Demoniokunataqa qipanchananchikmi

¿YUYACHKANKICHU imanasqa Diospa huk kaqnin angelnin satanas diablopi rikurirusqanta?... Yupaychasqa kayta munaspanmi Diospa contranpi churakurqa. Ichaqa, ¿sapallanchu chayta ruwarqa?... Manam, demonionkunapiwanmi utaq wakin angelkunapiwanmi (Apocalipsis 12:9).

¿Jehova Dios kasqanta yachankuchu demoniokuna?... Bibliaqa ninmi ‘demoniokunapas Dios kasqantaqa yachasqankuta’ (Santiago 2:19). Ichaqa manchakuchkankum mana allinkuna ruwasqankurayku chinkachisqa kanankuta. ¿Imakunatataq ruwarqaku?...

Bibliaqa willakunmi chay angelkunaqa hanaq pachamanta kay pachaman runayaruspa hamusqankuta. Chaytaqa ruwarqaku buenamoza warmikunawan puñunankupaqmi (Genesis 6:1, 2; Judas 6). Ichaqa, ¿allinchu karqa chay ruwasqanku?...

Manam, runakunallam warmi-qari puñunankupaqqa unanchasqa karqaku. Chayna puñuptinkum warmi wiksayakuptin wiksanpi wawacha wiñan. Ichaqa Diosqa munan casarasqa kaqkunalla warmi-qari puñunankutam. Chaynapi chay wawacha tayta-mamanpa uywasqan kananpaq. Angelkunaqa manam chaypaqchu unanchasqa karqaku.

Ichaqa chay angelkuna chay warmikunawan puñuruptinkum churinkuqa hatunkaray runakuna wiñaruspa maqakuqllaña piña runakuna karqaku. Hinaptinmi Diosqa nisyullay-nisyu parata kachaykamurqa mana allin runakunata chinkachinanpaq. Allin runakuna mana wañunankupaqñataqmi kasukuqnin Noeyta nirqa hatu-hatun buqueta ruwananpaq. Chaykunata mana qunqananchiktam Jesusqa munan (Genesis 6:3, 4, 13, 14; Lucas 17:26, 27).

Ichaqa, ¿imatam chay runayaruq angelkunaqa ruwarqaku parakamuyta qallaykuptin?... Runa kayninkuta saqispam hanaq pachaman kutikurqaku. Ichaqa mana allinta ruwasqankuraykum demonionkunaña rikurirurqaku. Hinaptinqa, ¿imapim tukurqa chay hatunkaray mana allin churinkuna?... Paykunaqa Diosta mana kasukuqkunawan kuskam wañururqaku.

Chaykuna kasqan qipamanqa manañam Diosqa saqirqachu mana allin angelkuna runayanankutaqa. Ichaqa hinallam chay demoniokunaqa runakunata tanqachkanku mana allinkunata ruwanankupaq. ¡Aswanraqchá kunanqa kay pachaman wischumusqa kasqankurayku chaytaqa ruwachkanku!

¿Demoniokunata rikuyta atichwanchu?... Manam, paykunaqa wayra hina mana rikuy atinam kanku. Chaywanpas bibliapa nisqanpi hinam paykunapas chaynataq ‘satanaspas llapallan runakunata pantachichkanku’ (Apocalipsis 12:9, 12).

¿Ñuqanchiktapas pantarachiwachwanchu?... Arí, mana musyayllatam pantarachiwachwan. Ichaqa manam manchakunanchikchu. Jesusmi nirqa: ‘Diabloqa manam ñuqataqa munaychakuwanchu’, nispa. Jehova Dioswan kaptinchikqa manam diablopas nitaq demoniokunapas imanawasunchu (Juan 14:30).

Chaymi allinta yachananchik imakunawan demoniokuna pantarachiwananchikmanta. Tapusqayki, ¿ima mana allintataq demoniokunaqa ruwarqaku kay pachaman hamuspanku?... Arí, mana ruwanankutam ruwarqaku warmikunawan puñuspanku. Chaymi kusikunku kunanpas wakin runakuna mana casado kachkaspa warmi-qari puñuptinku. Ichaqa, ¿pikunallataq warmi-qari puñunanku?... Arí, casarasqa kaqkunallam.

Kunan tiempopiqa mozo-sipaskunapas casado hinañam warmi-qari puñukunku. Diosqa qari kayniyuqta hinaspa warmi kayniyuqtam runataqa unancharqa (Deuteronomio 23:1). Chaynataqa unancharqa qaripas warmipas casarakuspankuña kuska puñunankupaqmi. Runakunam ichaqa mana allinkunata ruwaspa demoniokunapa munayninta ruwachkanku. Chaymi mana allinchu kanman warmachakunapas qari kayninkuta hinaspa warmi kayninkuta llachpanakuspa pukllayninkuqa. Manamá demoniokuna kusichiytaqa munachwanchu ¿aw?...

Chaymantapas demoniokunaqa, ¿imata runakuna ruwaptinkutaq kusikunku?... Maqanakuptinkum (Salmo 11:5). Maqakuqllaña runakunaqa mana allinta ruwaspankum hukkunata ñakarichinku. Chaynam karqaku demoniokunapa hatunkaray churinkunapas.

Demoniokunaqa kusikunkutaqmi runakunata manchachispankupas. Wakinpiqa wañukuqkunapa ayrin-ayriyuq kaspankum kaqllataña rimankupas. Hinaspam runakunata pantachinku “wañukuqpa animanmi purikuchkan” nispa ninankupaq hinaspa paykunawan rimay atisqankuta piensanankupaq.

Chaynaqa amayá saqikusunchu satanaswan demoniokuna pantarachiwananchiktaqa. Bibliapim willakun ‘satanasqa allin ruwaq angelman rikchakusqanta’ hinaspa ‘serviqninkunapas allin serviqman rikchakusqankuta’ (2 Corintios 11:14, 15). Ichaqa mana allin ruwaqkunam kanku. ¿Imaynatataq mana musyayllata pantarachiwachwan?

¿Maypitaq runakuna qawanku wañuqkunapa animan kawsasqanta, huchapakuqkunata hinaspa maqanakuqkunata?... ¿Manachu televisionpi, internetpi hinaspa mana allinkunamanta rimaq qillqakunapi? Chaykunata qawaspaqa, ¿pimantaq asuykusun? ¿Diosmanchu icha satanasmanwan demoniokunamanchu?...

¿Pikunataq munanku mana allinkuna qawananchikta?... Satanaswan demoniokunam. Chaynaqa, ¿imakunallatam qawananchik?... Diosman asuykachiwaqninchik kaqkunallatam. ¿Imakunataq chaykunaqa kanman?...

Allin kaqkunata ruwaspaqa manam manchakusunchu demoniokunataqa. Jesusmi paykunamantapas aswan atiyniyuqqa. Paytam huk kutipi demoniokuna mancharisqallaña tapurqaku: “¿Wañuchiqniykuchu hamurqanki?”, nispa (Marcos 1:24). Kusikunapaqmi kanqa demoniokunata Jesus chinkarachiptinqa ¿aw?... Chaynaqa hinallayá Jehova Diosta hinaspa churin Jesucristota kasukusun, chaynapim Jesuspas mana allinkunamanta harkaykuwasun.