¿Ima suyakuymi kan kuyasqa ayllunchikkuna wañukuptin?
Diosta serviq Jobmi tapukurqa: “Huk runa wañukuspanqa ¿yaqachum huktawan kawsarimunqa?”, nispa (Job 14:14). Yaqapaschá qampas chaynata tapukurqanki. ¿Imaynataq sientekuwaq kay Pacha sumaq huerta kaptin wañukuq aylluykikunawan kaqmanta tupanaykita yachaspaqa?
Bibliam niwanchik: “Wañuqnikikunam kawsarimunqa. [. . .] Hatarimunqa”, nispa. Chaymantapas ninmi: “Allin ruraq runakunam allpataqa dueñoyanqaku. Paykunaqa chaypimiki wiñaypaqraq kawsakunqaku”, nispa (Isaias 26:19; Salmo 37:29).
Kay textokunapa nisqanpi astawan confianapaqqa, puntatam yachananchik kayna tapukuykunamanta: ¿Imanasqataq runaqa wañun? ¿Maypitaq wañuqkunaqa kachkan? ¿Imanasqataq seguro kachwan kawsarimunankumanta?
Imanasqam wañunchik hinaspa imam pasawanchik
Qallariypiqa Diosqa manam munarqachu runakuna wañunantaqa, chaytam Bibliaqa yachachin. Diosmi Adantawan Evata unancharqa hinaspam Eden sutiyoq huertapi churaspan kamachirqa wawa-churiyoq kanankupaq hinaspa enteron Pachata sumaq huertaman tikranankupaq. Mana kasukuspam ichaqa wañunanku karqa (Genesis 1:28; 2:15-17).
Paykunaqa Diospa qosqantam mana chanincharqakuchu chaymi Diospa nisqanman hina wañururqaku. Diosmi Adanta nirqa: “Allpamanta horqosqam kanki. Allpallam kanki, allpallamantaqmi tikrakunki”, nispa (Genesis 3:19). Manaraq unanchasqa kaspanqa, Adanqa manam maypipas kawsarqachu, allpallam karqa. Huchallikusqanraykum Adanqa allpaman kutiykuspan allpayarurqa.
Chaymi wañuspaqa maypipas manaña kawsanchikchu. Bibliam nin: “Huchallikuypa pagonqa wañuymi. Diospa qowasqanchikmi ichaqa [. . .] wiñaypaq kawsakuy”, nispa (Romanos 6:23). Wañuruspaqa manam imatapas yachanchikchu, Bibliam nin: “Wañunanmantam yachanku kawsaqkunaqa. Manam imatapas yachanchu wañuqkunaqa”, nispa (Eclesiastes 9:5). Nintaqmi: “[Runakunaqa] wañuruspankum allpayarun. Chay punchawllapitaqmi tanteasqankupas chinkarun”, nispa (Salmo 146:3, 4).
Adanwan Evallam Eden huertapiqa mana kasukurqakuchu, hinaptinqa ¿imanasqataq lliw runakuna wañunchik? Llapallanchikmi Adanpa mana kasukusqan qepataña nacerqanchik, chaymi huchatawan wañuyta herenciata hina chaskirqanchik. Bibliam nin: “Huk runallawan [Adan] kay pachapi huchallikuy qallariruptinmi chayrayku wañuypas rikurirurqa chaymi lliw runakuna huchallikuspanchik wañunchik”, nispa (Romanos 5:12; Job 14:4).
Ichapas kaynata pipas tapukunman: ‘¿Manachu wañuruptinchikqa almanchik hinalla kawsachkan?’, nispa. Achka runakunam chaynata yachachinku, ninkum wañuqkunaqa huk vidamanmi rinku, nispa. Bibliaqa manam chaynatachu yachachin. Aswanqa ninmi kikiki alma kasqaykita (Genesis 2:7, NM; Jeremias 2:34, NM; Proverbios 2:10, NM). Nintaqmi: ‘Pipas huchallikuqqa [otaq almaqa] wañunqam’, nispa (Ezequiel 18:4). Bibliapiqa manam mayqen textopas yachachinchu runa wañuruptin alman hinalla kawsasqanmantaqa.
Imanasqam seguro kachwan kawsariy kananmanta
Huchallikuywan wañuy qallaykuptinmi Jehová Dios willachirqa wañuqkuna kawsarichisqa kanankumanta. Chaymi Biblia nin: ‘[Churin Isaac] wañuruptinpas Diosqa atiyninwan kawsarichiq kasqanpim Abrahamqa yuyaymanarqa’, nispa (Hebreos 11:17-19). Abrahamqa manam yanqachu iñirqa, Tukuy atiyniyoq Diosmantam Biblia nin: “Diosqa manam wañusqakunapa Diosninchu ichaqa kawsaqkunapa Diosninmi, paypaqqa llapallanmi kawsachkan”, nispa (Lucas 20:37, 38).
