Uyariwaqninchikkunapi reparanapaq

BIBLIAPA yachachisqanmanta willakuspaqa manam willayllachu-willana aswanqa piensarinankupaqmi kallpanchana. Chayna ruraytaqa atichwanmi uyariwaqninchikkunapi reparaspa. Chaytaqa qawachichwanmi qatiqninpi yachachikuykunaman hina ruranapaq kallpanchakuspa.

Piensasqankupi reparay. Apostol Pablom uyariqninkunapi chaynataq imayna piensasqankupipas allinta reparaspan nirqa: “Judiokunawan kaspayqa judio hinam kani paykunata gananayrayku, Moisespa leynin kasukuqkunawan kaspayqa, leytam kasukuni paykunata gananayrayku, chaynatam rurani leytaqa mana kasukunay kachkaptinpas. Moisespa leynin mana kasukuqkunata gananayraykum ley mana kasukuq hina kani, chaywanpas Diospa leynintaqa kasukunim Cristopa leyninta kasukuspay. Mana ancha iñiyniyoqkunawan kaspaymi ñoqapas chayna kani paykuna gananayrayku, sapakamawanmi paykuna hina kani wakillantapas salvanayrayku. Tukuy imatam rurani Cristomanta allin noticia willakunayrayku hinaspa allin noticiamanta allin kaqkuna chaskinayrayku”, nispa (1 Cor. 9:20-23). ¿Imaynatam Pablo hina kay tiempopipas runakunata yanapachwan?

Manaraq rimachkaspa huk ratochallapas uyarisuqnikipi reparaspaqa ichapas cuentata qokuwaq imamanta yachay munasqanta otaq imayna tarikusqantapas. ¿Yaqachu musyawaq wasiyoq ima ruraq kasqanta? ¿Imaynatataq yachawaq religionniyoq otaq wawa-churiyoq kasqanta? Chaykunapi reparasqaykiman hina, ¿atiwaqchu wasiyoqman yachachiyta?

Predicasqayki lawpi kaqkunaman yachachiyta munaspaqa manaraq watukuchkaspam tanteanayki imamanta yachachinaykipaq. Wakinpiqa huklaw nacionniyoq runakunatam predicasqanchik lawpi tarinchik. Chayna kaptinqa, ¿atiwaqchu paykunaman imayna predicayta? Jehova Diosqa munanmi “llapallan runakuna salvakunankuta hinaspa cheqap yachachikuy reqsinankuta”, chaymi kallpanchakunanchik Gobiernonmanta allinta yachachinapaq (1 Tim. 2:4).

Allinta uyariy. Jehova Diosqa tukuy yachayniyoq kaspanpas hukkunatam uyarin. Profeta Micaiasmi revelacionninpi qawarqa Jehova Diosqa angelninkunapa imam piensasqankumanta rimaptinku uyarisqanta chaynataq huknin angelninpa tanteasqanman hina rurananpaq saqesqantapas (1 Rey. 22:19-22). Sodoma llaqta castigasqa kananmanta Abraham llakikuywan rimaptinpas Jehova Diosqa respetowanmi uyarirqa (Gen. 18:23-33). ¿Imaynatam Jehova Diosta qatipakuchwan predicasqanchikpi?

Uyarisuqnikita rimananpaq tapuriy. Ima nisqantapas allinta uyariy. Chaynata uyariptikiqa mana recelaspam rimanqa. Imamanta yachay munasqanta musyaspaqa respetowan astawan tapuy paywan hinalla rimanaykichikpaq. Alabanapaq hina kaptinqa alabaykuy. Piensasqaykiwan rimasqan mana tupaptinpas allinllata uyariykuy (Col. 4:6).

Runamasinchikpi interesakuspapas respetasqanchiktam qawachina. Yanapayta munaspapas manam vidankupiqa metekunachu (2 Tes. 3:11). Warmiwan otaq qariwan parlaspaqa respetowanmi rimana mana chayqa hukmantam piensanmanku. Chaymi warmiwan otaq qariwan rimaspaqa allinta tanteaspa rimana (Luc. 6:31).

Predicananchikpaq allinta preparakuspaqa imamantapas yachachinanchikpaqmi listo kananchik, wasiyoqpa ima nisqantapas hawkallam uyarisun. Chaynata uyariptinchikqa wasiyoqmi astawan parlariyta munanqa.

Hukkunata atencionwan uyarispanchikqa respetasqanchiktam qawachinchik (Rom. 12:10). Chaynata uyarispam imayna piensasqanta hinaspa imayna sientesqanta chaninchanchik, kallpanchanmantaqmi willasqanchikta allinta uyarinanpaqpas. Chaymi Diospa Palabran niwanchik: “Chaylla uyariqyá kaychik, rimaychikpas allinta tanteaspayá”, nispa (Sant. 1:19).

