Rimayta qallarispa piensarichinapaq

DISCURSO qoqkuna rimayta qallarisqallankupi uyariqninkuta piensarichiyninkuqa ancha allinmi. Chayna qallarisqankum uyariqninkunata yanapan allinta uyarinankupaq. Predicacionpipas rimayta qallarispalla uyariwaqninchikta mana piensarichiptinchikqa manapaschá uyariyta munanqachu. Huñunakuypipas mana piensarichiptinkuqa manam atencionwanchu uyarinqaku.

Rimayta qallarisqallaykipi piensarichinaykipaq preparakuspaqa tanteanaykim 1) uyarisuqnikikunata piensarichinaykipaq, 2) imamanta yachachisqaykita entiendechinaykipaq, 3) uyarisuqnikikunata yachachisqayki imapi yanapasqantapas sutillata qawachinaykipaq. Wakin discursopiqa kay kimsantin yanapakuytam tupasqanman hina servichikuwaq wakinpim ichaqa sapakamata.

Uyarisuqnikikunata piensarichiy. Manam piensanaykichu discursoykita uyarinankupaq huñunakuypi kaqkuna listo kasqankutaqa. ¿Imanasqa? Chaypi kaqkunaqa sapakamam ima sasachakuywanpas tarikunku. Ichapas familianmanta otaq imamantapas llakisqa kachkanku. Chaymi discurso qoqkunaqa kallpanchakunanku uyariqninkunata piensarichinankupaq. ¿Imaynatam piensarichinmanku?

Jesusmi Ancha Reqsisqa Yachachikuyninpi rimayta qallarirqa kaynata nispan: ‘Mayna kusisqam wakchakunaqa kankichik. Mayna kusisqam kankichik kunan yarqaymanta kaqkunaqa. Mayna kusisqam kankichik kunan waqaqkunaqa. Mayna kusisqam kankichik cheqnisuptikichikqa’, nispa (Luc. 6:20-22). ¿Imanasqataq Jesuspa chayna rimasqanqa uyariqninkunata piensarichirqa? Pisi rimayllawan sasachakuyninkumanta rimasqanraykum. Sasachakuyninkumanta unay rimananmantaqa qawachirqam chayna sasachakuypi kaspankupas kusisqa kawsakunankumanta, chaymi uyariqninkunaqa astawan uyariyta munarqaku.

Tapukuykunawan piensarichiypas ancha allinmi kanman uyarisuqnikikunapa mana yachasqankumanta tapuptikiqa, mana chayqa manam atencionwanchu uyarisunki. Penqarichinaykipaq otaq sientechinaykipaq hina tapunaykimantaqa piensarinankupaq hinam tapunayki. Piensarinankupaq tapuruspapas tumpachata suyaykuy. Atencionwan uyarisusqaykipi reparaspaqa piensarichisqaykimantam cuentata qokunki.

Experienciakunamanta willaspapas piensarichiwaqmi. Ichaqa manam allinchu kanman hukmanyanankupaq otaq penqarichinaykipaq hina willaptikiqa nitaq imayna yanapasqanta mana qawachiptikipas. Discursoykipa qallariyllanpi ima experienciamantapas willasqaykiqa imamanta yachachisqaykita allinta entiendenankupaqmi yanapanan. Chay experienciamanta llapanta willanaykimantaqa yachachisqaykiwan tupaq kaqkunallata willay.

Wakin discursantekunaqa rimayta qallarispallam ima noticiamantapas otaq reqsisqa autoridadpa ima nisqanmantapas willanku. Chayna piensarichiyqa ancha allinmi yachachisqaykiwan tupaptinqa chaynataq uyarisuqnikikunata yanapaptinqa.

Diosta Servinapaq Huñunakuypi yachachinayki kaptinqa pisi rimayllawan piensarichispa qallariy. Huñunakuypi lliw runakunapaq discursota qospapas qallariypi hayka minutopi rimanaykipaq kasqanman hinalla rimay. Tiempoykitaqa servichikunayki imamanta yachachisqaykita astawan entiendechinaykipaqmi.

Wakin kutipiqa ichapas uyarisuqnikikunaqa yachachisqaykita mana uyariyta munanqakuchu otaq contraykipipas kanqaku. ¿Imaynatam paykunata piensarichiwaq? Esteban sutiyoq cristianotam judiokuna huñunakunanku corteman piñallaña aparurqaku, Estebanqa chuya ‘espiritupa huntasqan yachayniyoqmi’ karqa. Chaymi mana manchakuspan Cristopi iñisqanmanta cortepi rimarqa. ¿Imaynatam piensarichirqa? Respetowan hinaspa uyariqninkunapa creesqankuman hinam nirqa: “Wawqellaykuna, taytakuna, uyariykuwaychik. Kancharichkaq Diosninchikmi abuelonchik Abrahanman Mesopotamia lawpi rikuriykurqa”, nispa (Hech. 6:3; 7:2). Apostol Pablopas Atenas llaqtapi Areopago sutiyoq huñunakunanku sitiopim Diospi mana iñiq runakunaman nirqa: “Atenas llaqtayoq taytakuna, qawasqayman hinaqa dioskuna serviqllañam qamkunaqa kasqankichik”, nispa (Hech. 17:22). Estebanpas Pablopas rimayta imayna qallarisqankuwanmi uyariqninkunata allinta piensarichirqaku.

Predicaspapas uyariwaqninchikta piensarichinapaqmi kallpanchakunanchik. Wasiyoqqa ichapas ima ruraypipas afanakuchkan. Chaymi wakin llaqtakunapiqa qonqaymanta watukuspankuqa imamanta willanankuta chaylla willanku, wakin llaqtakunapiñataqmi pim kasqankuta puntata willakunku hinaspañam predicanku (Luc. 10:5).