Jehová Diosqa Tukuy atiyniyoqmi wañusqakunata kawsarichinanpaq, payqa munanpunim akllasqan runakuna kawsarichiyta. Jesusmi nirqa: “Amayá admirakuychikchu, huk punchawmi Diospa Churinpa qayasqanta uyarispanku llapallan wañuqkuna kawsarimunqaku”, nispa (Juan 5:28, 29; Hechos 24:15).
Chay nisqan qepallantam Jesusqa rikururqa Nain sutiyoq llaqtamanta pampanankupaq aya apasqankuta. Chay wañusqa mozom viudapa sapallan qari wawan karqa. Jesusqa viudata qawarispanmi llakipayarqa chaymi wañusqata nirqa: “Yaw joven, qamtam niki: ¡Hatariy!”, nispa. Hinaptinmi tiyarirurqa, Jesusñataqmi mamanman qoykurqa (Lucas 7:11-17).
Chaynallataqmi admirakuypaq pasarqa kamachiq Jairopa wasinpipas. Jairopa warmi churinmi 12 watanpi wañururqa. Hinaptinmi Jesusqa paypa wasinman chayaruspan wañusqa warmapa kasqanman rispan nirqa: “Warma, hatariy”, nispan. ¡Hinaptinmi kawsarirurqa! (Lucas 8:40-56.)
Chaymanta qepatam Jesuspa amistadnin Lazaro wañururqa. Paypa wasinman Jesus chayaruptinmi tawa punchawña pampasqa karqa. Panin Marta llakisqa kaspanpas suyakuynintam qawachirqa: “Tukupay punchawpi kawsarimunantaqa yachanim”, nispa. Jesusñataqmi sepulturaman rispan rumita horqochirqa, hinaspam nirqa: “¡Lazaro, lloqsimuy!”, nispan. ¡Hinaptinmi lloqsiramurqa! (Juan 11:11-44.)
Piensariy: ¿Maypitaq Lazaroqa tarikurqa tawa punchawña pampasqa kaspanqa? Lazaroqa manam nirqachu hanaq pachapi kasqantaqa otaq nina rawraq infiernopi kasqantaqa, mayqenpipas tarikuspanqa willakunmanchá karqa. Lazaroqa manam imatapas musyarqachu wañusqa kaspanqa, Jesus mana kawsarichiptinqa chaynallam kanman karqa ‘kawsariy’ tiempokama.
Jesuspa chay milagrokuna rurasqanqa pisi tiempollapaqmi karqa, chay kawsarichisqan runakunaqa kaqllamantam wañururqaku. Diospa atiyninwan wañuqkunata kawsarichiy atisqantam Jesusqa 1.900 wata ñawpaqtaraq qawachirqa. Chayna milagrokuna rurasqanwanmi Jesusqa qawachirqa Diospa Gobiernonwan kay Pachapi imakuna rurananta.
Kuyasqa ayllunchik wañukuptin
Kawsarimuypi suyakuyninchik kachkaptinpas, kuyasqa ayllunchik wañukuptinqa anchatam llakikunchik. Abrahampas iñirqam señoran Sara kawsarichisqa kananmanta chaywanpas ‘llakikuspanmi waqarqa’ (Genesis 23:2). ¿Imaynatam Jesuspas tarikurqa ancha kuyasqa amistadnin Lazaro wañukuptin? ‘Sonqonpim sinchita llakikurqa’, hinaspam “waqarqa” (Juan 11:33, 35). Kuyasqa ayllunchik wañukuptin waqayqa manam penqakunapaqchu.
Wawa-churi wañukuptinqa llakikunapaqmi, astawanraqmi mamanpaqqa. Chayna kasqantam Bibliapas qawachin (2 Reyes 4:27). Chaynataqmi taytapas tarikun. Rey Davidmi churin Absalon wañuruptin nirqa: “¡Churilláy Absalon, ñoqam wañuyman karqa qampa rantikipi!”, nispa (2 Samuel 18:33).
Wañuqkuna kawsarichisqa kanankupi confiaspaykiqa llakikuynikitam atipanki. Manam llakikunkichu ‘mana confianzayoqkuna hinaqa’ chaytam Biblia nin (1 Tesalonicenses 4:13). Aswanqa Diosmanmi asuykunayki orakuspa, Bibliam prometesunki: “Payñam cuentallikunqa qanmantaqa”, nispa (Salmo 55:22).
Kaypi Bibliapa textokunaqa Chuya Qellqa Bibliamantam horqosqa kachkan; NM kaptinqa Traducción del Nuevo Mundo de las Santas Escrituras Bibliamantam horqosqa kachkan.