Mana manchakuq iskay warmikunamanta

ISRAEL runakuna sasachakuykunapi tarikuspanku, Jehová Diosta qaparispa mañakurqaku. Hinaptinmi Diosqa paykunata yanapaq qarinchakuq jefekunata hatarichirqa. Bibliapiqa juezkuna nispam suticharqaku. Josueymi punta kaq juezqa karqa, wañukuptinñataqmi Otoniel, Aod hinaspa Samgar juezkuna karqaku. Ichaqa Israelpa mirayninta yanapaqninkunaqa iskay warmikunapas karqataqmi, paykunapa sutinqa karqa Debora chaynataq Jael.

Deboraqa Diosmanta willakuqmi. Paymanmi Jehová Diosqa hamuq punchawkunamanta willaq, payñataqmi runakunaman willakun Diospa nisqanta. Chaynallataqmi Deboraqa Israel runakunapa juezninpas karqa. Orqokuna lawpi palmera sachapa sikinpi payqa yacharqa chaymanmi Israelpa mirayninkuna sasachakuypi tarikuspanku riqku yanapachikuq.

Chay tiempopiqa Canaan runakunapa reyninqa Jabin sutiyoq runam karqa. Guerrapaq fierromanta carretankunam 900 karqa. Paypa tropankunaqa mancharikunapaq hinam karqa, chaymi Israel runakunamanta achkallañam sirvientenkunaña rikurirurqaku. Jabinpa tropankunapa kamachiqninmi Sisara karqa.

Chaymi Deboraqa juez Baracta qayarachimuspan nirqa: ‘Jehová Diosmi kaynata nisunki: “Tabor moqoman riy 10.000 runakunata huñuspayki. Ñoqam pusamusaq Sisarata chaynataq tropankunatapas, chaypim qampa makikiman churasaq”’ nispa.

Baracñatami Deborata nirqa: ‘Ñoqawan riptikiqa risaqmi’ nispa. Deboraqa rirqa, ichaqa Baractam nirqa: ‘Risqaykipiqa manam qamchu hatunchasqa kanki, Sisarataqa Jehová Diosmi warmipa makinman churaykunqa’ nispa. Hinaptinmi chaynam karqa.

Chaymi Baracñataq Tabor moqomanta uraykamurqa Sisarapa tropankunawan tupananpaq. Hinaptin qonqayllamanta Jehová Diosqa mayu lloqllawan Sisarapa tropankunata aparachirqa. Sisaraqa carretanmanta uraykuspa lluptirurqa.

Hinaptinmi Jaelpa karpanman Sisaraqa chayarurqa. Payñataqmi wasinman yaykuchispa lecheta tomananpaq qoykurqa. Chayta tomaykuspa puñunayaptinmi Sisaraqa puñururqa. Jaelñataq karpanpa estacanta hapiykuspa Sisara runapa umanpi takarurqa. ¡Chaymanta, Barac hamuruptinmi Jaelqa Sisarata wañusqataña qawaykachirqa! Deborapa willakusqanqa cumplikururqa.

Chaymantañam rey Jabinta wañuchirqaku, chaynapimá Israelpa mirayninkunaqa hawkayaypi kaqtawan kawsarqaku.