Puka lamar qochata chimpasqankumanta

¡QAWAY chaypi pasasqanta! Moisesmi lamar qochapa hawanman tawnanta haywarichkan. Paywan lamar qochapa patanpi tarikuqkunaqa Israel runakunam. Faraonwan tropankunam ichaqa wañunankukama heqepachkanku. Qawasunchik imaynam chayqa karqa.

Ñawpaq kaq willakuypi yachasqanchikman hina chunka castigopa qepanta Faraonqa Israel runakunata Egiptomanta pasakunankupaq nirqa. Egipto nacionmanta 600.000 qespisqa qarikunam lloqsirqaku, achka warmikunawan hinaspa warmachakunawanpas. Chaymanta achka runakuna Jehová Diospi iñispanku Israel runakunata qatikurqaku. Llapallankum ovejankuta, cabrankuta hinaspa animalninkuta qatikustin Egiptomanta pasakurqaku.

Manaraq pasakuchkaspanku, Israel runakunaqa pachata hinaspa qori-qollqemanta llapa ima alajakunata Egipto runakunata mañakurqaku. Paykunañataqmi tukupay castigowan mancharisqallaña karqaku. Chaymi Israel runakunaman llapa ima mañakusqankutapas qoykurqaku.

Qatiqnin punchawkunallapim Puka lamar qochapa patanman chayarurqaku. Chaypim samakurqaku. Chaykamaqa, Faraonmi runankunapiwan pesapakurqaku Israel runakunata kacharisqankumanta. ‘Serviqninchikkunata kachaykuspaqa yanqatam rurarunchik’ nispa ninakurqaku.

Hinaptinmi Faraonqa piensasqanta cambiarurqa. Chayllam guerrapaq carretanta hinaspa tropanta alistarqa. Chaymanta Israel runakunapa qepanta pasarqa 600 akllasqa carretankunawan, pusarqataqmi Egipto nacionpa llapallan carretankunatapas.

Faraonwan Egipto runakuna hichpaykamuchkaqta Israel runakuna qawaruspanku sinchillataña mancharikurqaku. Mayman lluptikuytapas atirqakuchuqaya. Kaylawninpi Puka lamar qocha kachkasqa waklawnintañataqmi Egipto runakuna hamuchkarqaku. Jehová Diosmi ichaqa llaqtanta Egipto tropakunamanta rakiq puyuta churarurqa. Chaymi Egipto runakunaqa Israel runakunata atacanankupaq manam qawayta atirqakuchu.

Hinaptinmi Jehová Diosqa Moisesta nirqa tawnanta Puka lamar qochapa hawanta haywarinanpaq. Moises chaynata ruraruptinmi Jehová Dios intipa qespimunan lawmanta sinchi wayrata pukuchimurqa. Chaymi lamar qochaqa chawpinmanta rakinanakururqa, hinaptin yakukuna perqa hina iskay lawninkupi karurqa.

Hinaptinmi Israelpa mirayninkunaqa pasaykurqaku lamar qochapa chakichisqa chawpinta. Wara-waranqanpi runakuna llapa animalnintin tukuy tuta chimparqaku. Chaymanta Egipto runakunaqa kaqllamanta rikururqaku Israel runakunata, hinaptinmi paykunapa qepanta lamar qochaman yaykururqaku.

Chaynata ruraptinku, Diosmi carretankunapa ruedanta cienegarachirqa. Chaymi Egipto runakuna mancharikuspanku qaparirqaku: ‘Ñoqanchikpa contranchikpim Jehová Diosqa peleachkan. Ayqesunchik kaymanta’ nispa. Ichaqa manañam atirqakuchu.

Dibujopi qawasqaykiman hina, Jehová Diosqa Moisesta nirqa makikita haywariy lamar qochapa hawanman. Hinaptinmi lamar qocha imaynam kasqanman kutiykuspan Egipto runakunata hinaspa carretankunata tapaykurqa. Llapallan tropakuna lamar qochapi wañururqaku. ¡Manam chullallapas Egipto runakunamanta puchurqachu!

¡Maynataraqchá kusikurqaku Dios llaqtanta salvaykusqanmanta! Chaymi Jehová Diosta agradecenankupaq qarikuna takirqaku kaynata nistin: ‘Jehová Diosmi hatun atiyninta qawachikurqa. Caballotapas sillakuqnintapas lamar qochamanmi wischuykurqa’ nispa. Moisespa panin Mariañataqmi tinyanta horqoykurqa, hinaptinmi llapallan warmikunapas paypa qepanta lloqsirqaku tinyankuta tocastin. Tusurqaku kaynata takistin: ‘Jehová Diosmi hatun atiyninta qawachikurqa. Caballotapas sillakuqnintapas lamar qochamanmi wischuykurqa’ nispa.