Babiloniapi preso kasqankumanta Jerusalenpa murallanta hatarichinankukama

Babilonia nacionpi Israel casta runakuna preso kachkaspanku, pruebakunapi tarikurqaku. Chaymi Sadracta, Mesacta hinaspa Abednegotapas rupachkaq hornoman wischuykurqaku, Diosmi ichaqa wañunankumanta libraykurqa. Chaymanta, Babiloniata Persia law hinaspa Media law nacionkuna vencerusqanku qepata Danieltapas leonkunapa kasqan machayman wischuykurqaku, Diosmi ichaqa angelninta kachamuspan leonkunapa siminta wichqarachispa libraykurqa.

Chaymantañataq Persia nacionpa reynin Ciroqa Israel runakunata preso kasqankumanta kacharirqa. Chaynapim paykunaqa Babiloniaman presochasqa risqankumanta llaqtankuman kutirqaku 70 wata cumplikuruptin. Jerusalenman kutimuspankuqa Jehová Diospa templontam hatarichiyta qallaykurqaku. Ichaqa chayllam llamkasqankuta enemigonkunaqa sayarachirqaku. Chaymi Jerusalenman kutimusqankumantaqa 22 wata qepatam templotaqa qespichiyta tukururqaku.

Chaymantapas, yachasunmi templota sumaqyachinanpaq Esdraspa Jerusalenman kutimusqanmanta. Payqa kutimurqa templota qespichisqankumanta 47 wata qepataña. Esdraspa chayamusqanmanta 13 wata qepata Nehemias yanaparqa Jerusalen llaqtapa tuñisqa murallankunata hatarichiypi. Chaymi PICHQA kaq Parteqa 152 watakunapi pasasqanmantam willakuchkan.