Jacob aylluntin Egiptoman risqankumanta

JOSEYMI manaña waqayta aguantarqachu. Chaymi llapallan sirvientenkunata cuartomanta lloqsinankupaq kamachirqa. Wawqenkunallawanña kachkaspa, Joseyqa waqayta qallaykurqa. Maynataraqchá wawqenkunaqa hukmanyarurqaku imamanta waqasqanta mana yachaspanku. Chaymantañam nirqa: ‘Ñoqaqa Joseymi kani. ¿Kawsachkanraqchu taytanchik?’, nispa.

Wawqenkunañataqmi hukmanyasqallaña kaspanku mana imatapas niyta atirqakuchu. Mancharisqallañam kachkanku. Joseymi ichaqa nin: ‘Asuykamuwaychik.’ Paykuna asuykuptinku nirqa: ‘Ñoqaqa kani Egipto nacionman rantikamusqaykichik wawqekichik Joseymi’ nispa.

Kuyapayaspam Joseyqa hinalla rimapayachkan: ‘Amayá pesakuychikchu kayman rantikamuwasqaykichikmantaqa. Cheqaptamá achka runakunata kawsachinaypaqmi Dios puntachimuwarqa. Faraonmi Egipto nacionpi kamachikuq kanaypaq churaruwan. Utqayman taytanchikpa kasqanman kutispayá chaynata nimuychik. Hinaspa nimuychik hamuchun kaypiña kawsakunanpaq’ nispa.

Hinaptinmi Joseyqa wawqenkunata abrazaykurqa hinaspa muchaykurqa. Faraonmi yacharurqa Joseypa wawqenkuna hamurusqankuta hinaspam Joseyta nirqa: ‘Carretakunata apaspankuyá aylluykichikta chaynataq taytaykichiktapas apamuchunku. Egipto nacionpi allin kaq allpatam qosaq’ nispa.

Chaynatamá rurarqaku. Qaway kay dibujopi Joseymi taytanta abrazaykuchkan llapallan ayllunwan Egiptoman chayaramuptin.

Jacobpa ayllunmi achkallataña mirarusqa. Churinkunawan willkankuna Egiptoman richkaptinku 70 karqaku. Paykunawantaqmi hamurqaku warmikunapas hinaspa achka sirvientenkunapas. Chaymi paykunaqa Egiptopiña kawsakurqaku. Israel runakuna nispam suticharqaku, Jacobpa sutinta Diosqa Israelman cambiasqanmanta. Diospaq sapaqchasqa runakunam karqaku, paykunamantaqa yapapiñam yachasunchik.