¿Chinkanqachu kay Pachapi kawsakuy?

Kay tiempopim astawan uyarinchik kay Pachapi kawsakuy tukunanmanta. Achka runakunam manchakunku bomba nuclear nisqankuwan otaq tukuy imata qachachasqankuwan kay Pachapi vida chinkarunanmanta. Wakinñataqmi ninku qollqe mana kaptin runakuna kikinkupura wañuchinakunankumanta.

¿Chinkanqachu kay Pachapi kawsakuy? Chayna kaptinqa, ¿ima ninantaq chayqa? ¿Haykapipas chinkarqachu kawsakuy?

¿Chinkarqachu kay Pachapi kawsakuy?

Arí, ñawpa tiempopim chayna pasarqa. Yuyariy Noeypa tiemponpi mana allin ruraq runakunapi. Bibliam nin: “Sinchi parawanmi kay pachaqa chinkachisqa karqa”, nispa. Nintaqmi: ‘Diosqa manam pampacharqachu ñawpaq runakunata, sinchi paratam kachaykamurqa Dios mana adoraq runakunaman hinaspam salvacionmanta willakuq Noeytawan qanchis runakunallata salvarqa’, nispa (2 Pedro 2:5; 3:6).

Kaypiqa nichkanmi ima puchukasqanmanta hinaspa ima mana puchukasqanmantapas. Manamá lliw runakunachu chinkarqakuqa. Sinchi paramantaqa Noeywan familianmi librasqa karqaku. Kay Pachawan lucerokunaqa manam chinkarqakuchu. ‘Diosta mana adoraq runakunallam’ chinkarqakuqa.

Tiempopa risqanman hinam Noeypa familianmanta runakuna mirarurqa. Chaymantapacham runakunaqa mana puchukachisqa kawsachkanku. Ichaqa kunankamam guerrakunapi, wañuchinakuypi hinaspa tukuy mana allin ruraykunapi tarikunku. Hinaptinqa, ¿imataq pasanqa? ¿Puchukanqakuchu?

Imataq hamuq tiempopi pasanqa

Noeypa tiemponpi mana allin ruraqkuna puchukasqanmanta Biblia willaspanmi kaynatawan nin: “Kunan kaq cielokunatawan kay pachataqa Diospa rimarisqanmi waqaychachkan ninapaq”, nispa (2 Pedro 3:7). Huk textopas ninmi: ‘Kay pachapi mana allin ruraykunaqa [. . .] tukuruqllam’, nispa (1 Juan 2:17).

Bibliapi kay pacha nispanqa manam Allpa pachamantachu nitaq qawasqanchik cielomantachu rimachkan, kaykunaqa manam Noeypa tiemponpiqa puchukarqachu (Salmo 104:5). Ninawan hinam chinkachisqa kanqaku ‘cielokuna’ otaq Satanaspa munaychakusqan gobiernokuna hinaspa ‘kay pacha’ otaq mana allin ruraqkuna (Juan 14:30; 2 Corintios 4:4). Noeypa tiemponpi hinam mana allin ruraqkunaqa kay tiempopipas puchukachisqa kanqaku. Jesucristopas nirqam chay punchaw manaraq chayamuchkaptin, “Noeypa tiemponpi” hina runakuna kanankumanta (Mateo 24:37-39).

Noeypa tiemponmanta Jesus rimaspanqa, apostolninkunapa tapusqankutam kutichirqa, paykunam nirqaku: ‘¿Imaynatam yachasaqku kutimunaykimanta hinaspa kay pacha puchukananmanta?’, nispa (Mateo 24:3). Apostolninkunaqa yacharqakum puchukay punchaw chayamunanta. ¿Manchakurqakuchu chay punchawta?

Manam, puchukay punchaw manaraq chayamuptin imakuna pasananmanta nispanmi Jesusqa qatiqninkunata kallpancharqa ‘librasqa kayninku hichpallaña’ kasqanrayku kusikunankupaq (Lucas 21:28). Satanasmantawan mana allinkunamanta librasqa kaspankum hawkayaypiña mosoq pachapi kawsanqaku (2 Pedro 3:13).

¿Haykapitaq mana allinkunaqa puchukanqa? ¿Imakunam pasanan karqa Jesus manaraq ‘kutimuchkaptin’?

Imakuna pasananmanta

‘Kutimunayki’ niq rimayqa griego rimaypi pa·rou·sí·a niq rimaymantam tikrasqa kachkan, chay ninanqa kaypim kachkan ninanmi. Chaymi tukuy imakuna pasasqanqa manam Cristo chayraq kutimunanmantachu rimachkan aswanqa kutiramuspan kaypi kasqanmantam. Chaymi qawachin cielopi kamachiy qallaykusqantawan pisi tiempollamantaña enemigonkunata puchukachinanta (Apocalipsis 12:7-12; Salmo 110:1, 2).

