chakisqa espigakunatapas. Chaymi pusillanña espigakuna qanchis sumaq espigakunata millpururqa’ nispa.

Hinaptinmi Faraonta Josey nirqa: ‘Iskaynin mosqoynikikunapa ima ninanqa hukllam. Qanchis sumaq vacakunawan qanchis sumaq espigakunaqa hina chay qanchis watallam, hinaspa mana valeq charki vacakunawan, chay qanchis pusillanña chakisqa espigakunapas qanchis watallataqmi. Qanchis watam kanqa sumaqllaña kawsay cosechakuna Egipto nacionpi. Chaymanta qanchis wata muchuy kanqa.’

Chaymi Faraonta Josey nirqa: ‘Chaynaqa kunanpuni maskay yachayniyoq runata hinaspa churay qanchis wata sumaqllaña cosechakunamanta huñunanpaq. Hinaptinmi qanchis wata muchuypi runakuna yarqaymanta mana wañunqakuchu’ nispa.

Faraonpaqmi allinllaña karqa Joseypa nisqanqa. Hinaptinmi Joseyta churarurqa kawsaykunata huñuspa waqaychananpaq. Joseymi Egipto nacionpi ancha reqsisqa runa karqa, Faraonllam paymantaqa tumpa masqa karqa.

Pusaq wata qepata, muchuy tiempopiña Joseymi runakunata hamuchkaqta qawarqa. ¿Yachankichu pikunataq karqaku? ¡Paykunaqa chunka wawqenkunam! Taytanku Jacobmi paykunataqa Egiptoman kachamurqa Canaan lawpi muchuypas kaptin. Chaymi Josey wawqenkunata reqsirurqa, paykunam ichaqa manam Joseytaqa reqsirqakuchu. ¿Yachankichu imanasqataq? Joseyqa yuyayniyoqña kaptin hinaspa sapaq pachakunawan pachasqa kaptin.

Chaymi Josey warmallaraq kachkaspa mosqoyninpi wawqenkuna paypa ñawpaqninpi kumuykusqankuta yuyarirurqa. ¿Yuyarichkankichu chaymanta leesqaykita? Chaymi Joseyqa musyarikurqa kikin Dios Egipto nacionman allinninkupaq apachisqanta. ¿Imatataq Joseyqa rurarqa? Qawasunchikyá.