Kuyapayakuq kaymanta

ACHKA runakunam runamasinkuta mana kuyankuchu paykuna hina mana kasqankurayku, huk rimayniyuq kasqankurayku utaq allintaqa mana riqsisqankurayku. Qampas, ¿chayna runakunata rikurqanki?...

¿Allinchu kanman chaykunarayku runamasinchikmanta mana allinta rimay?... Manam. Chayna kaspanchikqa manam kuyapayakuq kasqanchiktachu qawachichkachwan.

¿Riqsinkichu pipas mana qam hina rikchayniyuq utaq rimayniyuq runata?... Ichapas wakinqa mana qam hinachu kanku unqusqankurayku utaq ima sasachakuywanpas kasqankurayku. ¿Kuyapayakuqchu kanki paykunawan?...

Wakin runakunaqa mana kuyapayakuqmi kanku. Chaymi Jesusta qatipakuspaqa huk rikchayniyuq utaq huk rimayniyuq runakunataqa kuyapayananchik. Chayna kuyapayakuymantam Jesusqa judio runawan rimasqanpi huk willakuywan yachachirqa.

Jesusmanmi runamasinta mana kuyapayaq judio runa asuykuspan nirqa: “¿Imatataq ruwanay wiñay kawsayta chaskinaypaq?”, nispa. Hinaptinmi Jesusqa chay runaqa castallanta kuyaq kasqanta yachaspan nirqa: ‘¿Ima nichkantaq Moisespa leynin qillqakunapi?’, nispa.

Chay runañataqmi nirqa: ‘Jehova Diosnikitam kuyanayki tukuy sunquykiwan hinaspa runamasikitapas kikikita hina’, nispa. Jesusñataqmi nirqa: ‘Allintam nirunki. Chaynaqa, hinallayá chayta ruway wiñay kawsayta haypanaykipaq’, nispa.

Ichaqa manam chay judio runaqa pay hina mana kaq runakunataqa kuyapayaqchu. Chaymi Jesusta tapurqa: ‘¿Pitaq runamasiyqa?’ nispan. Ichapas chaynataqa tapurqa “runamasikiqa riqsisqallaykim” utaq “qam hina rikchayniyuq runakunam” nispa Jesus niykunanta munaspan. Jesusñataqmi Samaria llaqtayuq runamanta willakuyta qallaykurqa.

Huk judio runam Jerusalenmanta Jerico llaqtaman richkarqa, hinaptinmi suwakunawan tuparuptin pachanta llatanaruspanku llapa imanta qichururqaku. Hinaspam maqaparuspanku wañunayachkaqtaña saqirurqaku.

Chay qipallamanmi huk sacerdote chayninta richkaspan chay wañunayachkaq runata rikururqa. ¿Imatataq qamqa chay runata tariruspaykiqa ruwawaq karqa?... Chay sacerdoteqa mana yanapaykuspanmi huk lawninta pasakurqa.

Qipallanmanmi Jerusalenpi Diospa wasinpi serviq Leviy casta runapas rikuriramurqa. Payqa, ¿yaqachu chay runata yanapaykurqa?... Manam. Paypas chay sacerdote runa hinam huk lawninta pasakurqa.

Chaymantañataqmi Samaria llaqtayuq huk runa rikuriramurqa. ¿Qawachkanki ñanninta hamuchkaqta?... Paypas rikururqam wañunayanankama maqapasqa judio runataqa. Chay tiempopi Samaria llaqtayuq runakunaqa manam judio runakunawanqa apanakuqkuchu (Juan 4:9). Hinaptinqa, ¿yaqachu paypas wakin runakuna hina qawariykuspallan pasakunman karqa, icha “manam yanapasaqchu, paypas manam ñuqataqa yanapawanmanchu”, nispachu ninman karqa?

Manam, aswanqa rikuruspanmi anchata llakipayarikurqa. Hinaspanmi chayna saqiruyta mana munaspan sillakusqan asnochanmanta uraykuspa asuykurqa. Hinaspam aceitewan chaynataq vinowan heridankunata hampispa latapakunawan wankuykurqa.

Chaymantapas uywanman sillaykachispanmi samapakuna wasiman aparqa. Chaypim huk cuartota arriendaspan tukuyta ruwaspa yanaparqa.

Chaynata willakuyta tukuruspanmi Jesusqa tapuqnin judio runata nirqa: ‘¿Mayqintaq kay kimsan runakunamanta chay runapa runamasin karqa?’, nispa. Qampaqqa, ¿pitaq kanman? ¿Sacerdote runachu, Leviy casta runachu icha Samaria llaqtayuq runachu?...

Chay tapukuq runaqa nirqa: “Llakipayaqnin kaqmi”, nispam. Chaymi Jesus nirqa: ‘Chaynaqa qampas chaytayá ruway’, nispa (Lucas 10:25-37).

Sumaqmi kay willakuyqa ¿aw? Ancha allintam yachachiwanchik pim runamasinchik kasqanmanta. Chaynaqa, runamasinchikqa manam riqsisqanchik runakunallachu, ñuqanchik hina kaqkunallachu nitaq rimaynichik rimaqkunallachu. Aswanqa llapallan runakunam kanku. Chaymi Jesuspa nisqanpi hina llapallanwan kuyanakunanchik.

Chaynam Jehova Diospas. Bibliam nin: ‘Diosqa intitapas qispichimun hinaspa paratapas parachimun allin hinaspa mana allin runakunapaqmi’, nispa. Chaymi ñuqanchikpas Dios hina llapallan runakunata kuyananchik (Mateo 5:44-48).

Hinaptinqa, pitapas urmaruqta qawaspaykiqa, ¿imatam ruwanayki?... ¿Huk rikchayniyuq utaq huk rimayniyuq kaptinqa? Chayna kaptinpas yanapaykunaykim. Sapallayki mana atispañataqmi pi yuyayniyuqmanpas willaykuwaq. Chayta ruwaspaqa Samaria llaqtayuq runa hinam runamasikita kuyapayachkanki.

Jesusqa munan piña mayña runamasinchik kaptinpas llapanta kuyapayaspa yanapananchiktam. Chayraykum Samaria llaqtayuq runamanta willawarqanchik.