Jesusqa rimarqa manam enteron pachapi imakuna pasanallanmantachu. Kaykunam pasanan karqa Bibliapa nisqanman hina ‘tukupay tiempokunapi’ (2 Timoteo 3:1-5; 2 Pedro 3:3, 4). Reparay ‘tukupay tiempopi’ imakuna pasananmanta Jesuspa nisqankunapi.

“Huk nacionmi peleanqa huklaw nacionwan” “huk gobiernopas huklaw gobiernowan.” (Mateo 24:7.) Kay tiemponchikpim guerrakunaqa aswanraq kachkan ñawpa tiempomantaqa. Reqsisqa runam nirqa: “[1914 watapi] enteron Pachapi Punta kaq Guerraqa ‘qalaypaqmi’ karqa”, nispa. Enteron pachapi iskay kaq guerrapiqa runakunam astawanraq wañurqaku. Kunanpas guerrapiqa hinallam allpantinpi wañuchkanku. ¡Admirakuypaqmi cumplikuchkan Jesuspa willakusqanqa!

“Kanqam muchuykuna.” (Mateo 24:7.) Enteron Pachapi Punta kaq Guerra pasaruptinmi mana haykapipas hina muchuy karqa. Qatiqnin Iskay kaq Guerra pasaruptinpas, llumpa-llumpaymi muchuy karqa. Enteron Pachapim millo-millonnintin runakuna yarqaymanta kanku, chaymi sapa wata 14.000.000 warmachakuna wañunku. ¡Cheqaptamá ‘muchuykunaqa’ karqa!

‘Manchakuypaq terremotokunam’ kanqa. (Lucas 21:11.) Ñawpaq tiempokunapi terremotowan wañusqankumantaqa 1914 watamantapacham runakunaqa astawanraq wañuchkanku. Reparay manchakuypaq wakin terremotokuna pasasqanpi hinaspa hayka runakuna wañusqanpipas: 1920, China nacionpi 200.000; 1923, Japón nacionpi 140.000 (kayqa mana tarisqanku kaqkunapiwanmi); 1939, Turquía nacionpi 32.700; 1970, Perú nacionpi 66.800; 1976, China nacionpi yaqa 240.000 (otaq hukkunapa nisqaman hinaqa 800.000). ¡Cheqaptamá “manchakuypaq terremotokuna” pasachkan!

“Tukuy hinastinpim kanqa [. . .] onqoykuna.” (Lucas 21:11.) Enteron Pachapi Punta kaq Guerra pasaruptillanmi 21.000.000 runakuna wañururqaku gripe española sutiyoq onqoywan. Huk revistam nirqa: “Manam haykapipas kayna chaylla wañuchiq onqoyqa karqachu”, nispa. Chaymantapacham wara-waranqantin runakuna wañunku cancer, SIDA hinaspa huk onqoykunawanpas.

‘Mana allin ruraqkunam llumpayta miranqa.’ (Mateo 24:12.) 1914 watamantapacham wañuchinakuykuna hinaspa mana allin ruraykuna astawan yapakuchkan. Achka llaqtakunapim runakunaqa punchawpas manchakuywan purinku. Tutaqa wasinkupi llavekuruspam manchakuspa manaña lloqsinkuchu.

Tukupay tiempopaq huk willakuykunapas cumplikuchkanmi. Kaymi qawachin mana allinkuna chinkanantaña. Ichaqa manam lliw runakunachu chinkanqa. Bibliam nin: ‘Kay pachapi mana allin ruraykunaqa [. . .] tukuruqllam’, nispa. Nintaqmi: “Diospa munasqanman hina ruraqmi ichaqa wiñaypaq takyanqa”, nispa (1 Juan 2:17).

Chaymi Diospa munayninmanta yachaspa kasukunanchik. Hinaspaqa tukuy mana allinkuna puchukaptinpas manam wañusunchu chaymantapas mosoq pachapim wiñaypaq kawsasunchik. Bibliam nin: “Diosmi pichanqa [runakunapa] weqenta, manañam kanqachu wañuypas [. . .], waqaypas nitaq nanaypas”, nispa (Apocalipsis 21:3, 4).

Kaypi rikuriq textokunaqa horqosqam kachkan Chuya Qellqa Bibliamanta.

[6 kaq paginapi reqsikusqanchikmanta]

Reqsikunchikmi: Fotopi Avionqa, USAF. Fotopi warmacha: WHO por W. Cutting. Y. Ishiyamapi: terremoto, Japonpi Universidad Hokkaido.