Astawan yanapay. Runamasinchikta yanapay munasqanchikmi kallpanchawasun paykunapi reparaspa kaqmanta watukuspanchik Diosmanta allinta yachachinapaq. Wasiyoqman manaraq kutichkaspayki piensay imayna tarikusqanpi. Sasachakuyninpaq hina yachachikuykunata akllay hinaspa imayna yanapasqanta qawachiy (Is. 48:17).

Uyarisuqniki imawan sasachakusqanmanta willasuptikiqa chayman hina Bibliapa yachachisqanwan yanapay. Jesucristopa ejemplonta qatipakuy, payqa listom karqa llakisqa runakunata consuelananpaq (Mar. 6:31-34). Tiempochakuy imawan sasachakusqanmanta allinta uyarinaykipaq, mana chayqa wasiyoqmi piensanman mana llakipayasqaykita (1 Ped. 3:8). Chayman hina qellqanchikkunapi yanapakuykunata maskay sasachakuyninta imayna atipananpaq. Ima sasachakuyninmantapas willasuptikiqa ama pimanpas willaychu mana willakunapaq kaptinqa (Prov. 25:9).

Bibliamanta estudiachisqanchik runamasinchikpim astawanqa reparananchik. Diosta mañakuy sapa estudiantepa ima necesitasqanmanta musyanaykipaq hinaspa chayman hina preparakuy. Tapukuy: “¿Imatawanraqtaq kay estudianteqa ruranman Diospa munasqanman hina kawsananpaq?”, nispa. Yanapay Bibliapa yachachisqanta hinaspa “allin yuyayniyoq” sirvientepa horqomusqan qellqakunapi yachachikuykunata chaninchananpaq (Mat. 24:45). Wakinpiqa manapaschá entiendenqachu explicasqallanchikwanqa. Ichapas imatapas kuska rurachwan Bibliapa yachachisqan kasukuyqa allin kasqanta qawachinapaq (Juan 13:1-15).

Biblia estudiaqkunatam sumaqllata yanapana Jehova Diospa kamachisqanman hina kawsanankupaq. Manam llapankuchu chaylla entiendeq otaq kasukuq kanku. Chaymi sapakamata pacienciakuspa yanapana (Filip. 4:5). Diospa Palabranta entiendesqankuman hina cambianankupaqmi yanapana, sonqonkumanta servinankutam Jehova Diosqa munan, manam obligasqachu (Sal. 110:3). Kikin tanteakuyta yachananpaqmi yanapana ichaqa manam rantinpiqa tanteapunachu (Gal. 6:5).

Necesitasqanman hina yanapay. Runakunaman Diosmanta yachachinanpaq kallpanchakuspanpas Jesusqa repararqataqmi ima necesitasqankupipas (Mat. 15:32). Ñoqanchikpas runamasinchik yanapaytaqa atichwanmi wakcha kaspapas.

Runamasinchikpi reparasqanchiktam kaykunapi qawachichwan. Nisyuta rupaptinqa otaq paraptinqa uyariwaqninchikpi reparaspam hinalla predicanapaq otaq yapapiña watukunapaq tanteana. Uyarisunaykipaq tiempon mana kaptinqa yapapiña watukunaykipaq niy. Diosmanta yachay munaq onqoptinqa otaq hospitalpi kaptinqa paypi reparasqaykita qawachiy cartata apachispa otaq watukuspa. Atispaqa apawaqmi mikuychata otaq yanapawaqmi ima necesitasqanpipas.

Wakinqa Biblia estudiasqankuman hinapaschá ñawpa amistadninkunawan manaña juntakusqankurayku sapanku sientekunmanku. Chaymi amistadnin kanaykipaq kallpanchakunayki. Tiempochakuy parlarinaykichikpaq, kallpanchaytaq iñiqmasinchikkunawan amistadta armananpaq (Prov. 13:20). Huñunakuyman rinanpaqpas yanapay, huñunakuypipas kuska tiyaspa yanapay; warmachayoq kaptinqa yachachikuykunata allinta entiendenanpaq yanapay.

Tukuy sonqowanmi yanapana. Runamasinchikta kuyayqa sonqonchikmantam kanan. Chayna kasqantam qawachichwan rimasqanta allinta uyarispa, llampu simiwan rimapayaspa chaynataq kuyapayaspapas. Kuyapayasqanchiktaqa qawachichwanmi rimaspapas otaq ruraspapas.

Runamasinchikpi tukuy sonqonchikwan reparaspaqa Taytanchik Jehova Diospa kuyakuynintawan llakipayakuynintam qatipakuchkanchik. Chaynata ruraspam runamasinchikta yanapanchik Jehova Diosman asuykunankupaq chaynataq Palabranmanta yachanankupaqpas. Diosmanta allin noticiata willakuspaqa ‘amayá kikillanchikpaqchu allintaqa munasun aswanqa wakinkunapaqwanyá’ (Filip. 2:4).