Tapukuykunawan piensarichinapaq

TAPUKUYKUNAQA contestanapaq kasqanraykum uyarisuqnikikunata kallpanchan yachachisqaykita hinalla uyarinankupaq. Tapukuykunata ruraspam piwanpas parlarinchik. Huñunakuypi yachachispapas otaq Bibliamanta estudiachispapas uyarisuqnikikunata kallpanchay imamanta yachachisqaykipi piensarinankupaq otaq imamantapas hinalla uyarinankupaq. Tapukuykunawan piensarinankupaq yanapaspaqa hinalla uyarinankupaqmi kallpanchanki. Piensarichinaykipaq otaq imam piensasqanmanta yachanaykipaqqa allinta tanteaspam tapunayki.

Piwanpas parlarinapaq. Predicaspapas uyarisuqniki rimarinanpaq kallpanchay.

Wakin iñiqmasinchikkunam parlayta qallarinku kaynata nispalla: “¿Yaqachu haykapipas kayta tapukurqanki . . . ?”, nispa. Uyarisuqnikipa yachay munasqanmanta tapuspaqa atinkim paywan allin parlariyta. Mana piensasqanmanta tapuptikiqa ichapas astawan yachayta munanman. Imamantapas yachachinaykipaqqa ichapas tapuwaq: “¿Ima niwaqtaq kaymanta . . . ?”, “¿Ima ninkitaq . . . ?” hinaspa “¿Haykapipas tukunmanchu . . . ?”, nispa.

Diosta serviq Felipem Etiopia llaqtayoq huk runaman asuykuspan uyarirqa Isaiaspa qellqasqan libro leesqanta hinaspam tapurqa: “¿Entiendenkichu chay leesqaykipa imam nisqanta?”, nispa (Hech. 8:30). Chayna tapusqanmi yanaparqa Jesucristomanta allinta explicananpaq. Chaynallataqmi wakin iñiqmasinchikkunapas Felipe hina tapuspanku Diosmanta yachay munaqkunata yanapanku.

Achka runakunam uyariyta munanku imam piensasqankumanta uyariptinchikqa. Chaymi imamantapas tapuspaqa allinta uyarinayki imayna contestasusqaykita. Imaynataña nisuptikipas sumaqllata contestay. Rimasqankuna alabanapaq kaptinqa alabaykuy. Huk kutipim Diospa leynin yachachiq runa ‘yachaywan rimaruptin’ Jesusqa alabaykurqa kaynata: “Manam llumpayñachu faltasunki Diospa munaychakusqanman yaykunaykipaq”, nispa (Mar. 12:34). Imayna rimasqan yachachisqaykiwan mana tupaptinpas rimarisqanmantayá agradecekuy. Ichapas imayna rimasqanwan cuentata qokuwaq sonqonpi imam kasqanmanta chayman hina Diosmanta yachachinaykipaq.

Allinnin kaqkunamanta entiendechinapaq. Huñunakuypi yachachispapas otaq piwan rimaspapas tapuykunawanmi aswan allinnin kaq yachachikuykunamantaqa entiendechiwaq. Tapukuykunaqa kanan uyarisuqnikikunapa yachay munasqankuman hinam. Tapuwaqtaqmi mana yachasqanku kaqkunamantapas. Tapuspaykiqa piensarinankupaq tumpata suyaykuy qatiqninpi rimasqaykita hinalla uyarinankupaq.

Huk kutipim profeta Miqueas tapukuykunawan piensarichirqa. Yachaytam munarqa yupaychaqninkunamanta Dios imam mañasqanta, hinaspam piensarichinanpaq tawa kutipi tapurqa. Chayna tapukuykunam uyariwaqninchikkunata piensarinankupaq yanapan (Miq. 6:6-8). ¿Manachu qampas chaynata rurawaq?

Ima yachachikuymantapas piensarichinapaq. Tapukuykunawan piensarichispataqmi ima willakuymantapas entiendechichwan. Jehova Diospas tapukuykunawanmi Israel casta runakunata piensarichirqa, nirqam: “Kuyaykichikmi”, nispa. Chayna kuyasqanta mana reqsikuptinkum tapurqa: “¿Manachu Esauqa Jacobpa wawqen karqa?”, nispa (Mal. 1:2-10, NM). Jehova Diosqa Edom llaqtapi kaqkunatam cheqnirqa mana allinkuna rurasqankumanta, chayrayku purmachisqa kasqantam qawachirqa. Chaymi rikchanachiykunawan hinaspa tapukuykunawan israelitakunata piensarichirqa Diospa kuyakuynin mana reqsikusqankumanta. Wakin kutipim mana kasukuq sacerdotekunata tapurqa imam piensasqankumanta rimanankupaq hinaspam Jehova Diosqa chayman hina contestaspan piensarichirqa. Chayna tapukuykunawan piensarichisqanqa admirakuypaq kasqantam qawachiwanchik.

Wakin discursantekunapas tapukuykunawanmi allinta yachachinku. Tapusqankuta mana contestaptinkupas uyariqninkuna piensarinankupaqmi yanapan.

Bibliamanta estudiachispapas estudiante rimarinanpaqmi tapuna. Mayqen yachachikuymantapas leespalla contestaspanqa mana entiendesqantam qawachichkanman. Chaymi yachachisqanchikta entiendenanpaqqa sumaqllata tapuspa piensarichina. Bibliapa yachachisqanman hina aswan allinnin kaq yachachikuykunamanta contestasunaykipaq kallpanchay. Tapuwaqtaqmi: “¿Imatam entiendenki kay yachachikuymanta? ¿Imanasqam ancha allin? ¿Imaynatam vidanchikpi yanapawachwan?”, nispa. Chaynata yachachispaqa allintam yachachinki, entiendesqaykiman hina yachachinaykimantaqa tapuykunawanmi estudianteta piensarichinayki ‘entiendesqanman’ hina Diosta yupaychananpaq (Heb. 5:14).

