Mozo-sipas ¿imatam vidaykiwan ruwanki?

HUK sipasmi nirqa: “Ancha kusisqa kaytam munani”, nispa. Chayna kawsakuytaqa qampas munankichá ¿aw? Ichaqa, ¿imaynatam chayna kusikuyta haypawaq? Yaqapaschá televisionpiwan radiopi willakuykuna, estudiaqmasikikuna hinaspa profesornikipas ninqaku kusisqa kawsanapaqqa achka qollqeyoq hinaspa allin educacionniyoqmi kana nispanku.

Bibliam ichaqa mozo-sipaskunata nin chaykuna maskayqa “wayrata hapirunapaq qatikachay” hina kasqanta (Eclesiastes 4:4). Wakin mozo-sipaskunallam atinku reqsisqa hinaspa apu kaytaqa, ichaqa sasachakuypim tarikunku. Gran Bretaña nacionmanta huk mozom allin educacionniyoq kananpaq estudiarqa, paymi tiempopa risqanman hina cuentata qokurqa achka qollqeyoq hinaspa reqsisqa kayqa yanqapaq kasqanta. Chay ruwayqa manamá Diosta servinaykipaqqa yanapasunkichu (Mateo 5:3). Chaymantapas 1 Juan 2:17 nin: “Kay pachapi mana allin ruraykuna[qa] tukuruqllam”, nispa. Kay Pachapi tukuy imayoq hinaspa reqsisqa kayqa pisi tiempollapaqmi.

Chaymi Eclesiastes 12:1 nin: “Mozollaraq kachkaspaykiyá unanchaqnikimanta yuyariy”, nispa. Jehova Diosta servispallam kusisqaqa kanki. Ichaqa, ¿imatam puntata ruwanayki? ¿Ima ninantaq Diosta serviyqa?

¿Imatam ruwanayki Jehova Diospa testigon kanaykipaq?

Puntataqa Dios serviytam munanayki, chaytaqa manam Diosta tayta-mamayki servisqankuraykullachu atiwaq. Kikikim Jehova Dioswan amistadta ruwanayki, chaypaqmi yanapasunki huk mozopa nisqanman hina Diosta mañakuyniki (Salmo 62:8; Santiago 4:8).

Chaymantapas kasukunaykim Bibliapa kayna nisqanta, ninmi: “[Yachanaykim] Diospa munasqanta, imam allin rurayta, imam agradonpaq kasqanta hinaspa imam allinpuni kasqanta”, nispa (Romanos 12:2). ¿Wakinpiqa iskayrayarqankichu Diosmanta tayta-mamayki yachachisusqaykimanta? Chayna kaptinqa kikiki Bibliata estudiay hinaspa Bibliamanta horqosqa qellqakunatapas. Diosta reqsinaykipaqqa estudiasqaykipim yuyaymananayki, chaynapim sonqoykiman chayanqa hinaspa Jehova Diostapas astawan kuyanki (Salmo 1:2, 3).

Yachasqaykimanta estudiaqmasikikunaman willay. Chaymantañataq Diosmanta wasin-wasin willakuy. Wakinpiqa penqakunkipaschá estudiaqmasikikunawan tupaspayki. Ichaqa Bibliam niwanchik allin noticiamanta willakuspa mana penqakunapaq (Romanos 1:16). ¿Imanasqa? Ñoqanchikqa huk sumaq suyakuymantam willakunchik, chaymi mana penqakunachu.

Tayta-mamayki Testigoña kaptinqa yaqapaschá Diosmanta willakuq lloqsichkankiña. Ichaqa atiwaqmi Bibliawan runakunaman yachachiyta, revistakunatawan tratadokunata saqenallaykimantaqa. Chayta ruwanaykipaqqa tayta-mamaykipa hinaspa yuyayniyoq cristianokunapa yanapakuyninta maskay. Kallpanchakuytaq Diosmanta willakuqña kanaykipaq.

Tiempopa risqanman hinam kallpanchasqa tarikunki Diosman qokunaykipaq otaq payllataña servinaykipaqpas (Romanos 12:1). Diosqa munantaqmi ‘salvacionmanta willakunanchikta’ (Romanos 10:10). Manaraq bautizakuchkaspaykim puntataqa Diosta mañakuspa prometekunayki servinaykipaq (Mateo 28:19, 20). Amayá harkachikuychu hamuq punchawkunapi pantarunaykimanta manchakusqaykiwanqa. Diosta mañakuptikiqa ‘hatu-hatun atiytam’ qosunki qaqa hina sayanaykipaq (2 Corintios 4:7; 1 Pedro 5:10).

Bautizakuspaykiqa Jehova Diospa testigonñam kanki (Isaias 43:10). Chaytam imayna kawsasqaykipi qawachinayki, ‘manañam kikillaykipaqñachu kawsanki’ (Mateo 16:24). Wakinpiqa yaqapaschá ‘Diospa munaychakusqanta puntapi churasqaykirayku’ imapas munasqaykita otaq maskasqaykita saqenayki kanqa (Mateo 6:33). Diosman qokuspaykiqa hinaspa bautizakuspaykiqa atinkim kaykunata ruwaspa Diosta astawan serviyta.

Tukuy tiempoykiwan Diosta serviy

● Precursormi kawaq. Precursor kayta munaspaykiqa puntatam bautizakunayki hinaspapas tiempochakunaykim Diosmanta willakuspa sapa killa 70 horata ruwanaykipaq. Chayna ruwaymi yanapasunki allin willakuq hinaspa allin yachachiq kanaykipaq. Achka precursorkunam kusisqa tarikunku estudiachisqanku runakuna bautizakuptin. ¡Manamá ima llamkaypas chayna kusikuytaqa qowanchikmanchu!

