Kaqmanta rimaspa entiendechinapaq

ALLIN yachachiqqa imamanta yachachisqanta entiendechinanpaqmi kaqmanta riman, chayna yachachisqanwanmi uyariqninkunata yanapan aswan allinnin kaq yachachikuykunamanta entiendenankupaq. Yapamanta rimasqaqa astawanmi entiendenku.

Yachachisqanchik mana entiendekuptinqa manam yanapanqachu imayna kawsayninkupi. Entienderuspam ichaqa chaykunapi hinalla yuyaymananqaku.

Chaynata yachachinapaqmi Jehova Diosqa yachachiwanchik. Israelpa mirayninkunamanmi Chunka Kamachikuykunata Sinai orqopi uyarinankupaq huk angelwan willachirqa. Chaymantañataqmi Moisesman qellqasqataña qorqa (Ex. 20:1-17; 31:18; Deut. 5:22). Prometesqan Allpaman yaykunankupaqña kachkaptinkum chay kamachikuykunata Moiseswan kaqmanta willachirqa hinaspam chuya espiritunpa yanapayninwan qellqachirqa Deuteronomio 5:6-21 nisqanta. Chay kamachikuykunawanmi yacharqaku tukuy sonqonkuwan, tukuy kallpankuwan hinaspa tukuy vidankuwan Jehova Diosta servinankupaq, chaytaqa achka kutikamam uyarirqaku (Deut. 6:5; 10:12; 11:13; 30:6). ¿Imanasqa? Jesuspa nisqanman hinaqa ‘punta kaq hatun kamachikuymi’ karqa (Mat. 22:34-38). Jeremiasnintakamam Jehova Diosqa Juda nacionta iskay chunka masnin kutita yuyarichirqa kamachikuyninkunata kasukuyqa ancha allin kasqanmanta (Jer. 7:23; 11:4; 12:17; 19:15). Ezequielnintakamañataqmi soqta chunka masnin kutita willachirqa pim ‘Jehova Dios kasqanta’ huklaw nacionpi kaqkunapas yachanankupaq (Ezeq. 6:10; 38:23).

Jesuspa imayna predicasqanmanta willakuykunapipas kachkanmi yapa-yapamanta imayna yachachisqan. Chaykunam tarikun Mateo, Marcos, Lucas hinaspa Juan sutiyoq librokunapi. Imamantapas yachachispanqa uyariqninkuna entiendenankupaqmi Jesusqa yapa-yapamanta yachachirqa (Mar. 9:34-37; 10:35-45; Juan 13:2-17). Huk-iskay punchawllaña wañuchinankupaq kachkaptinmi mana qonqanankupaq achka kutipi discipulonkunaman Olivos moqopi kaynata nirqa: ‘Qawan-qawanllayá kaychik, manam yachankichikchu imay punchawmi Señornikichik kutimunantaqa’, nispa (Mat. 24:42; 25:13).

Predicaspa. Predicaspaqa munanchikmi willasqanchikta uyariwaqninchikkuna yuyanankuta. Chaypaqqa imamanta willasqanchikman hinam yapamanta rimananchik.

Chaynata ruraspaqa wasiyoqtam yanapasun willasqanchikta yuyananpaq. Willasqanchikman hina entiendechinapaq kaq palabrata Bibliapi leespaqa tapuchwanmi: “¿Ima nisqanmi astawan entiendechisunki?”, nispa.

Parlayta tukuruspapas allinmi kanman imamanta willasqanchikta yuyarichiyqa. Nichwanmi: “Parlasqanchikmanta kayta ama qonqaychu”, nispa. Hinaspam entiendenanpaq kaqllata kaqmanta yuyarichiwaq. Kaynatapas nichwanmi: “Diosqa munanmi enteron Allpa pacha sumaq huerta kananta. Payqa prometesqanman hinam chaynata ruranqa”, nispa. Nichwantaqmi: “Bibliaqa sutillatam qawachin tukupay tiempokunapiña kasqanchikta. Chaymi salvakuyta munaspaqa Diospa munayninmanta yachananchik”, nispa. Otaq nichwanmi: “Qawasqanchikman hinam Diospa Palabranqa sumaq consejokunata qowanchik familiapi sasachakuykunata atipanapaq”, nispa. Wakinpiqa ichapas entiendechinanchikrayku kaqmanta textota leenapaq nichwan, chaypaqqa allintam tanteana.

Yapamanta watukuspaqa otaq Bibliata estudiachispaqa imamanta yachachisqanchikpa tukupayninpi tapukuykunawanmi yanapachikuchwan yachachisqanchikmanta yuyarichinapaq.

Bibliapa yachachikuyninta otaq kamachikuyninta entiendeypi sasachakuptinqa allinmi kanman entiendenankama yanapayninchikqa. Kallpanchakunanchikmi imaynata entiendechinapaq chaynataq yachachisqanchikpi hinalla yuyaymanananpaqpas. Jesuspas discipulonkunata entiendechinanpaqmi hina kaq yachachikuyllamanta achka kutikama yachachirqa (Mat. 18:1-6; 20:20-28; Luc. 22:24-27).

Discursota qospa. Huñunakuypi yachachispaykiqa manam willayllachu-willanayki aswanmi uyarisuqnikikunata yanapanayki entiendenankupaq, yuyanankupaq chaynataq kasukunankupaqpas. Chaypaqmi yuyanankupaq kaqta yapamanta rimanayki.

Ichaqa ama llumpayta rimaychu, mana chayqa uyarisuqnikikunam manaña allintachu uyarinmanku. Chaymi allinta tanteanayki entiendenankupaq kaqta yapamanta rimanaykipaq. Chaykunapi reparaspa preparakuy aswan allinnin kaq yachachikuykunamanta. Uyarisuqnikikunata yanapananpaq kaptinqa huk yachachikuykunatapas maskawaqmi.

Kaqmanta rimaspa allinta entiendechinapaqqa aswan allinnin kaq yachachikuyninkunatam rimayta qallarispalla willawaq. Pisi rimayllapi imamanta yachachinaykipaq kaqta qawachiy tapukuykunata servichikuspa otaq ima sasachakuytapas imayna atipanapaq kasqanta qawachispa. Aswan allinnin kaq yachachikuykunamanta rimaspaqa sapakamamantataqmi willawaq. Rurawaqmi kaynatapas, sapa aswan allinnin kaq yachachikuymanta rimasqaykiman hina entiendenankupaq kaqta yapamanta rimay hinaspaña qatiqninpi kaqta. Discursoyki tukunanpaqña kaptinqa yuyanankupaq kaqkunatam yapamanta rimaspa astawan entiendechinayki. Chaytam rurawaq qallariypi tapusqaykikunata contestaspa otaq tapusqaykiman hina ima sasachakuykunapas imayna allichana kasqanta qawachispa chaynataq kasukuypas otaq mana kasukuypas imapi tukusqanta qawachispa.

Allin yachachiqqa uyariqninkunapim allinta reparan. Chaymi uyariqninkuna entiendeypi sasachakusqankumanta musyaspanqa entiendechinanpaqmi kaqllamanta riman. Allin yachachiqkunaqa manam chaykunallatachu ruranku, uyariqninkunapi reparaspam imaynata yachachinankupaq kallpanchakunku. Allin yachachiq kanapaqqa uyariwaqninchikkunapim reparana chayman hina sumaqta yachachinapaq.