Entiendeypi sasachakuptinqa pacienciakuy. Ichapas yachachisqaykikunata tupachichkan warma kasqanmantaraq creesqankunawan. Entiendenanpaq kaqkunallawan yachachiy ichaqa Bibliapa nisqanwan yanapachikuspa. Yachachisqaykikunata allinta entiendechiy rikchanachiykunawan chaynataq tapukuykunawan.

Imam piensasqanmanta rimarinanpaq. Manam lliw runachu tapusqanchiktaqa sonqonpi kasqanman hina contestanku. Wakinpiqa ichapas contestawachwan agradonchikpaq kaqkunallata. Chaymi reparananchik imayna contestawasqanchikpi (Prov. 20:5). Jesus hinam ñoqanchikpas tapuchwan: ‘¿Creenkichu kaypi?’, nispa (Juan 11:26).

Jesuspa nisqanwan wakin discipulonkuna hukmanyaruspa pasakuptinkum imam piensasqankumanta apostolninkunata tapurqa: “¿Qamkunapas pasakuytachu munankichik?”, nispa. Hinaptinmi Pedro nirqa: “Señor ¿pimantaq riymanku? Qampa rimasqaykiqa wiñay kawsay qokuqmi. Ñoqaykuqa ñam creenikuña [. . .] Diosmanta Hamuqqa mana huchayoq kasqaykita”, nispa (Juan 6:67-69). Huk kutipipas Jesusqa discipulonkunatam tapurqa: ‘¿Diosmanta hamuq Runamantaqa pim kasqaytataq runakuna rimanku?’, nispa. Imam piensasqankumanta rimanankupaqmi kaqmanta tapurqa: “Qamkunaqa ¿pim kasqaytataq ninkichik?”, nispa. Hinaptinmi Pedroñataq nirqa: “Qamqa kanki kawsaq Diospa Churin Cristom”, nispa (Mat. 16:13-16).

Bibliamanta estudiachispapas allintam yanapawaq imam piensasqanmanta tapuspaqa. Ichapas tapuwaq: “¿Imatataq kaymanta piensanku estudiaqmasikikuna otaq llamkaqmasikikuna?”, nispa. Hinaspam niwaq: “¿Ima ninkitaq qamqa?”, nispa. Imam piensasqanta yachaspaqa allintam yanapanki.

Astawan entiendechinapaq. Tapukuykunawantaqmi imamantapas astawan entiendechichwan. Romanos 8:31, 32 nisqanman hinam apostol Pablopas kaynata tapuspan entiendechirqa: ‘Favorninchikpi Dios kaptinqa ¿pitaq imanawachwan? Llapallanchikpa rantinchikpi Churin wañunantapas Diosqa manam harkakurqachu, aswanraqmi paytaqa wañunanpaq entregaykurqa. Hinaspaqa ¿manachum paymanwan kuska tukuy imakunatapas qowasunchik?’, nispa. Pabloqa chayna tapukuykunawanmi imamanta yachachisqanta astawan entiendechirqa.

Babiloniapa reynin juzgasqa kananmanta nispanmi profeta Isaias mana iskayrayaspan nirqa: “Llapallan kamachiq Tayta Diosmi chaynata tanteachkan. ¿Pitaq paypa tanteasqanta michakunman? ¿Pitaq paypa castigananta harkakunman?”, nispa (Is. 14:27). Chayna tapuykunawanmi allinta entiendechirqa.

Pantasqankumanta cuentata qokunankupaq. Onqoq runata manaraq sanoyachichkaspanmi fariseokunatawan Diospa leynin yachachiqkunata Jesus tapurqa: “¿Leyqa permitinchu samana punchawpi sanoyachinata?”, nispa. Onqoq runata sanoyarachispanñataqmi paykunata nirqa: “Churikichikpas otaq bueyesnikichikpas uchkuman urmaykuptinqa ¿manachum chaypunilla horqoruwaqchik samana [otaq sabado] punchaw kachkaptinpas?”, nispa (Luc. 14:1-6). Uyariqninkunaqa manam ima niytapas atirqakuchu. Chayna tapukuykunawanmi Jesusqa fariseokunatawan Diospa leynin yachachiqkunata piensarichirqa pantaypi kasqankumanta cuentata qokunankupaq.

Wakinpiqa cheqap cristianokunapas pantay piensasqankuwanmi mana allinta ruranmanku. Apostolkunapa tiemponpim wakin cristianokuna autoridadkunamanraq apanakurqaku sasachakuyninkuta kikinkupuralla allichananku kachkaptinpas. ¿Imaynatam apostol Pabloqa yanaparqa? Tapukuykunawanmi entiendechirqa quejanakuyman manaña apanakunankupaq (1 Cor. 6:1-8).

Yachachisqaykiman hina tapukuykunawan piensarichispaqa qampas allintam entiendechinki. Ichaqa ancha respetowanmi tapunayki mayornikikunata, mana reqsisqaykikunata chaynataq autoridadkunatapas. Tapukuykunawanyá sumaqta entiendechiy Diospa cheqap yachachikuyninkunamanta.