Yaqa llapallan precursorkunam iskay-kimsa punchawlla llamkanku mantienekunankupaq. Achkam tayta-mamankupa oficionta yachanku otaq estudiasqankupi imapas yachasqankuwan llamkanku. Imatapas estudianaykipaq tantearuspaykiqa, tukuy tiempoykiwan Jehova Diosta servinaykipaqyá chayqa kachun. Amayá qollqesapa kanaykipaqchu.

Precursorkunaqa manam llamkayllamanchu qokurunku, astawanqa runakunatam yanapanku wiñay kawsayta haypanankupaq. ¿Atiwaqchu precursor kayta? Precursorkunaqa atinkum astawan Dios serviyta. Wakinkuqa Diosmanta willakuqkunapa mana ancha kasqanmanmi rinku, wakinkuñataq huk rimayta yachanku chay rimaypi yanapakunankupaq. Precursor kayqa ancha kusikunapaqmi.

● Diospa Gobiernonmanta Willakuqkunapaq Escuelamanmi riwaq. Kay escuelaqa precursor regularkunata astawan yanapananpaqmi iskay killa apakun, chaynapi mana predicaqkunapa kasqanpi yanapakunankupaq. Paykunaqa pimantapas aswan allin yachachiq Jesucristota qatipakuspankum ninku: “Kayqaya ñoqa kaypi kachkani [. . .] ñoqatayá kachaway”, nispa (Is. 6:8; Juan 7:29). Huklawman astakuptikiqa manapaschá tukuy imaykikunachu kanqa. Chaylawpi imayna kawsasqanku, rupaywan chiri chaynataq mikuypas manapaschá llaqtaykipi hinachu kanqa. Huk rimaytapas yachanaykichá kanqa. Kay escuelaqa solterokunapaqwan solterakunapaqmi chaynataq casado warmi-qarikunapaqmi, paykunam rinmanku 23 watanmanta 65 watankama, chaynapim Jehova Diospa llaqtanpi astawan yanapakuyta atinqaku.

● Betel wasipim llamkawaq. Chay wasipiqa mana imallapaqmi llamkanku. Wakinkuqa Bibliamanta horqosqa qellqakunatam ruwanku, wakinkuñataqmi Betel wasita hinaspa maquinakunata allichanku otaq imata ruwaspapas yanapakunku. Paykunaqa kusisqam tarikunku enteron Pachapi iñiqmasinkuta imapas ruwasqankuwan yanapaspanku. Kaykuna ruwayqa Jehova Diospa agradonpaqmi.

Yaqa llapantam Betelman riqkunataqa imapipas llamkanankupaq yachachinku, wakillanmi imapas yachasqankupiqa llamkanku. Paykunaqa manam imatapas chaskinankuraykuchu llamkanku, aswanqa kusisqam tarikunku chaypi imapas ruwasqankuwan hinaspa imayna kawsasqankuwanpas. Betelpi llamkaq huk mozom nin: “Imam horallapi imapas ruwayqa sasam, ichaqa achka bendicionkunatam chaskirqani. ¡Chayqa kusikunapaqmá!”, nispa.

● Wasikunatam hatarichiwaq. Paykunaqa Betel wasikunata hinaspa Huñunakunapaq Salonkunata ruwaypim yanapakunku. Kay ruwayqa Salomonpa tiemponpi templota ruwasqankuman hinam ancha chaninniyoq (1 Reyes 8:13-18). Wasikuna hatarichiypi llamkaqkunaqa Betel wasipi llamkaqkuna hinam allin cuidasqa kanku. Paykunaqa Jehova Dios hatunchasqa kananpaqmi llamkanku.

Tukuy vidaykiwan Diosta serviy

Jehova Diosta serviyqa ancha kusikunapaqmi. ¿Atiwaqchu tukuy tiempoykiwan Dios serviyta? Chayna kaptinqa rimay tayta-mamaykiwan, congregacionpi ancianokunawan hinaspa congregacionkunata watukuq ancianowan. Sichu Diospa Gobiernonmanta Willakuq Escuelaman riyta munanki otaq Betel wasipi llamkayta munanki, chayna kaptinqa asambleapi apakuq huñunakuyman riy.

Ichaqa wakinkum onqosqankurayku, familiankuta mantienenankurayku otaq imapas sasachasqanrayku mana atinkuchu tukuy tiemponkuwan Dios serviytaqa. Ichaqa llapallan cristianokunam kay kamachikuyta mana qonqanankuchu: “Diosnikitam kuyanki tukuy sonqoykiwan, tukuy vidaykiwan hinaspa tukuy yuyaynikiwan”, nisqanta (Mateo 22:37). Jehova Diosqa munanmi tukuy atisqaykita paypaq ruwanaykita hinaspa munayninta puntapi churanaykitapas. Chaynaqa kallpanchakuyá Dios serviynikipi ñawparinaykipaq. “Mozollaraq kachkaspaykiyá unanchaqnikimanta yuyariy”, chayta ruwaspaykiqa wiñay kawsaytam chaskinki.

Kaypi Bibliapa textonkunaqa horqosqam kachkan Chuya Qellqa sutichasqa Bibliamanta. Maypipas NM niq tarikuptinqa horqosqam kachkan castellanopi ruwasqa Traducción del Nuevo Mundo de las Santas Escrituras (con referencias) sutichasqa Bibliamanta.