Sumaqllata rimasqanchikqa yanapawasunmi piwanpas parlarinapaq. Uyariwaqninchikpa yachay munasqanmanta rimayqa allinmi kanman. ¿Imaynatam tanteachwan yachay munasqanmanta rimanapaq? ¿Imatataq rurachkarqa wasinman chayaruptinchik? Chakrantachu otaq huertantachu qorachkarqa, carrontachu allichachkarqa, yanukuchkarqachu, pachantachu taqsachkarqa otaq warmachankunatachu cuidachkarqa, periodicotachu leechkarqa icha imapas pasasqantachu qawachkarqa. ¿Imamantam cuentata qokuwaq wasinpi imakunapas qawasqaykiwan? Ichapas challwiru kasqanta, musica tocaq kasqanta otaq viajaq kasqanta. Runakunaqa anchatam preocupakunku ima noticiatapas radiopi uyarisqankuwan otaq televisionpi qawasqankuwan. Chaykunamanta rimaptinchikqa otaq tapuptinchikqa parlaytam munanmanku.

Samaria llaqtayoq warmiman Jesuspa predicasqanmi allin ejemplo imayna predicayta qallarinapaq (Juan 4:5-26).

Rimayta imayna qallarinapaqqa allintam preparakuna, astawanraqmi predicananchik lawta sapa kuti predicaspaqa. Mana chayqa manam atisunchu Diosmanta allin noticia willakuyta.

Imamanta yachachinaykipaq kaqta yapamanta rimay. Huñunakuyta qallarichiqmi imamanta yachachinaykipaq kaqta willanqa. Chayna kaptinpas rimayta qallaykuspallam imamanta yachachinaykipaq kaqta yapamanta willawaq. Piensarichinaykipaq rimaspapas imamanta yachachinaykipaq kaqta sutillata qawachiy hinaspa discursota qosqaykiman hina chayta entiendechiy.

Jesusmi discipulonkunata kamachirqa: ‘Rispayá willakamuychik, Diospa munaychakuyninmi hichparamunña’, nispa (Mat. 10:7). Kay tiemponchikpaqpas nirqam Diospa Gobiernonmanta ‘allin noticiata willakunanchikpaq’ (Mat. 24:14). ‘Diospa Palabranmanta willakunapaqmi’ kamachisqa kanchik (2 Tim. 4:2). Ichaqa Bibliata manaraq kichachkaspam otaq Diospa Gobiernonmanta manaraq willakuchkaspam runakunata imakuna sasachasqanmantaraq rimana. Kaykunamantam rimachwan: mana allin ruraqkuna mirasqanmanta, trabajo mana kasqanmanta, guerrakunamanta, mozo-sipaskuna sasachakuypi kasqankumanta, onqoykunamanta otaq wañuymantapas. Chaykunamanta rimaspapas allin noticiamanta willanaykipaqyá kallpanchakuy. Sasachakuykunamanta astawan rimanaykimantaqa Diospa Gobiernonmanta willay.

Yachachisqayki imayna yanapasqanta qawachiy. Yachachisqayki imayna yanapasqanta qawachiptikiqa huñunakuypi kaqkunam yaqa llapanku uyariyta munanqaku. ¿Yanapachikunqakuchu yachachisqaywan? ¿Allinninkupaq kasqanta yachaspachu uyariyta munanqaku? Preparakuspaqa reparay imayna tarikusqankupi, imakunawan sasachakusqankupi otaq imamantapas imayna piensasqankupi. Chaykunapi reparaspaqa uyarisuqnikikunatam allinta yanapanki. Chayta qawachiy rimayta qallarisqallaykipi.

Huñunakuypi yachachispapas otaq predicaspapas imamanta yachachisqayki uyarisuqnikita imayna yanapasqanmanta qawachiptikiqa allintam uyarisunki. Chaypaqmi qawachiwaq ima sasachakuyninpipas ima necesitasqanpipas otaq imamanta yachay munasqanpipas yachachisqayki imayna yanapasqanta. Chaypaqqa allintam preparakunayki.

Imaynata piensarichinapaq. Piensarichispa rimayqa ancha allinmi ichaqa imayna rimasqaykiwanpas piensarichiwaqmi.

Piensarichinaykipaq kaq palabrakunaqa mana sasachakuspa entiendenankupaqmi kanan, chaypaqmi allinta tanteanayki. Yaqa llapanpim allin kanman pisi rimayllawan qallariynikiqa. Discursota qospaykiqa rimayta qallarinaykipaq kaqkunataqa ichapas qellqawaq otaq tukuy sonqoykiwan umallaykimanta rimawaq. Discursoykipa qallariyllanpi piensarichinaykipaq kaqta hawkalla rimasqaykiqa yanapasunkim qatiqninpi yachachinaykipaq kaqkunamantapas hawkalla rimanaykipaq.

Haykapim tanteana piensarichinapaq kaqta. Chaytaqa sapakamam tanteana. Allin yachachiq wakin discursantekunam ninku manaraq preparakuchkaspa piensarichinankupaq kaqtaraq qellqasqankumanta, wakinñataqmi ninku preparakuyta tukuruspaña qellqasqankumanta.

Imayna rimaywan qallarinaykipaq kaqta manaraq piensachkaspam imamanta yachachinaykipaq kaqta chaynataq aswan allinnin kaq yachachikuyninkunamanta allintaraq entiendenayki. Discurso qonaykipaq bosquejoyki qellqasqaña kaptinqa imamanta yachachisqanta entienderuspa piensarichinaykipaq tanteasqaykitam anotawaq. Imayna rimaywan piensarichisqaykiqa allinmi kanqa imamanta yachachisqaykipi hinaspa uyarisuqnikikunapi reparaptikiqa.